Гадаад харилцааны сайд Б.Батцэцэг Норвегийн Хаант Улсын “Инновац Норвеги” байгууллагад ажиллав.  Тус байгууллагын дэд ерөнхийлөгч Эва Камерертэй хийсэн уулзалтын үеэр хоёр улсын аж ахуйн нэгжүүдийн хамтын ажиллагааг өргөжүүлэх талаар санал солилцжээ. Мөн эрчим хүч, сэргээгдэх эрчим хүч, хөдөө аж ахуй, аялал жуулчлал зэрэг салбарт хамтран ажиллах, инновац, шинэ технологийг нэвтрүүлэх, бизнесийн харилцааг дэмжих чиглэлээр ярилцсан байна.

   Монголын аж ахуйн нэгж, стартапуудыг Европын зах зээлд нэвтрэхэд дэмжлэг үзүүлэх, туршлага судлах боломжийн талаар санал солилцлоо. “Инновац Норвеги” нь Норвегийн Засгийн газрын инновац, бизнесийн хөгжлийг дэмжих чиг үүрэг бүхий төрийн өмчит байгууллага юм. Гарааны компаниуд болон өсөлтийн боломжтой аж ахуйн нэгжүүдийн өрсөлдөх чадварыг нэмэгдүүлэх, инновацыг хөгжүүлэх замаар олон улсын зах зээлд нэвтрэх боломжийг өргөжүүлэхэд чиглэсэн цогц дэмжлэг үзүүлдэг байгууллага билээ.

   Тус байгууллага нь аж ахуйн нэгжүүдийн мэргэжлийн чадавхыг бэхжүүлэх, дотоод болон олон улсын зах зээлд маркетинг, сурталчилгааны дэмжлэг үзүүлдэг. Мөн бизнесийн стратегийн зөвлөх үйлчилгээ үзүүлэхийн зэрэгцээ байгууллагууд хоорондын түншлэл, хамтын ажиллагааг хөгжүүлэхэд дэмжлэг үзүүлэн ажилладаг юм.