Монгол Улсаас Франц Улс суугаа Элчин сайдын яам, “ЮНЕСКО”-гийн дэргэдэх Байнгын төлөөлөгчийн газар, “ЮНЕСКО”-гийн итгэмжит “Routes Nomades” “Нүүдэлчин зам” холбоотой хамтран Монголын язгуур соёлын биет бус өвийг сурталчлах тоглолтыг 2026 оны гуравдугаар сарын 3-ны өдөр ЭСЯ-нд зохион байгуулжээ.

   Тоглолтыг “ЮНЕСКО”-гийн Дэлхийн өвийн хорооны гишүүн орнуудын Элчин сайд нар, Байнгын төлөөлөгчид болон соёл урлагийн салбарын хүндэт зочид үзэж сонирхлоо. Элчин сайд, Байнгын төлөөлөгч У.Нямхүү тоглолтыг нээж үг хэлэхдээ Монгол Улс Дэлхийн өвийн хорооны шинээр сонгогдсон гишүүний хувьд тус хорооны үйл ажиллагаанд шинжлэх ухаанд суурилсан, бодит судалгаа, нотолгоонд тулгуурласан байх зарчмыг баримталж буйгаа онцлон тэмдэглэжээ.

   Мөн дэлхийн байгалийн болон соёлын хосгүй үнэт өвийг хадгалан хамгаалах, хойч үедээ өвлүүлэн үлдээх эрхэм зорилгын төлөө хорооны гишүүн улс орнуудтай нягт хамтран ажиллахад бэлэн гэдгээ илэрхийлэв. Энэхүү тоглолтод “ЮНЕСКО”-гийн хүн төрөлхтний соёлын биет бус өвийн төлөөллийн жагсаалтад бүртгэгдсэн морин хуур хөгжим, уртын дуу болон яаралтай хамгаалах шаардлагатай соёлын биет бус өвийн жагсаалтад багтсан лимбэний битүү амьсгааны техникийн дээжээс уртын дууч Х.Эрдэнэцэцэг, морин хуурч Н.Хулан, лимбэч О.Эрхэс нар сурталчлан танилцуулсан байна.

   Морин хуурын аялгуу, уртын дууны шуранхай, лимбэний битүү амьсгааны өндөр ур чадвар, техникийг мэргэжлийн уран бүтээлчид ийнхүү толилуулсанд хүрэлцэн ирсэн орнуудын элчин сайд нар, зочид талархлаа илэрхийлэн Монголын язгуур урлаг нь хүн төрөлхтний оюуны соёлын салшгүй хэсэг бөгөөд байгаль дэлхий, нүүдэлчин ахуйн гүн гүнзгий хэлхээ холбоог илэрхийлдэг болохыг өндрөөр үнэлэсэн байна.