Ойрх Дорнод, Персийн буланд үүсээд буй хурцадмал байдлын улмаас “МИАТ” компанийн нислэгийн багийн 14 гишүүн Бахрейн Улсаас гарч чадахгүй саатжээ. Иран Улсаас пуужингийн цохилт өгч эхэлсэнтэй холбоотойгоор Бахрейны нийслэл орчимд дэлбэрэлт болсон байна. Монголын нислэгийн баг байрлаж байсан газраас ердөө хоёр километрийн зайд цохилт болжээ. Үүний дараа тухайн бүсэд яаралтай нүүлгэн шилжүүлэлт эхэлжээ.

   Энэ талаар “МИАТ” компанийн гүйцэтгэх захирал Т.Тэлмэн мэдээлэхдээ, Филиппин–Бахрейн чиглэлд түрээсийн нислэг үйлдэж байсан багийн 28 гишүүнээс 14 нь ээлжээ хүлээн Бахрейнд байрлаж байсан гэдгийг онцоллоо. Аюулгүй байдлыг хангах үүднээс нислэгийн багийнхныг яаралтай шилжүүлж, Бахрейны томоохон ресорт байрладаг арал руу хүргэсэн байна. Одоогоор тэд аюулгүй бүсэд байрлаж буй.

   Гэвч нөхцөл байдал бүрэн тогтворжоогүй хэвээр байна. Бахрейн болон Катар Улс агаарын хилээ түр хугацаагаар хаасан тул нислэг үйлдэх боломжгүй болсон юм.  “МИАТ” компанийн зүгээс шуурхай штаб байгуулж, багийн гишүүдийг эх оронд нь яаралтай татан авах бэлтгэл ажлыг эхлүүлжээ.

   Мөн Монгол Улсын Гадаад харилцааны яамаар дамжуулан холбогдох байгууллагуудтай харилцаа тогтоож, агаарын хил нээгдсэн даруйд иргэдээ авчрах төлөвлөгөө боловсруулсан гэлээ. Түүнчлэн үүсээд буй нөхцөл байдлын талаар Үндэсний аюулгүй байдлын зөвлөлд тогтмол мэдээлэл хүргүүлж буйг компанийн удирдлага мэдэгдлээ.Харин “МИАТ” ХК-ийн онгоц одоогоор Манила хотод нислэгээ хүлээн зогсож байна.