Болгарын Софи хотод сонирхогчдын боксын Европын хамгийн олон жилийн түүхтэй тэмцээнүүдийн нэг болох 77 дахь удаагийн “Странджа-2026” болж байна. Тус тэмцээнд 31 орны 340 орчим боксчин өрсөлдөж байгаа бол манай улсаас дасгалжуулагч Ж.Отгонбаяр, О.Батхүү, Ж.Еркин нарын удирдлагад эрэгтэй долоо, эмэгтэй таван тамирчин ур чадвараа сорьж байна.

      “СТРАНДЖА-2026” олон улсын тэмцээний эрэгтэйчүүдийн 55 кг-ын жинд ОУХМ Х. Билгүүнсайхан Казахстаны тамирчин Kenzhibek Baglan-ийг шүүгчдийн 5:0-ийн саналаар ялж хүрэл медалын болзол биелүүлсэн билээ. Харин өнөөдөр хоёрдугаар сарын 28-ны өдөр ОУХМ. Х. Билгүүнсайхан АНУ-ын “Залуу-Од” Lorenzo Patricio-той мөнгөн медалийн төлөө тулалдана.  Lorenzo Patricio-ийн хувьд албан ёсны бүртгэлд сүүлийн 32 тулаан дарааллан ялаад байгаа бөгөөд 2023 оны наймдугаар сарын 8 -аас хойш ялагдалгүй яваа тамирчин юм байна.

     Мөн өнөөдөр спортын мастер Э. Номундарь Украины тамирчин 2018 оны ДАШТ-ий мөнгөн медальт Okhota Hanna-тaй мөнгөн медалийн төлөө, ОУХМ. Намуун 60 кг-ын жинд Бразилийн тамирчин шинэхэн дэлхийн аварга Rebecca Santos-той мөнгөн медалийн төлөө тулалдана.