Олон улсын жүдо бөхийн холбоо “IJF”-ийн  цуврал “Ташкент-2026” их дуулга тэмцээн хоёрдугаар сарын 27-ноос, гуравдугаар сарын 1-ний өдрүүдэд явагдаж өндөрлөнө. Тус их дуулга тэмцээнд 39 орны эрэгтэй 209, эмэгтэй 161, нийт 370 тамирчин оролцох мэдүүлэг өгөөд байна.

   Энэ удаагийн их дуулга тэмцээнийг манай улсын жүдочид өнжиж байгаа бололтой. Ташкент их дуулга нь өмнө “Grand Prix” ангиллаар 2013 оноос анх зохиогдож эхэлсэн бөгөөд 2021 оноос хойш “Grand Slam” буюу их дуулга ангиллаар зохиогдож байна.

   Ташкентын цагаар өглөөний 10:30 цагаас Монголын цагаар өдрийн 13:30 цагаас урьдчилсан барилдаан эхэлнэ. Харин финалын барилдаан Ташкентийн цагаар оройны 17:00 цагаас Монголын цагаар оройны 20:00 цагаас болно. Финалын барилдааныг уламжлалт ёсоор “C1”- телевиз шууд дамжуулан үзүүлнэ.

   “Ташкент-2026” их дуулга тэмцээний эмэгтэйчүүдийн 48 кг-ын жинд 25, 52 кг-д 21, 57 кг-д 23, 63 кг-д 26, 70 кг-д 26, -78 кг-д 19, +78 кг-д 21 жүдочин барилдана. Эрэгтэйчүүдийн 60 кг-ын жинд 31 тамирчин, 66 кг-д 30, 73 кг-д 37, 81 кг-д 33, 90 кг-д 32, -100 кг-д 28, +100 кг-д 18 жүдочин барилдах юм.

    Эмэгтэйчүүдийн 52 кг-ын жинд АНЭУ-ын нэр дээр барилдаж буй Ази тивийн аварга, ОУХМ Бишрэлтийн Хорлоодой барилдана. Тэрбээр “В” хэсгийг толгойлон барилдах юм. Б.Хорлоодой нэгдүгээр тойрогт гоц мөргөн ялалт авсан байгаа. Хоёрдугаар тойрогт Тажикстаны Madina QURBONZODA-тай таарсан. Түүнийг ялах юм бол хэсгийн аваргын төлөө Нидерланд, Узбекистан, Бразилын бөхчүүдийн хэн ялсантай барилдана.

   Эрэгтэйчүүдийн 66 кг-ын жинд АНУ-ын нэр дээр Эрдэнэцогтын Билэгт барилдана. Тэрбээр “С” хэсгийн нэгдүгээр тойрогт Италийн Valerio ACCOGLI-той таарсан. Түүнийг ялах юм бол хоёрдугаар тойрогт Казахстан, Узбекистаны бөхчүүдийн хэн ялсан барилдана.