Монгол Улсаас БНСУ-ын Пусан хотод суугаа Консулын газар үүсэн байгуулагдсаны 10 жилийн ойн хүрээнд БНСУ-ын Өмнөд бүсийн оюутнуудын дунд зохион байгуулах “Судалж хөгжье–2026” эрдэм шинжилгээний хурлыг 2026 оны зургадугаар сард зохион байгуулах бэлтгэл ажлын хүрээнд оюутнуудын төлөөллийг хүлээн авч уулзлаа.

   Уулзалтад БНСУ-ын Өмнөд бүсийн хотуудад суралцаж буй Mонгол оюутнуудын төлөөлөл оролцож, эрдэм шинжилгээний хурлын зохион байгуулалт, илтгэлийн чиглэл, шалгаруулалтын журам, хамрах хүрээ, хамтын ажиллагааны боломжийн талаар дэлгэрэнгүй санал солилцов.

   Арга хэмжээг залуу судлаачдын “Мишээл” хүрээлэнтэй хамтран зохион байгуулах бөгөөд Монгол Улс, БНСУ-ын нийгэм, эдийн засгийн хамтын ажиллагаа, хөдөлмөр эрхлэлт, гадаадад суралцагчдын оролцоо, тогтвортой хөгжил зэрэг өргөн хүрээний сэдвийн дагуу зохион байгуулагдахаар төлөвлөгдөж байна. Оюутан, залуу судлаачид өөрсдийн судалгааны ажлын үр дүнг танилцуулж, мэдлэг, туршлагаа хуваалцах, академик ур чадвараа хөгжүүлэх, харилцаа холбоогоо өргөжүүлэх боломж бүрдэх юм.

   Консулын газрын зүгээс Өмнөд бүсийн оюутнуудын эрдэм шинжилгээ, судалгааны идэвх санаачилгыг нэмэгдүүлэх, оюутнуудын хамтын ажиллагааг бэхжүүлэх, цаашдын тогтвортой харилцаа холбоог хөгжүүлэхэд дэмжлэг үзүүлэхээ илэрхийллээ.