“Тарвалин” хийдийн нэрэмжит, сар шинийн баярт зориулсан сумын цолтон болон залуу бөхчүүдийн уламжлалт барилдаан 832 бөх зодоглосноос Архангай аймгийн Өгийнуур сумын харьяат, “Бөх Билэгт” дэвжээний бөх, сумын баяр наадмын хоёр түрүүтэй заан Амарсайханы Тодмагнай арав даван түрүүллээ. Харин Төв аймгийн Угтаалцайдам сумын харьяат, “Дүнжингарав” дэвжээний бөх, сумын баяр наадмын гурван түрүүтэй заан Батбаярын Золбаяр үзүүрлэв.

    Их шөвөгт Говь-Алтай аймгийн Дарви сумын харьяат, “Алтай Агро Трейд” ХХК, "Хантайшир" дэвжээний бөх, сумын баяр наадмын хоёр түрүүтэй заан Л.Отгонбаяр, Төв аймгийн Дэлгэрхаан сумын харьяат, “Дүнжингарав” дэвжээний бөх, сумын баяр наадмын хоёр түрүүтэй заан Б.Цогт нар шалгарлаа.

    Дунд шөвөгт Орхон аймгийн харъяат, сумын заан М.Цогтгэрэл, Төв аймгийн харьяат,сумын заан М.Өсөхбаяр, Завхан аймгийн харъяат, сумын заан Б.Лхагварагчаа нар шалгарсан юм. Бага шөвөгт Говь-Алтайн заан У.Буянтогтох, Өвөрхангайн заан Э.Бямбаабаатар, Баян-Өлгийн заан Б.Жандос, Архангайн заан Ч.Даваадорж, Баян-Өлгийн заан С.Ердаулет, Архангайн залуу бөх Б.Цэрэнбат нар үлдэв.

   “NTV” телевизийн хамт олон уламжлалын дагуу түрүү бөхөд хоёр сая, үзүүр бөхөд нэг сая төгрөг, дөрөвт үлдсэн хоёр бөхөд тус бүр 500.000 төгрөгийн бай шагнал өргөмжлөлийн хамт гардуулсан юм. Маргааш 12:00 цагаас аймаг, цэргийн харцага, начин цолтой бөхчүүдийн сар шинийн барилдаантай.