Бүгд Найрамдах Өмнөд Судан Улсад явагдаж буй НҮБ-ын мандаттай “UNMISS” энхийг сахиулах ажиллагаанд үүрэг гүйцэтгэж байгаа алба хаагчдын дунд жил бүр уламжлал болгон зохион байгуулагддаг “Norcon march” тэмцээн амжилттай явагдаж өндөрлөлөө.

   Энэ удаагийн тэмцээнд БНӨСУ-д явагдаж буй НҮБ-ын “UNMISS” энхийг сахиулах ажиллагаанд үүрэг гүйцэтгэж буй 50 орчим орны 300 гаруй алба хаагч хурд хүч, авхаалж самбаагаа сорин өрсөлдсөн бөгөөд цэргийн алба хаагчдын оролцсон дөрвөн төрлийн гуравт нь монгол цэргүүд аваргаллаа.

    Тус маршийн -40 насны ангиллын эрэгтэй төрөлд нэгдүгээр мото буудлагын ротын буудагч дэд ахлагч М.Сауыржан, эмэгтэй төрөлд Хангалт үйлчилгээний ротын хувцас, соёл гэгээрлийн нярав дэд ахлагч О.Уранбайгаль, +40 насны ангиллын эмэгтэй төрөлд Цэргийн цагдаагийн тасгийн цэргийн цагдаа ахлах ахлагч Б.Болормаа нар тэргүүн байрт шалгарчээ.

    Түүнчлэн -40 насны ангиллын эрэгтэй цэргийн алба хаагчдын төрөлд гуравдугаар байрт нэгдүгээр мото буудлагын ротын буудагч дэд ахлагч Б.Жансерик удаалжээ. Ийнхүү даян дэлхийн энхийн манаанд нэгэн далбаан дор үүрэг гүйцэтгэж буй цэргийн алба хаагчдын тэсвэр хатуужил, эв нэгдэл, энх тайвны бэлгэ тэмдэг болсон тус маршид өнгөрөгч хоёр жилийн хугацаанд БНЭУ болон БНХАУ-ын дайчид тэргүүлээд байна.

    Энэ удаа Монголын зэвсэгт хүчнээс гурван ч төрөлд аваргалж тус тэмцээний түүхэнд өөрийн нэр хүндийг дахин баталгаажуулсан үйл явдал болсон юм. Энэхүү тэмцээн нь цэргийн алба хаагчдын бие бялдрын тэсвэр хатуужил, сахилга бат, түүнчлэн энхийг сахиулагч дайчдын хамтын ажиллагааг нэмэгдүүлэх, нөхөрлөлийг бэхжүүлэх зорилготой бөгөөд тус маршид оролцогчид 25 км зайг 10 кг ачаатайгаар туулдгаараа онцлог юм.