“Мэргэн сайд” хэмээх Монгол Улсын Ерөнхий сайд агсан Агданбуугийн Амарын мэндэлсний 140 жилийн ой тохиож байна. Тус ойг тохиолдуулан “Эрдэм төгс Амар” сангаас санаачлан ардын төрийн нэрт зүтгэлтэн, их бичгийн хүмүүн А.Амарын “Монголын товч түүх” бүтээлийн анхны хэвлэлийн эхийг кирилл үсгийн хөрвүүлгийн хамтаар үүсмэл бүтээл болгон шинэчлэн хэвлүүлжээ.

     Энэхүү номын нээлт “Чингис хаан” үндэсний музейн “Эрдэм шинжилгээний номын сан”-д өнөөдөр хоёрдугаар сарын10-ны өдөр боллоо. Одоогоос 90 гаруй жилийн тэртээ  Монгол Улсын Ерөнхий сайд Агданбуугийн Амарын “Монголын товч түүх” ном  худам монгол бичгээр 5000 хувь хэвлэгдсэн байдаг.  

     А.Амарын “Монголын товч түүх (тэргүүн дэвтэр) бүтээлийн анхын хэвлэл эдүгээ ховор болсон энэ үед уг зохиолыг 1934 оны хэвлэлийн эхийг уг хэмжээгээр нь гэрэл зураг болон кирилл үсгийн хөрвүүлгийг хамтатган энэхүү бүтээлийг эрхлэн гаргасан байна.  Агданбуугийн Амарын зохиол нь XIII зууны эхэн буюу Чингис хааны үеийг хураангуйлан бичсэн нь монголын түүх судлалын анхны томоохон бүтээл болсон хэмээн ач холбогдол, үнэ цэнийг нь түүхчид дүгнэсэн байдаг.