Монголын чөлөөт бөхийн холбоо шинэчилсэн бодлогын хүрээнд тамирчдаа дэлхийн өндөр хөгжилтэй орнуудын шилдэг баг, дасгалжуулагч нартай хамтарсан бэлтгэлд тогтмол хамруулах зорилтыг үе шаттай хэрэгжүүлж байна. Энэ ажлын хүрээнд Монгол Улсын чөлөөт бөхийн үндэсний шигшээ багийн тамирчид Япон Улсын Маэбаши хотын “Икуэй” их сургуульд дэлхийн шилдгүүдтэй хамтарсан хоёр долоо хоногийн бэлтгэлд оролцохоор зорилоо.

    Тус хамтарсан бэлтгэлийг Японы нэрт дасгалжуулагч Казухито Сакай, Монгол Улсын шигшээ багийн дасгалжуулагчдын бүрэлдэхүүн болон Японы бусад туршлагатай дасгалжуулагчид хамтран өргөн цар хүрээтэй удирдан зохион байгуулах юм. Бэлтгэлийн хөтөлбөр нь орчин үеийн бөхийн бэлтгэл, тактик, техник, бие бялдрын болон сэтгэл зүйн бэлтгэлийг хослуулсан цогц агуулгатайгаар явагдах аж.

    Хамтарсан бэлтгэлийн үр өгөөж нь тамирчдын техник, ур чадвар, хурд, тэсвэр хатуужлыг ахиулахын зэрэгцээ олон улсын түвшний өрсөлдөөнд дасан зохицох чадварыг нэмэгдүүлэх, дэлхийн шилдгүүдийн арга барил, туршлагаас шууд суралцах бодит боломжийг бүрдүүлж буйгаараа онцлогтой гэнэ. Мөн багийн уур амьсгал, хамтын ажиллагаа, сахилга бат, бэлтгэлийн соёлыг олон улсын жишигт ойртуулж, цаашдын томоохон тэмцээн уралдаанд амжилт гаргах суурь нөхцөлийг бэхжүүлэх гэнэ.

   Түүнчлэн энэхүү бэлтгэлийн үеэр Монголын чөлөөт бөхийн холбооны ерөнхий нарийн бичгийн дарга Б.Мянганбаяр өөрийн биеэр оролцож, хамтарсан бэлтгэлийн явцтай танилцан, судалгаа хийж, цаашдын хамтын ажиллагааг өргөжүүлэх чиглэлээр санал солилцож ажиллаж байна. Мөн энэхүү хамтарсан бэлтгэлд баг тамирчдыг ая тухтай, найдвартай тээвэрлэн хүргэж, бодит дэмжлэг үзүүлсэн Үндэсний агаарын тээвэрлэгч “МИАТ” ТӨХК-д Монголын чөлөөт бөхийн холбооны зүгээс гүн талархал илэрхийлж байна.