Олон улсын жүдо бөхийн холбоо, “IJF”-ийн цуврал  тэмцээнүүдийн 2026 оны эхний “Их дуулга” Франц Улсын Парис хотод хоёрдугаар сарын 7-8-ны өдрүүдэд болж өндөрлөв. Энэ удаагийн “Бага дэлхийн аварга” гэж нэрлэдэг “Парис-2026  Гран слам”-д дэлхийн 78 орны эрэгтэй 299, эмэгтэй 189, нийт 488 тамирчин өрсөлдөв. Манай улсаас эрэгтэй долоо, эмэгтэй найман тамирчин барилдлаа. Эмэгтэйчүүдийн 63 кг-ын жинд МУГТ Лхагватогоогийн Энхрийлэн мөнгөн медаль, 48 кг-ын жинд ОУХМ, Ганбаатарын Наранцэцэг шагналт V байрт шалгарсан амжилт үзүүллээ.

ЭМЭГТЭЙЧҮҮДИЙН 48 КГ-Д Ж.АНУДАРЬ, Г.НАРАНЦЭЦЭГ

   Эмэгтэйчүүдийн 48 кг-ын жинд 23 тамирчин барилдсан байна. Манай улсаас энэ жинд ОУХМ Ганбаатарын Наранцэцэг, ОУХМ Жамсрангийн Анударь нар барилдлаа. Г.Наранцэцээг “В” хэсгийн нэгдүгээр тойрогт гоц мөргөн ялалт авсан.

    Хоёрдугаар тойрогт Францын Morgane ANNIS-ыг ялсан. Гуравдугаар тойргийн барилдаанд Испанийн шилдэг тамирчин Laura MARTINEZ ABELENDA ялж, “В” хэсгээс нэгээр гарч, шөвгийн дөрөвт шалгарсан. Хагас шигшээ барилдаанд Хятадын Wenna ZHUANG-д хожигдсон. Хүрэл медалийн төлөөх барилдаанд Хятадын өөр нэг тамирчин,  HUI Xinran-д даралтаар ялагдаж, V байрт орсон. Г.Наранцэцэг үнэхээр сайн барилдсан хэдий ч  Хятадын хоёр тамирчинд дараалан ялагдлаа. Магадгүй олон килограмм хасаж 48 кг руу ордог нь барилдааны төгсгөлд цуцалт өгөөд байх шиг байна.

    ОУХМ Жамсрангийн Анударь “С” хэсгийн нэгдүгээр тойрогт Италийн Francesca MILANI-ыг ялсан. Хоёрдугаар тойрогт Хятадын  HUI Xinran-д хожигдож, тэмцээнээ өндөрлүүлсэн. Ж.Анударийн хувьд зоримог шийдэмгий дайчин барилдахыг хичээж байгаа хэдий ч барьцаа гүйцэд авахгүй байна. Нэг барьцнаас мэх хийх гэж яарч дутуу мэх хийж, өрсөлдөгчийн хариу мэхэнд орох нь түүний том алдаа болоод байна.

ЭМЭГТЭЙЧҮҮДИЙН 52 КГ-Д М.НАНДИН-ЭРДЭНЭ, Б.УРАНЗАЯА

      Эмэгтэйчүүдийн 52 кг-ын жинд 29 тамирчин барилдсан. Манай улсаас энэ жинд ОУХМ  Мягмарсүрэнгийн Нандин-Эрдэнэ, Баянмөнхийн Уранзаяа нар барилдлаа.

     М.Нандин-Эрдэнэ их чанга сугалаа татсан байгаа. Тэрбээр “В” хэсгийн нэгдүгээр тойрогт Францын Amandine BUCHARD-тай таарсан юм.  М.Нандин-Эрдэнэ үнэхээр сайн барилдсан. Үндсэн цагт үнэлгээ авалгүй нэмэлт цаг сунгасан барилдаанд Amandine BUCHARD-ын дархан өмсөх мэхэнд үнэлгээ алдаж, ялагдал хүлээн тэмцээнээ дуусгасан.

Б.Уранзаяа “С” хэсгийн нэгдүгээр тойрогт Унгарын “Залуу-Од”  Roza GYERTYAS-тай таарч ялагдсан.

ЭМЭГТЭЙЧҮҮДИЙН 57 КГ-Д Т.АРИУНЗАЯА

    Эмэгтэйчүүдийн 57 кг-ын жинд 25 тамирчин барилдсан. Манай энэ жинд ОУХМ Тэрбишийн Ариунзаяа барилдлаа. Тэрбээр “В” хэсгийн нэгдүгээр тойрогт Испанийн Adriana RODRIGUEZ SALVADOR-той таарсан юм. Тус барилдаанд Т.Ариунзаяа боломжийн барилдаж байсан хэдий ч Adriana RODRIGUEZ SALVADOR-ын жийж давуулах мэхэнд орж, ялагдал хүлээсэн.

ЭМЭГТЭЙЧҮҮДИЙН 63 КГ-Д Л.ЭНХРИЙЛЭН

  Эмэгтэйчүүдийн 63 кг-ын жинд 23 жүдочин барилдсан байгаа. Манай улсаас энэ жинд МУГТ Лхагватогоогийн Энхрийлэн барилдав. Тэрбээр “В” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Испанийн  Laura VAZQUEZ  FERNANDEZ ялж, хэсгийн аварга болсон. Дөрөвний нэгийн шигшээ барилдаанд Хорватын Iva OBERAN-ыг буулган авч алтан медалийн төлөөх барилдахаар шалгарч үлдсэн.

   Аваргын төлөөх барилдаанд олимп, дэлхийн аварга Бразилийн Rafaela SILVA-тай таарсан. Түүнийг өмнө нь 57 кг-ын жинд барилддаг байхдаа хоёр удаа ялж байсан юм. Л.Энхрийлэн хэт яарсан шийдэмгий барилдаан хийсэн нь алдаа гаргах үндэс болсон.  SILVA тэр боломжийг ашиглан өчиг мэхээр ялалтыг авч чадсан. Тайван, хүлээсэн, хяналттай барилдсан бол Rafaela SILVA-г ялах боломжтой байлаа.

ЭМЭГТЭЙЧҮҮДИЙН -78 КГ-Д О.ХҮСЛЭН, А.ДУЛАМСҮРЭН

      Эмэгтэйчүүдийн -78 кг-ын жинд 29 жүдочин барилдсан байгаа. Манай улсаас ОУХМ Отгонбаярын Хүслэн, залуу тамирчин Айлтгүйбаатарын Дуламсүрэн нар өрсөлдөв. О.Хүслэн их чанга сугалаа татсан байгаа. Тэрбээр “В” хэсгийн нэгдүгээр тойрогт Францын Audrey TCHEUMEO-той барилдаж хожигдсон.  Харин А.Дуламсүрэн “D” Хэсгийн нэгдүгээр тойрогт Сербийн Jovana  STJEPANOVIC-д ялагдсан.

ЭРЭГТЭЙЧҮҮДИЙН 60 КГ-Д Э.АРИНБОЛД, Т.ТҮМЭНЖАРГАЛ

     Эрэгтэйчүүдийн 60 кг-ын жинд 39 жүдочин барилдсан. Манай улсаас ДАШТ-ий мөнгөн медальт, ОУХМ Энхтайванын Ариунболд, залуу тамирчин, оюутны “Унирверсиад” их наадмын хүрэл медальт, шинэхэн улсын аварга Түвшинтөрийн Түмэнжаргал нар барилдлаа.

      Э.Ариунболд “D” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Бразилын Diego ISMAEL-ыг ялсан. Гуравдугаар тойрогт Азербайжаны  Balabay AGHAYEV-т ялагдаж, тэмцээнээ өндөрлөсөн. Энэ жинд залуу тамирчин, шинэхэн улсын аварга Т.Түмэнжаргал  “В” хэсгийн нэгдүгээр тойрогт Украины Dilshot KHALMATOV-т ялагдсан. Түүний хувьд цаашид амжилттай барилдах боломж харагдаж байна

ЭРЭГТЭЙЧҮҮДИЙН 66 КГ-Д Ё.БАСХҮҮ, Ө.ЖАНЦАНДОРЖ,

   Эрэгтэйчүүдийн 66 кг-ын жинд 47 жүдочин барилдсан байгаа. Манай улсаас ДАШТ-ий  хошой мөнгөн медальт, Ази тивийн аварга, МУГТ Ёндонпэрэнлэйн Басхүү, “Гран при”-гийн хүрэл медальт, залуу тамирчин Өнөрбатын Жанцандорж, нар барилдана.

    МУГТ Ё.Басхүү “А” хэсгийн нэгдүгээр тойрогт гоц мөргөн ялалт авсан. Хоёрдугаар тойргийн барилдаанд Италийн Valerio ACCOGLI-д ялагдсан. Ё.Басхүүгийн хувьд нас ахиад хурд, тэсрэлт, бяр хүч жаахан буурсан бололтой байна. Мэхний гүйцэтгэл тааруу, барьж, баглаж барилддаг, өмнөх үеийн Ё.Басхүү харагдахгүй байгаа. Жин хасдаг нь түүний барилдаанд нөлөөлөөд байж магадгүй.

   Залуу тамирчин Ө.Жанцандорж “С” хэсгийн нэгдүгээр тойрогт Мороккогийн Abderrahmane BOUSHITA-г ялсан. Хоёрдугаар тойрогт олимп, дэлхийн медальтан, Казахстаны шилдэг тамирчин Gusman KYRGYZBAYEV-г ядах юмгүйгээр хоёр вазари, нэг юко үнэлгээгээр ялалтыг авсан нь үнэхээр гайхалтай байлаа. Ё.Басхүү, Г.Хэрлэн, Б.Эрхэмбаяр нарыг  залгамжлах ирээдүй харагдаж байна. Өмнөд Солонгосын KIM Channyeong-ыг ялсан бол хэсгийн аваргын төлөө барилдах боломж гарах байв. Ер нь манай тамирчид гадны жүдочдын жийж давуулах мэхэнд гол төлөв үнэлгээ алдаж, ялагдаад байгаа нь харагдлаа.

ЭРЭГТЭЙЧҮҮДИЙН 73 КГ-Д О.УРАНБАЯР, Л.АНХЗАЯА,

    Эрэгтэйчүүпийн 73 кг-ын жинд 48 жүдочин барилдсан байгаа. Манай улсаас ДАШТ-ий хүрэл медальт, ОУХМ Лавжаргалын Анхзаяа, “Улаанбаатар Гранд слам”-ын аварга, ОУХМ Одгэрэлийн Уранбаяр нар барилдсан. О.Уранбаяр “А” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Казахстаны Yesset KUANOV-т ялагдсан.

   Харин ОУХМ Л.Анхзаяа “D” хэсгийн нэгдүгээр тойрог гоц мөргөн ялалт авсан. Хоёрдугаар тойрогт Английн, Гүрж гаралтай  Irakli GOGINASHVILI-д хожигдсон.

ЭРЭГТЭЙЧҮҮДИЙН 81 КГ-Д О.ШИНЭБАЯР

      Эрэгтэйчүүдийн 81 кг-ын жинд 50 жүдочин барилдсан байгаа. Энэ жинд манай улсаас Оюунчимэгийн Шинэбаяр барилдлаа. Тэрбээр “С” хэсгийн нэгдүгээр тойрогт АНУ-ын Ramon HERNANDEZ JR-ыг ялсан. Хоёрдугаар тойрогт Бразилын Gabriel  FALCAO-той барилдаж гурван торгуулиар ялагдал хүлээв.