Дэлхийн загварын нийслэлүүдийн нэг Милан хотод болох “Милан–Кортина-2026” өвлийн олимпын наадмын нээлтийн ёслолд Монгол Улсын баг эх орныхоо өв соёл, уламжлалыг орчин үеийн загварт шингээсэн, анхаарал татам хувцсаар олны нүдийг булаасаар байна.

   Монголын баг  “Парис-2024” зуны олимпын нээлтийн ёслолын хувцсаараа олон улсын загварын хүрээнд өндөр үнэлгээ авч байсан билээ. Монголын баг энэ удаа ч “Милан–Кортина-2026”-д загварлаг төрхөөрөө дахин тодорч байна. Нээлтийн ёслол маргааш буюу хоёрдугаар сарын 6-ны өдөр болох юм.

    Манай тамирчид XIII–XV зууны Их Монголын эзэнт гүрний үеийн өв соёлоос санаа авсан уг загварыг дотоодын брэнд “GOYOL” урласан бөгөөд Монголын хүйтэн өвлийг илтгэх ноолууран материал, орчин үеийн силуетийг ашиглажээ.

    Хувцасны үндсэн элемент нь монголчууд олон зууны турш өмсөж ирсэн, өндөр захтай дээл бөгөөд уламжлалт нэхмэл, эсгүүрийг орчин цагийн дизайнаар дахин төсөөлсөн нь онцлог. Хар хөх өнгө нь мөн нүүдэлчдийн бөө мөргөлийн итгэл үнэмшил дэх мөнх хөх тэнгэрийг бэлгэдсэн утгатай гэж тайлбарлаж байна.

   Үүнээс гадна Монголын багийн чөлөөт хувцаснуудыг зэрэг танилцуулсан бөгөөд уулын спортод тохирсон ноосон цамцууд нь нүүдэлчдийн уламжлалт сууц болох гэрийн дугуй хэлбэр, эсгий хийцийг санагдуулна.

    Монголын багийн бүрэлдэхүүн 2026 оны өвлийн олимпод Монгол Улсаас гурван тамирчин оролцоно.  Олимдын уулын цанын төрөлд А. Ариунбат, гүйлтийн цанын төрөлд Б. Ачбадрах, Э. Ариунтунгалаг нар өрсөлдөнө. Монголын баг ийнхүү спортын талбараас гадна соёл, загварын тайзан дээр ч эх орныхоо өнгө төрхийг тод томруун харуулахад бэлэн боллоо хэмээн www.olympics.com онцоллоо.