ОХУ-ын Красноярск хотод олимп, дэлхийн аварга, алдар бөх Иван Ярыгины нэрэмжит чөлөөт бөхийн “Алтан Гран при-2026” тэмцээн үргэлжилж байна. Тус тэмцээний эрэгтэйчүүдийн 57 кг-ын жинд Үндэсний шигшээ баг, “Төгс” дэвжээний бөх, Азийн аваргын хүрэл медальт, ОУХМ Батхуягийн Мөнх-Эрдэнэ амжилттай барилдаж алтан медаль хүртлээ.

       Тэрбээр 2025 оны дэлхийн аварга БНАСАУ-ын бөх Хан Чон Соыг 11:1-ээр илүүрхэн оноогоор цэвэр ялж, алтан медалийн төлөөх барилдаанд ОХУ-ын бөхийг ялж,  27 жилийн дараа эрэгтэй бөхчүүдээс дахин алтан медальтан төрж, монгол бөхийн нэр төрийг ийнхүү дэлхийд дахин дуурсгалаа.

      “Бага дэлхийн аварга” хэмээн алдаршсан энэхүү нэр хүндтэй тэмцээнээс   өмнө нь 1991 онд ОУХМ Л.Сэргэлэнбаатар, 1999 онд МУГТ О.Пүрэвбаатар нар алтан медаль хүртэж байсан түүхтэй.