Жүдо бөхийн 2026 оны насанд хүрэгчдийн УАШТ Хэнтий аймгийн Чингис хотноо сүүлийн өдрөө үргэлжилж өндөрлөв. Холимог багийн 12 дахь удаагийн УАШТ-нд 12 баг оролцсон юм. Жүдо бөхийн холимог багийн 12 дахь удаагийн УАШТ-ий алтан медалийн төлөөх шигшээ барилдаанд “Алдар” спорт хороо болон “Хилчин” спорт хорооны нэгдүгээр багийнхан тунаж үлдсэн.  “Алдар” спорт хорооны багаас ОУХМ Г.Болор-Очир, А.Мөнх-Эрдэнийг, ОУХМ А.Адьяасүрэн, А.Дуламсүрэнг, ОУХМ С.Лхагвадулам, Д.Есүй бэртэлтэй учраас ялалтыг авлаа.

    Харин “Хилчин” спорт хорооны тамирчдаас ОУХМ Б.Гончигсүрэн, МУГТ Ө.Дүүрэнбаярыг, ОУХМ Т.Ариунзаяа, ОУХМ Г.Наранцэцэгийг, МУГТ Ё.Басхүү, ОУХМ Л.Анхзаяаг ялсан юм. Улмаар хоёр багийнхан 3:3-аар тэнцэж, ахин нэг жинг сугалан барилдахад -90 кг-ын жинд ОУХМ Г.Болор-Очир, А.Мөнх-Эрдэнэ нар хүч сорих болж, ОУХМ Г.Болор-Очир өрсөлдөгчөө буулган авснаар ялагчийн хувь заяаг шийдлээ.

“ЖЕНКО” КЛУБИЙН I БАГИЙНХАН ХҮРЭЛ МЕДАЛЬ ХҮРТЛЭЭ

   Жүдо бөхийн 2026 оны УАШТ-ний холимог багийн төрөлд Г.Энхбаяр, Ш.Цэвэлмаа дасгалжуулагчтай “Женко” клубийн нэгдүгээр багийн тамирчид хүрэл медаль хүртэв. Тэд хүрэл медалийн төлөөх барилдаанд “Женко” клубийн II багтай оноолт тааран барилдаж, 4:2-оор ялсан юм.

СҮЛД" СПОРТ ХОРООНЫ БАГ, ТАМИРЧИД ХҮРЭЛ МЕДАЛИЙН ЭЗЭД БОЛЛОО

      Жүдо бөхийн 2026 оны УАШТ-ний холимог багийн төрөлд Б.Серик дасгалжуулагчтай Шүүхийн шийдвэр гүйцэтгэх Ерөнхий газрын харьяа “Сүлд” спорт хорооны баг, тамирчид хүрэл медаль гардав. “Сүлд” спорт хорооны багт дэлхийн аварга, МУГТ Ц.Цогтбаатар, дэлхийн хошой медальт, МУГТ Л.Энхрийлэн, өсвөрийн дэлхийн аварга М.Цэндбазар, Азийн аваргын хүрэл медальт, ОУХМ О.Хүслэн, үндэсний бөхийн улсын заан, ОУХМ Б.Серик, Н.Амартүвшин нар хүч сорилоо. Тэд хүрэл медалийн төлөөх барилдаанд “Хилчин” спорт хорооны II багийг ялсан.

Холимог багийн нэгдсэн дүн:

Тэргүүн байрт ОУХМ Д.Батсайхан, МУГД П.Нямлхагва, МУГТ Д.Цэрэнханд дасгалжуулагчтай “Алдар” спорт хороо.

Хоёрдугаар байрт МУГТ Х.Эрдэнэт-Од, ОУХМ Г.Түвшинжаргал, ОУХМ Б.Мөнхтуяа дасгалжуулагчтай “Хилчин” спорт хороо.

Гуравдугаар байрт ОУХМ Б.Серик дасгалжуулагчтай “Сүлд” спорт хороо, гуравдугаар байрт МУГД Г.Энхбаяр, МУГД Ш.Цэвэлмаа дасгалжуулагчтай “Женко” клуб тус тус шалгарлаа.

2026 ОНЫ УАШТ-ИЙ “ШИЛДЭГ ШҮҮГЧ”-чид ТОДОРЛОО

   Жүдо бөхийн 2026 оны насанд хүрэгчдийн УАШТ-ий шилдэг шүүгчээр Хэнтий аймгийн Баян-Овоо сумын уугуул, Олон улсын "А" зэрэглэлийн шүүгч Дамдины Энхтүвшин, БНСУ-аас урилгаар ирж ажилласан Олон улсын "А" зэрэглэлийн шүүгч Хан Сун Нам нар шалгарлаа.