Хэнтий аймгийн Чингис хотод  нэгдүгээр сарын 23-ны өдөр жүдо бөхийн насанд хүрэгчдийн улсын аварга шалгаруулах тэмцээн эхэлсэн билээ. Энэ удаагийн УАШТ-д эрэгтэй 212 , эмэгтэй 105,  нийт 317 тамирчин оролцож байна. Өнөөдөр өглөө 9:00 цагаас эхний өдрийн хэсгийн барилдаанууд эхэлсэн. Харин финалын барилдаанууд 16:00 цагаас явагдаж өндөрлөв. Өнөөдөр эхний өдөр эрэгтэйчүүдийн  60 , 66 , 81 кг-ын жин ,  эмэгтэйчүүдийн  48 , 52 , 63 кг-ын  жингийн медальтнууд тодорлоо. Маргааш УАШТ-ий гурав дахь өдөр холимог багийн тэмцээн явагдаж, 2026 оны жүдо бөхийн УАШТ өндөрлөнө.

ГАВЬЯАТ Л.ЭНХРИЙЛЭН УЛСЫН АВАРГАД ДӨРӨВ ДЭХ УДААГАА ТҮРҮҮЛЛЭЭ

     ДАШТ-ий хошой хүрэл, Азийн аваргын алт, мөнгө, хүрэл медальт, МУГТ Л.Энхрийлэн улсын аваргын дөрөв дэх түрүүгээ авлаа. Тэрбээр сүүлийн хоёр жилд дараалан 63 кг-ын аварга боллоо. Өнгөрсөн оны улсын аваргаас хүрэл медаль гардсан “Гүрү дожо” дэвжээний залуу тамирчин, Х.Маралмаа өнөө жил амжилтаа ахиулж, мөнгөн медаль хүртэв. Энэ жингийн хүрэл медалийг “Орхон-Ирээдүйн-Одод” дэвжээний тамирчин П.Нандинцэцэг, “Женко” клубийн Ц.Сүнжидмаа нар гардлаа.

Эмэгтэйчүүдийн 63 кг-ын дүн:

1. Л.Энхрийлэн (Сүлд)

2. Х.Маралмаа (Гүрү дожо)

3. П.Нандинцэцэг (Орхон ирээдүйн одод)

3. Ц.Сүнжидмаа (Женко)

Ж.АНУДАРЬ -48 КГ-Д ХОЁР ДАХЬ ЖИЛЭЭ ДАРААЛАН ТҮРҮҮЛЛЭЭ

    Жүдо бөхийн насанд хүрэгчдийн УАШТ-ий эмэгтэйчүүдийн 48 кг-ын жинд “Женко” клубийн тамирчин, өсвөр үеийн ДАШТ-ий мөнгөн медальт, Ази тивийн аварга, ОУХМ Ж.Анударь аварга боллоо. Ийнхүү тэрбээр насанд хүрэгчдийн УАШТ-ий хөнгөн жинд хоёр дахь жилээ дараалан түрүүлж байна. Энэ жинд “Respect” клубийн бөх, 15 насандаа “Улаанбаатар Их дуулга” тэмцээнд хүч сорьж, шуугиантайгаар хүрэл медаль хүртэж байсан А.Мишээл үзүүрлэв. Хүрэл медалийг “Winner” клубийн Н.Ундрахбаяр, “Тэмүүжин” дэвжээний Л.Булган нар авлаа.

Эмэгтэйчүүдийн 48 кг-ын дүн:

1. Ж.Анударь (Женко)

2. А.Мишээл (Respect)

3. Н.Ундрахбаяр (Winner)

3. Л.Булган (Тэмүүжин)

М.НАНДИН-ЭРДЭНЭ УЛСЫН ХОШОЙ АВАРГА БОЛЛОО

     Жүдо бөхийн насанд хүрэгчдийн УАШТ-ий эмэгтэйчүүдийн 52 кг-ын жинд “Гүрү дожо” дэвжээний бөх, ОУХМ М.Нандин-Эрдэнэ хоёр дахь жилээ дараалан аваргалав. Азийн аваргын хүрэл медальт, “Их дуулга” ангиллын хошой аварга, ОУХМ Г.Наранцэцэг энэ удаад жин өгсөж барилдаад мөнгөн медаль дээр буулаа.

Харин хүрэл медалийн эздээр “Хилчин” спорт хорооны бөх О.Оюунчимэг, Дархан-Уул аймгийн тамирчин Ц.Гал-Од нар тодорсон.

Эмэгтэйчүүдийн 52 кг-ын дүн:

1. М.Нандин-Эрдэнэ (Гүрү дожо)

2. Г.Наранцэцэг (Алдар)

3. О.Оюунчимэг (Хилчин)

3. Ц.Гал-Од (Дархан-Уул)

60 КГ-Д "ШИНЭ БАДРАХ" ДЭВЖЭЭНИЙ Т.ТҮМЭНЖАРГАЛ АВАРГАЛЛАА

    Жүдо бөхийн УАШТ-ий эрэгтэйчүүдийн хөнгөн жин 60 кг-д “Шинэ Бадрах” дэвжээний тамирчин Т.Түмэнжаргал түрүүлэв. Тэрбээр насанд хүрэгчдийн улсын аваргаас анхны медалиа гардсан нь алтан медаль боллоо. Энэ жинд “Женко” клубийн бөх, ОУХМ Э.Сумьяабазар үзүүрлэсэн бол хүрэл медалийг “Алдар” спорт хорооны тамирчин, ДАШТ-ий мөнгөн медальт, ОУХМ Э.Ариунболд, “Мон-Алтиус Цагаанбаатар” академийн бөх, Н.Мэндсайхан нар гардлаа.

Эрэгтэйчүүдийн 60 кг-ын дүн:

1. Т.Түмэнжаргал (Шинэ бадрах)

2. Э.Сумьяабазар (Женко)

3. Э.Ариунболд (Алдар)

3. Н.Мэндсайхан (Мон-Алтиус Цагаанбаатар академи).

66 КГ-Д ДЭЛХИЙН МЕДАЛЬТ К.ЁОЛК ТҮРҮҮЛЛЭЭ

     Жүдо бөхийн 2026 оны насанд хүрэгчдийн УАШТ-ий эрэгтэйчүүдийн 66 кг-ын жинд өнгөрсөн оны ДАШТ-ий хүрэл медальт К.Ёолк аваргалав. Тэрбээр шигшээ барилдаанд Азийн аварга, ОУХМ Б.Эрхэмбаярыг ялсан юм. Харин улсын гурван удаагийн аварга, ОУХМ Б.Эрхэмбаяр энэ удаа мөнгөн медаль гардлаа. Хүрэл медалийг “Хурд” дэвжээний бөх, самбо бөхийн дэлхийн аварга Л.Сумъяа, “Алдар” спорт хорооны тамирчин Ө.Жанцандорж нар хүртэв.

Эрэгтэйчүүдийн -66 кг-ын дүн:

1. К.Ёолк (Хилчин)

2. Б.Эрхэмбаяр (Алдар)

3. Ө.Жанцандорж (Алдар)

3. Л.Сумъяа (Хурд)

О.ШИНЭБАЯР УЛСЫН ХОШОЙ АВАРГА БОЛЛОО

     Жүдо бөхийн УАШТ-ий эрэгтэйчүүдийн 81 кг-ын жинд “Тэмүүжин” клубийн тамирчин О.Шинэбаяр хоёр дахь жилээ дараалан аваргалав. “Шинэ Бадрах” клубийн бөх Б.Шинэтулга насанд хүрэгчдийн улсын аваргаас анхны медалиа гардахдаа мөнгөн медаль атгалаа. Хүрэл медалийг Хэнтий аймгийн тамирчин Н.Хадбаатар, “Хангарьд” дэвжээний бөх Г.Батсугар нар хүртэв.

Эрэгтэйчүүдийн 81 кг-ын дүн:

1. О.Шинэбаяр (Тэмүүжин)

2. Б.Шинэтулга (Шинэ бадрах)

3. Г.Батсугар (Хангарьд)

3. Н.Хадбаатар (Хэнтий).