МҮОХ-ны дэргэд шинэ санаачилга гаргах, олон улсын хэмжээнд хамтран ажиллах, үйл ажиллагааны төлөвлөгөө гаргах, арга хэмжээ зохион байгуулахад дэмжлэг үзүүлэх, төсөл хөтөлбөр хэрэгжүүлэх зорилгоор гишүүд, тамирчдын төлөөллөөс бүрдсэн Тамирчдын комисс, Жэндерийн тэгш байдлын комисс, Олимпын боловсрол олгох комисс, Маркетингийн комисс зэрэг арав гаруй салбар комиссууд идэвхтэй ажилладаг билээ.

    МҮОХ-ны Тамирчдын комиссыг “Рио 2016” олимпын наадмын хүрэл медальт, МУГТ Д. Отгондалай 2018 оноос удирдан зохион байгуулж, залуу тамирчдын сургалт, цугларалт, Тамирчдын форум зэрэг үйл ажиллагааг уламжлал болгон амжилттай зохион байгуулаад байна.

    Өчигдөр МҮОХ-ны Тамирчдын комисс “Олимпик хаус”-т хуралдаж дүрмийн дагуу комиссын дарга нь сүүлийн гурван олимпын наадамд оролцож, амжилт гаргасан байх заалтын дагуу “Токио 2020” Олимпын хүрэл медальт Б. Болортуяаг комиссын даргаар баталлаа.

    Тамирчдын комиссын зүгээс МҮОХ-ны 70 жилийн ой, ОУОХ-ны ивээл дор зохиогдох олимпын наадмууд, АОЗ-ын наадмуудад оролцох тамирчдад чиглэсэн олон талт үйл ажиллагаа зохион байгуулах талаар санал солилцож, Төр засгийн байгууллагуудтай хамтран спортыг сурталчлах нийгэмд чиглэсэн томоохон аян хийх болон спортын салбарын хүний нөөц, боловсон хүчнийг бодлогоор бэлтгэх тал дээр анхаарал хандуулах шаардлагатай байгааг онцоллоо.