Өндөр Гэгээн Занабазарын мэлмий гийсний 390 жилийн ойн хүрээнд 2026 оны нэгдүгээр сарын 19-ний өдөр Бүгд Найрамдах Итали Улсын Ром хотын Боргезе галерейд “Монголоос Барокко ертөнц рүү” үзэсгэлэн нээлтээ хийв. Үзэсгэлэнг нээж Элчин сайд Ц.Нарантунгалаг, “Чингис хаан Үндэсний музей”-н захирал С.Чулуун, “Боргезе” галерейн захирал Франческа Каппеллетти нар үг хэлэв.

    Монгол Улсын түүх, соёлын хосгүй үнэт дурсгалт зүйлийн жагсаалтад бүртгэлтэй “Ногоон дарь эх” хүрэл цутгамал болон “Өндөр гэгээн Занабазар” хүрэл цутгамал зэрэг бүтээлүүд “Боргезе” галерейд энэ оны нэгдүгээр сарын 20-ны өдрөөс хоёр дугаар сарын 22-ны өдөр “Монголоос Барокко ертөнц рүү” сэдэвт үзэсгэлэн гарна.

    Мөн Турин хотын Дорно дахины урлагийн музейд энэ оны хоёрдугаар сарын 26-ны өдрөөс дөрөвдүгээр сарын 7-ны өдрүүдэд “Занабазар: Тал нутгийн мэлмий” сэдэвт үзэсгэлэн олон нийтэд дэлгэгдэнэ. Энэ өдөр мөн “Чингис хаан Үндэсний музей” болон Италийн Соёлын өвийн хүрээлэн хоорондын хамтран ажиллах тухай харилцан ойлголцлын санамж бичигт талууд гарын үсэг зурав.