2026 оны нэгдүгээр сарын 8–9-ний өдрүүдэд ОХУ-ын Буриадын Улаан-Үд хотод “Волейболный центр - Эйс” төв шинээр ашиглалтад орсон байна. Энэ үеэр элсний волейболын олон улсын “Ace Cup on Sand” тэмцээн амжилттай зохион байгуулагдлаа.

    Тэмцээнд Монгол Улсаас эрэгтэй, эмэгтэй багууд амжилттай оролцлоо. Уг төв нь элсний хоёр, заалны гурван талбай, иж бүрэн хувцас солих өрөөтэй, орчин үеийн цогцолбор бөгөөд зааланд дэвссэн элсийг Кемеров хотоос зөөвөрлөсөн 250 тонн кварцын угааж ариутгасан элсээр хийжээ.

    Нээлтийн ажиллагаанд Буриадын Спортын сайд оролцож, Монголын тамирчдад онцгой талархал илэрхийлсэн бол бидний зүгээс Монголын волейболын лиг байгуулагдсаны 30 жилийн ойг уламжлан дурсгалын зүйл гардуулжээ.

    Тэмцээнд эрэгтэй 24 баг, эмэгтэй 18 баг оролцож, залуу болон 35–45 насны туршлагатай тамирчид өндөр ур чадвар үзүүлэв. Мөн Улаан-Үдийн волейболын удирдлагуудтай бүс нутгийн хамтын ажиллагааг өргөжүүлэх, дөрвөн хотын тэмцээн зохион байгуулах санал санаачилга яригдсан байна.