Олон улсын уулчдын холбооны 2026 оны мөсөнд авиралтын дэлхийн цомын цувралын шинэ улирлын эхний тэмцээн Өмнөд Солонгосын Чонсон хотод болж өндөрлөв. Тус тэмцээнээс манай тамирчин мөнгөн медаль хүртлээ. Хурдны төрөлд ОУХМ О.Сайханжаргал 19.90 секундын амжилтаар мөнгөн медаль хүртэж, Монголын багийн анхны медалийг авлаа.

    Энэ удаагийн дэлхийн цомын тэмцээнд 18 орны 120 гаруй тамирчин оролцсон юм. Манай улсаас ОУХМ Н.Сэлэнгэ, Н.Хэрлэн, О.Сайханжаргал, Ч.Мандахбаяр, спортын мастер А.Зоригтбаатар Д.Отгонхүү, Э.Дөлгөөн, Ж.Амина гэсэн найман тамирчин оролцсон байгаа.

    Хурдны төрөлд Д.Отгонхүү VI, Н.Хэрлэн XV, А.Зоригтбаатар XVII, Э.Дөлгөөн XXXII, эмэгтэйчүүдээс Н.Сэлэнгэ IV, Ж.Амина XI байрт шалгарлаа. Харин техникийн төрөлд эмэгтэйчүүдээс ОУХМ Н.Сэлэнгэ 36, эрэгтэйчүүдээс Ч.Мандахбаяр мөн 36 дугаар байр эзлэв. Ингэснээр манай тамирчдын дэлхийн цомын эхний гараа өндөрлөж байна.