“Москва-1980” олимпын наадмын мөнгөн медальт, Монгол Улсын гавьяат тамирчин, Жамцыг Даваажав агсны нэрэмжит сонгомол болон чөлөөт бөхийн УАШТ дөрвөн өдөр үргэлжилж өндөрлөв.  УАШТ-ий эхний өдөр сонгомол барилдааны аваргууд тодорсон. Харин  чөлөөт бөхийн  насанд хүрэгчдийн 2026 оны УАШТ-ий сүүлийн өдөр өчигдөр, нэгдүгээр сарын 11-ний ням гарагт  эрэгтэйчүүдийн 92, 97, 125 кг, эмэгтэйчүүдийн 59, 65, 72 кг-ын жингийн барилдаанууд явагдана. Эмэгтэй багийн дүнгээр “Алдар” спорт хороо тэргүүлж, “Хилчин” спорт хороо, “Аваргууд” академийн баг хоёр, гуравдугаар байрт орсон. Эрэгтэй багийн дүнгээр “Хилчин” спорт хороо тэргүүлж, “Алдар” спорт хороо, “Аваргууд” академийн баг удаалав. Багийн нэгдсэн дүнгээр “Алдар” спорт хороо тэргүүллээ.

Х.БОЛОРТУЯАГИЙН ТАВ ДАХЬ ТҮРҮҮ

     Чөлөөт бөхийн 2026 оны насанд хүрэгчдийн УАШТ-ий эмэгтэйчүүдийн 59 кг-ын жинд “Аврагч” спорт хорооны тамирчин, Азийн аварга шалгаруулах тэмцээний мөнгө, хүрэл медальт, ОУХМ, Хүрэлхүүгийн Болортуяа түрүүллээ. Тэрбээр УАШТ-д тав дахь удаагаа түрүүлэв. Энэ жинд “Алдар” спорт хорооны залуу тамирчин Э.Саруул финалдаж, мөнгөн медаль хүртсэн. Түүний хувьд, өнгөрсөн жилийн УАШТ-ээс  анхны хүрэл медалиа гардаж байсан бол энэ удаагийн УАШТ-ээс мөнгө, хүрэл медальтай боллоо. “Хилчин” спорт хорооны тамирчин, ДАШТ-ий хүрэл, Ази тивийн аваргын мөнгө, хошой хүрэл медальт, МУГТ Э.Даваачимэг, өнгөрсөн оны УАШТ-д финалдсан Б.Энхтүвшин нар энэ жингийн хүрэл медалийг гардсан юм.

Эмэгтэйчүүдийн 59 кг-ын дүн:

1. Х.Болортуяа (Аврагч)

2. Э.Саруул (Алдар)

3. Э.Даваачимэг (Хилчин)

3. Б.Энхтүвшин (Хангай хайрхан)

Н.НАРХАЖИД НАСАНД ХҮРЭГЧДИЙН УЛСЫН АВАРГА БОЛЛОО

       Насанд хүрэгчдийн УАШТ-ий эмэгтэйчүүдийн 65 кг-ын жингийн аваргаар “Алдар” спорт хорооны бөх, “U20” насны улсын аварга, армийн дэлхийн аварга, насанд хүрэгчдийн УАШТ-ий хүрэл, “Улаанбаатар опен-2025” тэмцээний хүрэл медальт, ОУХМ Н.Нархажид тодорлоо. Тус жингийн финалд “Хилчин” спорт хорооны тамирчин, насанд хүрэгчдийн дэлхийн аваргын хүрэл, Ази тивийн аваргын хүрэл медальт,  “U-23” ангиллын ДАШТ-ий хошой хүрэл, “Улаанбаатар опен-2025” тэмцээний хүрэл медальт, ОУХМ Э.Гантуяа шалгарсан бөгөөд тэрбээр өнгөрсөн жилийн УАШТ-д мөн үзүүрлэж байв. Хүрэл медалийг Баянгол дүүрэг “Аваргууд” академийн тамирчин Л.Эрдэнэбулган хүртлээ.

Эмэгтэйчүүдийн 65 кг-ын дүн:

1. Н.Нархажид (Алдар)

2. Э.Гантуяа (Хилчин)

3. Л.Эрдэнэбулган (Баянгол дүүрэг “Аваргууд” академи)

З.БОЛОРТУНГАЛАГИЙН ДӨРӨВ ДЭХ ТҮРҮҮ

     МУГТ Ж.Даваажав агсны нэрэмжит 2026 оны насанд хүрэгчдийн УАШТ-ий 72 кг-ын жинд “Хилчин” спорт хорооны тамирчин, Ази тивийн аварга З.Болортунгалаг, “Төв Арж” дэвжээний бөх Э.Одгэрэл нар финалдав. З.Болортунгалаг хэсгийн барилдаанд Э.Одгэрэлд цэвэр ялагдсан ч шигшээ барилдаанд  оноогоор ялж, УАШТ-ий дөрөв дэх түрүүгээ дархалсан юм.

Харин Э.Одгэрэлийн хувьд, улсын аваргын хошой мөнгөн медальтан боллоо. Тэрбээр өнгөрсөн жил 65 кг-ын жинд үзүүрлэж байсан. Өнгөрсөн оны УАШТ-ий энэ жингийн үзүүр бөх Д.Цогзолмаа хүрэл медаль гардан авлаа.

Эмэгтэйчүүдийн 72 кг-ын дүн:

1. З.Болортунгалаг (Хилчин)

1. Э.Одгэрэл (Төв-Арж)

3. Д.Цогзолмаа (Алдар)

Б.БАТ-ЭРДЭНЭ ЗУРГАА ДАХЬ ТҮРҮҮГЭЭ ХҮРТЛЭЭ

     2026 оны насанд хүрэгчдийн УАШТ-ий эрэгтэйчүүдийн 92 кг-ын жинд “Хилчин” спорт хорооны тамирчин, залуучуудын ДАШТ-ий хүрэл, “Улаанбаатар опен-2025” тэмцээний хүрэл медальт, ОУХМ Б.Бат-Эрдэнэ түрүүллээ. Ингэснээр түүний хувьд, насанд хүрэгчдийн УАШТ-ий зургаа дахь алтан медалиа гардаж байна.  “Дархан Хасу FOHOW” клубийн бөх, Азийн аваргын хүрэл медальт, ОУХМ Д.Батзул финалдаж, мөнгөн медаль хүртэв. Түүний хувьд, насанд хүрэгчдийн УАШТ-ий хоёр алт, хүрэл медальтай тамирчин юм. Харин “Алдар” спорт хорооны бөх Ц.Ганбат, “Сүлд” спорт хорооны бөх З.Анхбаяр нар хүрэл медалийн эзэд боллоо.

Эрэгтэйчүүдийн 92 кг-ын дүн:

1. Б.Бат-Эрдэнэ (Хилчин)

2. Д.Батзул (Дархан Хасу FOHOW)

3. Ц.Ганбат (Алдар)

3. З.Анхбаяр (Сүлд)

Г.ГАНХУЯГИЙН ЗУРГАА ДАХЬ ТҮРҮҮ

    МУГТ Ж.Даваажав агсны нэрэмжит чөлөөт бөхийн насанд хүрэгчдийн УАШТ-ий 97 кг-ын жинд “Алдар” спорт хорооны тамирчид болох ОУХМ Г.Ганхуяг, Т.Дэмчигдорж нар финалдлаа. Тус барилдаанд Азийн наадмын хүрэл, Ази тивийн аваргын хошой хүрэл медальт, ОУХМ Г.Ганхуяг 1:0-ээр ялалт байгуулав. Энэ нь түүний хувьд, улсын аваргын зургаа дахь түрүү юм.  “U23” ангиллын Ази тивийн аваргын хошой мөнгөн медальт Т.Дэмчигдорж өнгөрсөн жил 92 кг-д финалдсан бол энэ удаа жин өгсөж зодоглоод ахин финалдаж мөнгөн медаль гардав. “NewGen Team” клубийн тамирчин М.Баяржаргал, “Сүлд” спорт хорооны бөх Д.Саранцогт нар хүрэл медаль хүртлээ. М.Баяржавхлангийн хувьд, хоёр дахь жилээ дараалан хүрэл медаль хүртэв.

Эрэгтэйчүүдийн 97 кг-ын дүн:

1. Г.Ганхуяг (Алдар)

2. Т.Дэмчигдорж (Алдар)

3. М.Баяржавхлан (NewGen Team)

3. Д.Саранцогт (Сүлд)

Б.НАМБАРДАГВА ЧӨЛӨӨТ БӨХИЙН УЛСЫН АВАРГААР ТОДОРЛОО

     Чөлөөт бөхийн насанд хүрэгчдийн УАШТ-ий сүүлийн жин болох 125 кг-ийн жинд Баянгол дүүрэг "Аваргууд" академийн бөх, дэлхийн чансааны оноо олгох "Улаанбаатар опен" тэмцээний мөнгө, “U20” насны ДАШТ-ий хүрэл медальт, “U23” насны Ази тивийн аваргын алтан медальт Батбаярын Намбардагва түрүүллээ. Түүний хувьд, гурав хоногийн өмнө болсон сонгомол бөхийн УАШТ-д мөн аварга болсон юм. Ийнхүү тэрбээр чөлөөт бөхийн УАШТ-нээс анхны алтан медалиа гардлаа.

Тус жингийн мөнгөн медалийг үндэсний бөхийн аймгийн арслан, чөлөөт бөхийн ОУХМ, “Хилчин” спорт хорооны бөх Ч.Алтангэрэл хүртсэнээр хоёр жил дараалан үзүүрлэлээ. “Сүлд” спорт хорооны Э.Өлзийбаяр, “Хилчин” спорт хорооны С.Ган-Эрдэнэ нар хүрэл медалийн эздээр шалгарлаа.

Эрэгтэйчүүдийн 125 кг-ын дүн:

1. Б.Намбардагва (Баянгол дүүрэг "Аваргууд" академи)

2. Ч.Алтангэрэл (Хилчин)

3. Э.Өлзийбаяр (Сүлд)

3. С.Ган-Эрдэнэ (Хилчин).