М.ДАВААБАНДИ СОНГОМОЛ БӨХИЙН УАШТ-Д ХОЁР ЖИЛ ДАРААЛАН ТҮРҮҮЛЛЭЭ

    Сонгомол бөхийн дэлхийн чансааны оноо олгох “Улаанбаатар опен” тэмцээний хүрэл медальт, ОУХМ М.Даваабанди Монгол Улсын хошой аварга боллоо. М.Даваабандийн хувьд, сонгомол бөхийн ДАШТ-ээс ялалт авчирсан анхны монгол тамирчин билээ. Хөнгөн жинд финалдсан “Цаст тайга” клубийн бөх М.Сумьяабазар УАШТ-ээс хошой мөнгөн медальтан боллоо. Энэ жингийн хүрэл медалийг “Хангардь” клубийн тамирчин М.Мөнх-Оргил гардсан.

Сонгомол бөхийн 60 кг-ын дүн:

1. М.Даваабанди (Алдар)

2. М.Сумьяабазар (Цаст тайга)

3. М.Мөнх-Оргил (Хангарди)

17 НАСТАЙ Ц.ОТГОННАСАН 67 КГ-ЫН ЖИНД АВАРГАЛЛАА

    “Цаст тайга” клубийн тамирчин Ц.Отгоннасан 2026 оны сонгомол барилдааны Насанд хүрэгчдийн Улсын аварга шалгаруулах тэмцээний 67 кг-ын жинд 17 насандаа түрүүлж аварга боллоо. Түүний хувьд, сонгомол бөхөөр гурав дахь жилээ хичээллэж байгаа. Харин аваргын төлөө “Хантайшир” дэвжээний тамирчин Э.Ганбаатар барилдаж дэд байр эзэлсэн бол хүрэл медалийг “Байдрагийн хүчтэн” дэвжээний тамирчин Я.Үржинжав, "Налайх" дүүргийн бөх Г.Сэр-Од нар зүүсэн юм.

Сонгомол бөхийн 67 кг-ын дүн:

1. Ц.Отгоннасан (Цаст тайга)

2. Э.Ганбаатар (Хантайшир)

3. Я.Үржинжав (Байдрагийн хүчтэн)

3. Г.Сэр-Од (Налайх)

Б.УУГАНБАЯР СОНГОМОЛ БӨХИЙН УАШТ-Д АНХ УДААГАА ТҮРҮҮЛЭВ

    МУГТ Ж.Даваажавын нэрэмжит сонгомол бөхийн насанд хүрэгчдийн УАШТ-ий 77 кг-ын жинд“Байдрагийн хүчтэн” дэвжээний бөх Б.Ууганбаяр аваргаар тодорлоо. Тэрбээр сонгомол бөхийн УАШТ-д хоёр дахиа зодоглоод аварга болсон нь энэ юм.

Энэ жинд “Төгс” дэвжээний Б.Сүхбат финалдсан бол “Хантайшир” дэвжээний Т.Бямбарагчаа, “Цаст тайга” дэвжээний Н.Оргил нар хүрэл медаль хүртлээ. Н.Оргилын хувьд, өнгөрсөн оны УАШТ-д түрүүлсэн тамирчин билээ.

Сонгомол бөхийн 77 кг-ын дүн:

1. Б.Ууганбаяр (Байдрагийн хүчтэн)

2. Б.Сүхбат (Төгс)

3. Т.Бямбарагчаа (Хантайшир)

3. Н.Оргил (Цаст тайга)

Г.ТӨРБОЛД СОНГОМОЛ БӨХИЙН УЛСЫН ХОШОЙ АВАРГА БОЛЛОО

     “Хилчин” спорт хорооны тамирчин, ОУХМ Г.Төрболд 2026 оны сонгомол бөхийн насанд хүрэгчдийн УАШТ-ий 87 кг-ын жинд түрүүлж хошой аварга боллоо. Тэрбээр 2024 онд мөн түрүүлж байсан юм.  Тэгвэл тус жингийн үзүүрт сонгомол бөхийн 2025 оны улсын аварга, “Цаст тайга” клубийн тамирчин Д.Лхагвасүрэн шалгарч, хүрэл медалийг “Байдрагийн хүчтэн” клубийн бөх ОУХМ Э.Бямбадорж, “Аварга” сургуулийн тамирчин Ц.Тамираа нар хүртлээ.

Сонгомол бөхийн 87 кг-ын дүн:

1. Г.Төрболд (Хилчин)

2. Д.Лхагвасүрэн (Цаст тайга)

3. Э.Бямбадорж (Байдрагийн хүчтэн)

3. Ц.Тамираа (Аварга)

ОУХМ Г.ГАНХУЯГ СОНГОМОЛ БӨХИЙН МОНГОЛ УЛСЫН АВАРГА БОЛЛОО

      Сонгомол бөхийн дэлхийн чансааны оноо олгох “Улаанбаатар опен” тэмцээний хүрэл медальт, чөлөөт бөхийн ОУХМ, үндэсний бөхийн улсын харцага Г.Ганхуяг 97 кг-ын жинд Монгол Улсын аварга боллоо. Энэ жинд “Тэх Мөнх” клубийн тамирчин 17 настай Э.Саруул-Эрдэнэ финалдаж, мөнгөн медаль гардлаа. Э.Саруул-Эрдэнийн тухайд, чөлөөт болон үндэсний бөхөөр хичээллэдэг төдийгүй энэ намар сумын цолтнуудын заалны барилдаанд шөвгөрч шуугиулсан бөх юм.

Хүрэл медалийг “Сүлд” спорт хорооны Д.Саранцогт, “Төгс” дэвжээний Б.Батсүх нар гардлаа.

Сонгомол бөхийн 97 кг-ын дүн:

1. Г.Ганхуяг (Алдар)

2. Э.Саруул-Эрдэнэ (Тэх Мөнх)

3. Д.Саранцогт (Сүлд)

3. Б.Батсүх (Төгс)

СОНГОМОЛ БӨХИЙН ХАМГИЙН ХҮНД ЖИНД Б.НАМБАРДАГВА АВАРГАЛЛАА

     Сонгомол бөхийн 2026 оны насанд хүрэгчдийн Улсын аварга шалгаруулах тэмцээний 130 кг-ийн жинд Баянгол дүүрэг "Аваргууд" академийн бөх, дэлхийн чансааны оноо олгох "Улаанбаатар опен" тэмцээний мөнгөн медальт Батбаярын Намбардагва түрүүллээ. Япон Улсад суралцдаг тэрбээр сонгомол бөхийн УАШТ-д анх удаа оролцож ийнхүү алтан медалийн эзэн болов. Мөнгөн медалийг үндэсний бөхийн аймгийн арслан, чөлөөт бөхийн ОУХМ, “Хилчин” спорт хорооны бөх Ч.Алтангэрэл хүртсэн бол “Сүлд” спорт хорооны Э.Өлзийбаяр, “Хилчин” спорт хорооны С.Ган-Эрдэнэ нар хүрэл медалийн эздээр шалгарлаа.

Сонгомол бөхийн 130 кг-ын дүн:

1. Б.Намбардагва (Баянгол дүүрэг "Аваргууд" академи)

2. Ч.Алтангэрэл (Хилчин)

3. Э.Өлзийбаяр (Сүлд)

3. С.Ган-Эрдэнэ (Хилчин)

БАГИЙН ДҮНГЭЭР "ЦАСТ ТАЙГА" КЛУБ ТЭРГҮҮЛЛЭЭ

     “Москва-1980” олимпын мөнгөн медальт, МУГТ Ж.Даваажав агсны нэрэмжит Сонгомол бөхийн насанд хүрэгчдийн Монгол Улсын аварга шалгаруулах тэмцээний багийн нийлбэр дүнгээр ОУХМ С.Мөнхсүх дасгалжуулагчтай “Цаст тайга” клуб 96 оноогоор тэргүүллээ. Гурав дахь удаагаа зохион байгуулагдаж буй энэхүү тэмцээний дэд байрыг 60 оноогоор МУГТ Г.Мандахнаран дасгалжуулагчтай зэвсэг хүчний БХЯ-ны харьяа “Алдар” спорт хороо эзэлсэн бол гуравдугаар байрыг С.Мөнхдуулдах дасгалжуулагчтай Баянхонгор аймгийн “Байдрагийн хүчтэн” дэвжээ 55 оноогоор тус тус эзлэв.