Холимог тулааны насанд хүрэгчдийн Ази тивийн аварга  шалгаруулах тэмцээн 2026 оны нэгдүгээр сарын 8-11-ний өдрүүдэд БНХАУ-ын Сычуань мужийн Лужоу хотод зохион байгуулагдах гэж байна. Тэмцээнд Азийн 30 гаруй орны баг тамирчин оролцохоор мэдүүлгээ ирүүлээд байгаа юм.

    Монгол Улсыг төлөөлөн Азийн дэвжээнд нийт 14 тамирчин гарах бөгөөд баг тамирчдыг ахлан Монголын холимог тулааны холбооны ерөнхий нарийн бичгийн дарга Г.Дашдаваа болон дасгалжуулагч Г.Чулуунхуяг нар ажиллана.

    Азийн холимог тулааны холбоо “AMMA”)-аас зохион байгуулж буй энэхүү тэмцээнээр “Аичи Нагоя-2026” Азийн зуны спортын XX дугаар наадам болон “Рияд 2026” “Азийн танхимын болон тулааны спортын VI наадам”-уудад оролцох эрхийг олгохоороо онцлогтой болж байна.

    2024 онд Камбож Улсад явагдсан Азийн аваргын тэмцээнээс Монголын холимог тулаанчид нэг алт, нэг хүрэл медаль хүртэж байсан билээ. Тус Азийн аваргын 96 кг-ын жинд өрсөлдсөн ОУХМ Э.Мөнгөншагай Азийн аваргын дэвжээнд эх орныхоо төрийн дууллыг эгшиглүүлсэн бол ОУХМ Б.Алтанчимэг -60 кг-д хүрэл медалийн болзол хангаж байв.