Монгол Улсын биатлоны шигшээ багийн тамирчин, зэвсэгт хүчний 326 дугаар ангийн алба хаагч, ОУХМ, дэд ахлагч Э.Энхсайхан 2025 оны арвандугаар сарын 4-ний өдрөөс эхлэн Австри, Итали, Швейцар, Герман, Норвеги Улсад зохион байгуулагдаж байгаа өвлийн спортын дэлхийн цомын аваргын цуврал тэмцээнүүдэд амжилттай оролцсоор байна.

    Тэрээр маргааш буюу 2026 оны нэгдүгээр сарын 8-ны өдөр Герман Улсад зохиогдох дэлхийн цомын төлөөх ээлжит уралдаанд орон орны шилдэг биатлончидтой өрсөлдөнө. Үргэлжлээд нэгдүгээр сарын 14-ний өдөр мөн уралдана.

    ОУХМ, дэд ахлагч Э.Энхсайханы хувьд "Милан-Кортина 2026" өвлийн олимпын наадамд эрх авах боломж дүүрэн байна. Дэлхийн цомын үзүүлэлтээр эрхээ авч чадаагүй тамирчид хувийн оноогоо ахиулж / IBU Qualifying points / Италийг зорих боломжтой юм. Өнгөрсөн улирлын дараах үзүүлэлтээр Э.Энхсайхан олимпын үлдсэн 12 эрхийн төлөө өрсөлдөж байгаа 20 тамирчнаас 16 дугаар байрт жагсаж байна.

   Жагсаалтыг Молдав Улсын тамирчин Максим Макаров 51.31 оноотой тэргүүлж байгаа бол дэд ахлагч Э.Энхсайхан 126.26 оноогоор 16 дугаар байрт эрэмбэлэгдэж байна. Гэхдээ энэ цаг үед явагдаж байгаа тэмцээнүүддээ сайн оролцож, оноогоо цуглуулж чадвал Монгол Улсын зэвсэгт хүчний алба хаагч өвлийн олимпод оролцох түүхэн боломж тохиох юм.

    “IBU Qualifying points” гэдэг нь тамирчны гүйцэтгэлийг хэмждэг онооны систем юм. Тухайн тэмцээний ялагчаас хоцорсон хугацааг хувиар тооцдог учраас оноо бага байх тусам сайн үзүүлэлт гэж үзнэ. Хэрвээ манай улсын тамирчны хувьд нэгдүгээр сарын 18-ны өдөр хүртэлх Олон улсын биатлоны холбооны дэлхийн цуврал тэмцээнд амжилттай оролцож, хувийн оноогоо 90-100 руу багасгаж чадвал олимпын эрх авах боломж нэмэгдэнэ гэсэн үг.

   Монголын биатлоны шигшээ багийн тамирчид өнгөрсөн зун Беларусь Улсын Раубичи бааз, Казахстан Улсын Шүчинск баазад, өвлийн бэлтгэлээ Австри Улсын Тирол мужид тус тус гүйцэтгэжээ. Шигшээ багт Европын залуучуудын аварга, ОУХМ, дэд ахлагч Э.Энхсайхан болон Б.Анхболд, М.Должинсүрэн, Ж.Гантулга , Х.Сумъяа нар багтсан бөгөөд тэд Беларусь Улсын гавьяат дасгалжуулагч Александр Владимирович Попов болон Зайцев Слав нарын удирдлага дор бэлтгэл сургуулилалтаа гүйцэтгэж, уралдаан тэмцээндээ оролцож байна.