Монголын чөлөөт болон сонгомол бөхийн 2026 оны улирлын эхлэл болж, тухайн жилийн өнгийг тодорхойлох анхны томоохон тэмцээн болох насанд хүрэгчдийн улсын аварга шалгаруулах тэмцээн 2026 оны нэгдүгээр сарын 8–11-ний өдрүүдэд Улаанбаатар хотын Спортын төв ордонд зохион байгуулагдахад бэлэн болоод байна.

    Энэ удаагийн улсын аварга шалгаруулах тэмцээнийг 1980 оны Москвагийн зуны XXII олимпын их наадмын мөнгөн медальт, Монгол Улсын гавьяат тамирчин, алдарт бөх Жамцын Даваажавын нэрэмжит болгон зохион байгуулж буйгаараа онцлогтой. Түүний Монголын бөхийн хөгжилд оруулсан үнэтэй хувь нэмэр, спортын түүхэнд үлдээсэн гавьяа зүтгэлийг хойч үедээ мөнхжүүлж байгаа юм.

    Тэмцээний эхний өдөр буюу нэгдүгээр сарын 8-ны өдөр сонгомол бөхийн төрөлд олимпын зургаан жинд шилдэг тамирчид хүч сорин өрсөлдөж, аваргуудаа тодруулна. Харин нэгдүгээр сарын 9-11-ний өдрүүдэд чөлөөт бөхийн төрөлд эрэгтэй, эмэгтэй нийт 20 жинд улсын шилдгүүд ур чадвар, авхаалж самбаагаа сорин өрсөлдөнө.

   Энэхүү УАШТ нь зөвхөн улсын аваргуудыг тодруулах төдийгүй Монголын шигшээ багийн бүрэлдэхүүн болон чөлөөт, сонгомол бөхийн хөгжлийн чиг хандлагыг тодорхойлох өндөр ач холбогдолтой юм.