Мэргэжлийн сүмогийн 2026 оны нэгдүгээр сарын башёгийн банцүкэ гарсан байна. Шинэ банцүкэд шинэ нэрс цөөнгүй байх юм. Ялангуяа ёкозүна Тэрүнофүжигийн Исэгахама дэвжээний есөн бөх нэрээ сольжээ. Нэрээ сольсон бөхчүүд дотор дархан аварга Г.Өсөхбаярын хүү Ө.Дэмиджамц мөн багтсан байна. Ө.Дэмиджамц саяхныг хүртэл Сэйхакүхо нэртэйгээр барилдаж байсан бол одоо Тошинофүжи нэртэй болжээ.

    Тошинофүжи Ө.Дэмиджамц одоо 25 настай. Тэрбээр 195 сантиметр өндөр, 141 кг жинтэй. Макүшита зиндааны хоёрдугаарт эрэмбэлэгдэж байна. Мэргэжлийн сүмод макүшитагийн 45 дээр эрэмбэлэгдэн барилдаж эхэлснээс хойш таван башёд 5-2, 4-3, 5-2, 5-2, 4-3  гэсэн үзүүлэлттэй барилдсан.

    Одоо дахиад тавиас дээш хувийн ялалт байгуулах юм бол жюүрёо зиндаанд дэвшиж, сэкитори болно. “Исэгахама” дэвжээний 31 бөхийн 29 нь “фүжи” оролцсон нэртэй болоод байна. Маэгаширагийн гурав дээр эрэмбэлэгдсэн Хакүохогийн нэр мөн өөрчлөгдөж, Хакүнофүжи боллоо.

     Нэгдүгээр сарын башёд макүүчи зиндаанд улсын гарьд Д.Рагчаагийн хүү Асахакүрюү Р.Жамьянтогтох анх удаагаа дэвшин барилдах гэж байна. Мөн ирэх башёгийн нэг онцлог нь Украины бөх Аонишики озэзи цолтойгоор барилдана.