Япон Улсын нийслэл Токио хотод жүдо бөхийн “Их дуулга” тэмцээн арванхоёрдугаар сарын 6-7-ны өдрүүдэд болно. Тэмцээнд одоогийн байдлаар 41 орны эрэгтэй 169, эмэгтэй 134, нийт 303  тамирчин өрсөлдөхөө мэдүүлсэн байна.  Манай улсаас 15 жүдочин зодоглоно. Эрэгтэйчүүдийн 60 кг-ын жинд Б.Сүхбат, К.Ёолк, 66 кг-д Б.Эрхэмбаяр, 73 кг-д Л.Анхзаяа, О.Уранбаяр  81 кг-д Н.Жангарай, 90 кг-д Ц.Дагвадорж, +100 кг-д Б.Гончигсүрэн, О.Цэцэнцэнгэл нар  өрсөлдөнө. Харин эмэгтэйчүүдийн 48 кг-ын жинд Ж.Анударь, 52 кг-д М.Нандин-Эрдэнэ, 57 кг-д Л.Сосорбарам, Т.Ариунзаяа, 63 кг-д гавьяат тамирчин Л.Энхрийлэн, Х.Ариунтунгалаг, 78 кг-д О.Хүслэн нар эх орноо төлөөлөн хүч сорино.  Өнөөдөр эмэгтэйчүүдийн 48, 52, 57, 63 кг, эрэгтэйчүүдийн 90, -100, +100 кг-ын жингийн барилдаан явагдана.

ЭМЭГТЭЙЧҮҮДИЙН 48 КГ-ЫН ЖИНД Ж.АНУДАРЬ БАРИЛДАНА

     Эмэгтэйчүүдийн 48 кг-ын жинд 16 жүдочин байна. Манай тамирчин өсвөрийн үеийн ДАШТ-ий мөнгөн медальт, “Душанбе-2025 Гран слам”-ын аварга,  Ж.Анударь “D” хэсгийн нэгдүгээр тойрогт Өмнөд Солонгосын хашир туршлагатай, ахмад тамирчин, PARK Eunlee-тэй таарлаа. Хэрэв түүнийг ялж чадах юм бол хоёрдугаар тойрогт Чилийн 28 настай амаргүй өрсөлдөгч Mary Dee VARGAS LEY, Тайванийн  21 настай Chih-Jou CHIU нарын хэн ялсантай “D” хэсгийн аваргын төлөө барилдах боломжтой болно.

ЭМЭГТЭЙЧҮҮДИЙН 52 КГ-ЫН ЖИНД М.НАНДИН-ЭРДЭНЭ

     Эмэгтэйчүүдийн 52 кг-ын жинд 13 жүдочин байна. Манай улсын өсвөрийн ДАШТ-ий хүрэл медальт, “Улаанбаатар-2025 Гран слам”-ын мөнгөн медальт М. Нандин-Эрдэнэ их чанга сугалаа татсан байгаа. Тэрбээр “А” хэсгийн нэгдүгээр тойрогт Энэтхэгийн 20 настай залуу тамирчин Shraddha Kadubal CHOPADE-тэй барилдана. Түүнийг хэрэв ялж чадах юм бол хоёрдугаар тойрогт олимп, дэлхийн аварга Японы алдарт тамирчин ABE Uta-тай “А”хэсгийн аваргын төлөө барилдах юм.

ЭМЭГТЭЙЧҮҮДИЙН 57 КГ-ЫН ЖИНД Т.АРИУНЗАЯА, Л.СОСОРБАРАМ

     Эмэгтэйчүүдийн 57 кг-ын жинд 23 жүдочин байна. Манай улсын өсвөрийн дэлхийн аварга, өнгөрсөн 2024 оны “Токио-2024 Гранд слам”-ын хүрэл медальт Т.Ариунзаяа, залуучуудын дэлхийн аварга, залуучуудын олимпын мөнгөн медальт ОУХМ Л.Сосорбарам нар барилдана.

      ОУХМ Тэрбишийн Ариунзаяа  их чанга сугалаа татсан. Тэрбээр “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Японы  Akari OMORI, Энэтхэгийн Yamini  MOURYA нарын хэн ялсантай барилдах юм. Хэрэв ялалт авч чадвал “А” хэсгийн аваргын төлөөх барилдааныг  дэлхийн аварга Гүржийн Eteri LIPARTELIANI-тай хийх магадлал өндөртэй байгаа.

      ОУХМ Лхагвасүрэнгийн Сосорбарам мөн чанга сугалаа татсан байгаа. Тэрбээр  “С” хэсгийн нэгдүгээр тойрогт Гүржийн Nino LOLADZE-тэй барилдана. Түүнийг ялах юм бол хоёрдугаар тойрогт  Японы амаргүй өрсөлдөгч  Momo TAMAOKI-тай таарна.

ЭМЭГТЭЙЧҮҮДИЙН 63  КГ-ЫН ЖИНД Л.ЭНХРИЙЛЭН, Х. АРИУНТУНГАЛАГ

    Эмэгтэйчүүдийн 63 кг-ын жинд 23 жүдочин байна. Манай улсаас ДАШТ-ий хошой хүрэл медальт, МУГТ Л. Энхрийлэн, залуу тамирчин Х.Ариунтунгалаг нар барилдана.  Гавьяат тамирчин Л.Энхрийлэн “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Өмнөд Солонгосын KIM Yeji-тэй барилдана. Түүнийг ялж чадах юм бол “В” хэсгийн аваргын төлөөх барилдааныг Японы Narumi  TANIOKA, Австрийн  Lubjana PIOVESANA, Болгарын Yoana MANOVA нарын хэн ялсантай хийх болно.

    Залуу тамирчин Х.Ариунтунгалаг  “D” хэсгийн нэгдүгээр тойрогт Өмнөд Солонгосын KIM Jisu-тэй таарсан байгаа. Түүнийг хэрэв ялж чадах юм бол хоёрдугаар тойрогт Бразилын Nauana SILVA-тай барилдана.

ЭРЭГТЭЙЧҮҮДИЙН 90 КГ-ЫН ЖИНД Ц.ДАГВАДОРЖ БАРИЛДАНА

     Эрэгтэйчүүдийн 90 кг-ын жинд 23 жүдочин байна. Манай улсаас залуу тамирчин Цэрэндуламын Дагвадорж барилдана. Тэрбээр “С” хэсгийн нэгдүгээр тойрогт Тайванийн Peng-Yu CHEN-тэй таараад байгаа. Хэрэв түүнийг ялж чадах юм бол хоёрдугаар тойрогт Японы Goki TAJIMA-тай барилдана.

 ЭРЭГТЭЙЧҮҮДИЙН +100 КГ-ЫН ЖИНД Б.ГОНЧИГСҮРЭН, О.ЦЭЦЭНЦЭНГЭЛ

     Эрэгтэйчүүдийн +100 кг-ын жинд 20 жүдочин байна. Манай улсаас “Улаанбаатар Гранп слам” болон “Абу Даби Гран слам”, “Чиндао Гран при”-гийн аварга, ОУХМ Батхуягийн Гончигсүрэн, ОУХМ Одхүүгийн Цэцэнцэнгэл нар барилдана.

     ОУХМ Б.Гончигсүрэн “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Гүржийн Irakli DEMETRASHVILI, Египэтийн Mohamed ABORAKIA  нарын хэн ялсантай  барилдана. Хэрэв ялалт авч чадвал “В” хэсгийн аваргын төлөөх барилдааныг Японы OTA Hyoga-тай хийнэ.

      ОУХМ О.Цэцэнцэнгэл “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт дэлхийн аварга Гүржийн Guram TUSHISHVILI-тэй барилдах байсан боловч Гурам Тушишвили барилдахгүй болсон учир “С” хэсгийн аваргын төлөөх барилдааныг Японы Kazuya SATO, ОХУ-ын Valerii ENDOVITSKII, Гайнын  Moustapha FOFANA  нарын хэн ялсантай хийнэ.