Өмнөд Солонгосын Умард Кёнсан мужийн Ысан сумын спортын ордонд Солонгосын үндэсний бөхийн олон улсын тэмцээн боллоо. Тус тэмцээнд Монгол Улсын баг тамирчид амжилттай оролцсон байна. Солонгосын Үндэсний бөхийн холбооноос жил бүр зохион байгуулдаг тус тэмцээнийг энэ жил Ысан сумын Үндэсний бөхийн холбоо болон “Ысан” Спортын ордон хамтран зохион байгуулав.

   Тэмцээнд нийт найман орны 90 гаруй мэргэжлийн шилдэг тамирчид оролцсон. Монгол Улсаас улсын заан М.Өсөхбаяр дасгалжуулагчаар ахлуулсан 12 тамирчин оролцлоо. Олон улсын тамирчдын сонгон шалгаруулалтыг ерөнхий зохион байгуулагч Өмнөд Солонгосын Үндэсний бөхийн холбоо явуулж, олон орны тамирчид Солонгос үндэсний бөхийн арга барилаар хүч сорин барилдав. Тэмцээний дүнгээр Монгол Улсын Улсын арслан Э.Батмагнай IV байрт, эмэгтэйчүүдийн төрөлд Ц.Сүнжидмаа II байрт орж тус тус амжилт үзүүлэв.