Өмнөд Солонгосын Улсан хотод 2025 оны аравдугаар сарын 29-нөөс арваннэгдүгээр сарын 4-ний өдрүүдэд уламжлалт харвааны дэлхийн цомын аварга шалгаруулах тэмцээн болж байна. Тус дэлхийн цомын тэмцээний эмэгтэйчүүдийн 90 м-ийн төрөлд Үндэсний сурын спортын мастер Бадарчийн Отгонжаргал хүрэл медаль хүртлээ.

     Энэ удаагийн (KOREA ULSAN-2025 Traditional Archery World Cup) шалгаруулах тэмцээнд Монгол Улсаа төлөөлж 40 тамирчин оролцсон. Тэмцээн 30 м, 70 м, 90 м, 145 м-ийн зайд баг, ганцаарчилсан төрлөөр 12 багц медалийн төлөө дөрвөн өдөр өрсөлдсөн.

    Манай улсаас Үндэсний сурын “Аймгийн онч харваач”, спортын мастер, Уламжлалт харвааны улсын мэргэн Бат-Эрдэнийн Ганзориг 30 м, 70 м-ийн төрөлд хошой алтан медаль хүртэж тус тусын зайн төрлийн дэлхийн цомын аварга болсон. Бүх зайн нийлбэр дүнгээр “Гран при” шагнал хүртсэн байна.