Монголын үндэсний бөхийн холбооноос сар бүр уламжлал болгон зохион байгуулдаг сумын цолтон болон бөхчүүдийн 128 дахь удаагийн барилдаанд 576 бөх уран мэх, авхаалж самбаа сорин өрсөлдөв. Тус барилдаанд Увс аймгийн Баруунтуруун сумын харьяат, "Хилчин" спорт хороо, ХЦ-0208 анги, “ Янжка'с Терафи” ХХК-ийн  бөх, сумын начин Эрдэнэсүрэнгийн Ганболд гурав дахиа түрүүллээ

     Өмнөговь аймгийн Ноён сумын харьяат, “Түвшин Наран” ХХК-ийн  бөх, сумын заан Отгонбаатарын Учралбаяр анх удаагаа үзүүрлэв.  Гуравт Баянхонгор аймгийн Жинст сумын харьяат, сумын заан О.Дондов шалгарлаа. Тавд Завхан аймгийн Эрдэнэхайрхан сумын харьяат, “Эв Монгол” клубийн бөх, сумын заан Д.Нарантулга,  Дорноговь аймгийн Улаанбадрах сумын харьяат, “Эв Монгол” клубийн бөх, сумын заан Н.Батсуурь нар шалгарав.

     Есөд Өмнөговийн заан С.Баярбаатар, Архангайн заан О.Цэрэнпунцаг, Завханы заан Б.Цэнд-Очир, Баян-Өлгийн заан Б.Жарданбек нар үлдэв. "Үнэнч үзэгчдийн нэрэмжит дайчин барилдааны шагнал"-ыг Дорноговь аймгийн Улаанбадрах сумын заан Наранбатын Батсуурьд, "Уран барилдааны шагнал"-ыг сумын заан О.Дондовт улсын заан Ц.Гомбодоржийн охин Орхонсэлэнгэ гардуулан өгөв.

     "Цолд ойрхон бөх"-ийн шагналыг сумын заан С.Баярбаатарт аймгийн заан Н.Жамьянсүрэнгийн ач охин, "Янжка'с терафи" ХХК-ийн захирал Д.Янжиндулам нар тус тус гардуулсан юм. Дараагийн барилдаан ирэх долоо хоногийн бямба, ням гарагт  “Алтан цом”-ын төлөөх шилдэг найман багийн эхний тойргийн барилдаануудаар үргэлжилнэ.