​Монгол Улсын Ерөнхийлөгчийн Биеийн тамир, спортын зөвлөх Ш.Амарсайхан 2025 оны аравдугаар сарын 15-ны өдөр Катар Улсад ажиллаж, тус улсын Спорт, залуучуудын яамны Төрийн нарийн бичгийн дарга Ясир бин Абдулла бин Ахмед Аль-Жамал-тай уулзаж, хоёр улсын спортын салбарын хамтын ажиллагааны талаар санал солилцохын зэрэгцээ Катар улсын “Aspire Academy”-тай танилцав.

    Уулзалтаар талууд спортын салбарт хамтран ажиллах тухай Монгол, Катарын Засгийн газар хоорондын хэлэлцээрийг ойрын хугацаанд эцэслэн байгуулахаар боллоо. Катар Улсыг гадаадын улс орнуудад сурталчлан таниулах хүрээнд спортын дипломат ажиллагаа явуулж буй туршлагаас суралцах, хоёр улсын үндэсний шигшээ баг, тамирчдын хооронд хамтарсан бэлтгэл болон техникийн ажилтан, багш, дасгалжуулагчдын хооронд мэргэжил дээшлүүлэх хөтөлбөрийг зохион байгуулах юм.

    Хоёр улсын спортын холбоо хооронд хамтын ажиллагааг эхлүүлэх, залуучуудад чиглэсэн төсөл, хөтөлбөр хэрэгжүүлэх зэрэг тодорхой асуудлуудаар санал солилцож, хамтран ажиллахаар тохиров. Мөн Зөвлөх Ш.Амарсайхан Катар Улсад ажиллах үеэр дэлхийн хамгийн том спортын академиудын нэг болох Катар Улсын “Aspire Academy”-д зочилж, тус байгууллагын дэд захирал Али Салем Афифа-тай уулзан менежмент, үйл ажиллагаатай нь дэлгэрэнгүй танилцлаа.