Улаанбаатар хотноо 2025 оны аравдугаар сарын 20-21-ний өдрүүдэд Төв Азийн орнуудын оюутны спортын байгууллагын удирдах ажилтны олон улсын зөвлөгөөн болно. Хурлын үйл ажиллагаа Улаанбаатар зочид буудалд болох юм. Хурлыг Ази тивийн оюутны спортын холбоо, Олон улсын оюутны спортын холбоо, Монголын оюутны спортын холбооноос хамтран зохион байгуулж байна.

     Хурлаар төв Азийн орнуудын оюутны спортын холбоодын үйл ажиллагааны тухай илтгэл, мэдээллийг сонсох бөгөөд тухайн бүс нутагт оюутны спорт хэрхэн хөгжиж байгаа, хүндрэл ба бэрхшээл, оюутны бие бялдрын хүмүүжил, оюутны дунд явагдаж байгаа биеийн тамир спортын арга хэмжээ, оюутны спортын амжилт, бүс нутгийн тамирчдын тив, дэлхийн тэмцээн, наадамд оролцох оролцоог нэмэгдүүлэх зэрэг олон талын асуудлыг хөндөн ярилцах юм.

    Тус хуралд оролцохоор төв Азийн Казахстан, Узбекстан, Киргизстан, Тажикстан, Туркменстан улсын оюутны спортын холбооны төлөөлөгчид хүрэлцэн ирнэ. Хурлын үйл ажиллагааг удирдахаар Ази тивийн оюутны спортын холбооны төлөөлөгчид нь БНХАУ, Сингапур улсаас ирж байна.

    Хурлын үйл ажиллагаанд дараагийн бүс нутгийн хурлыг зохион байгуулахаар нэр дэвшиж байгаа зүүн Азийн бүсийн төлөөлөл Хятадын Тайвань, Өмнөд Азийн төлөөлөл болох Тайланд Улсын оюутны спортын холбооны төлөөлөгчид оролцоно. Манай улсыг төлөөлөн Монголын оюутны спортын холбооны ерөнхийлөгч Д.Баясгалан, ерөнхий нарийн бичгийн дарга Ч.Эрдэнэтуяа, МОСХ-ны Удирдах зөвлөлийн зарим гишүүд хурад орно.

    Ийнхүү арван орны 30 гаруй төлөөлөгчдийг хамарсан Ази тивийн оюутны спортын холбооны бүсийн анхдугаар хурлыг ийнхүү Монгол Улс санаачлан хүлээн авч байгаа юм. Цаашид Азийн бүс нутаг бүрт явагдах юм. Энэ хуралд тухайн орны биеийн тамир, спортын удирдах байгууллагын ажилтан, биеийн тамирын их сургуулийн ректор, захирлууд, төрийн бус байгууллагын төлөөлөгч, эрдэмтэн судлаачид, бизнесийн төлөөллийн бүрэлдэхүүнтэй оролцож байна. Энэхүү арга хэмжээний үеэр Ази тивийн оюутны спортын холбооны эмнэлгийн хорооны гишүүдийн хурал болно.