Монгол Улсын Ерөнхийлөгч Ухнаагийн Хүрэлсүх Бүгд Найрамдах Энэтхэг Улсад хийж буй төрийн айлчлалын хүрээнд Монголын иогчдын холбоо Монгол, Энэтхэг хоёр улс иогийн чиглэлээр хамтын ажиллагаагаа шинэ шатанд гаргаж, “Иогийн сургалт, судалгааны хамтын ажиллагааг хөгжүүлэх тухай санамж бичиг”-т гарын үсэг зурлаа.

   Энэхүү айлчлалын хүрээнд Монголын иогчдын холбоо (MYF) болон Энэтхэгийн Эрүүл мэндийн яамны дэргэдэх “Морэржи Десай иогийн үндэсний хүрээлэн” (MDNIY) хооронд “Иогийн сургалт, судалгааны хамтын ажиллагааг хөгжүүлэх тухай санамж бичиг”-т гарын үсэг зурсан нь хоёр улсын боловсрол, эрүүл мэнд, спорт, соёлын салбарын хамтын ажиллагаанд шинэ хуудас нээж байна.

   Санамж бичгийн хэрэгжилтэд үнэтэй дэмжлэг, туслалцаа үзүүлсэн Монгол Улсад суугаа Энэтхэг Улсын Элчин сайдын яам, India in Mongolia (Embassy of India, Ulaanbaatar), Энэтхэг Улсад суугаа Монгол Улсын Элчин сайдын яам,  Embassy of Mongolia, New Delhi, India, Монгол Улсын Ерөнхийлөгчийн Тамгын газар болон Гадаад хэргийн яам, Монголын Худалдаа Аж Үйлдвэрийн танхимд Монголын иогчдын холбооноос гүн талархал илэрхийллээ.

   Хамтын ажиллагааны хүрээнд дараах чиглэлүүдийг хэрэгжүүлэхээр тохиролцов. Үүнд иогийн чиглэлээр академик болон судалгааны хамтын ажиллагаа өрнүүлэх. Иог, Аюурведийн уламжлалт зарчмыг орчин үеийн анагаах ухаантай уялдуулах судалгаа, нотолгоонд суурилсан удирдамж боловсруулах юм.

   Мөн иогийн сургалт, лекц, семинар, хурал, арга хэмжээг хамтран зохион байгуулах. Монгол Улсад иогийн аюулгүй хэрэглээг дэмжих, олон нийтэд зөв ойлголт түгээх болно. Иогийн боловсролын хөтөлбөр, сургалтын стандарт, үнэлгээний тогтолцоог боловсронгуй болгоно. Үүнээс гадна судлаач, багш, оюутан, мэргэжилтнүүдийн харилцан солилцоог дэмжиж, чадавхыг бэхжүүлэх юм. Иогийн сургалтын төвүүдийн төгсөгчдийг Yoga Certification Board (YCB)-ийн шалгуурт нийцүүлэн үнэлэх, магадлан итгэмжлэх үйл явцыг дэмжинэ.

    Энэхүү хамтын ажиллагаа нь Монгол Улсад иогийн шинжлэх ухаанд суурилсан сургалт, судалгаа, практикийг хөгжүүлэх, иргэдийн эрүүл мэндийг дэмжих, боловсролын чанарыг сайжруулахад чухал хувь нэмэр оруулах юм. Мөн хоёр улсын уламжлалт мэдлэг, соёлын үнэт өвийг хуваалцаж, цаашдын түншлэлийн бат бөх суурийг тавьж байна.