Монголын холимог тулааны холбооны Шүүгчдийн зөвлөлийн гишүүн, олон улсын зэрэглэлийн шүүгч, “Үй цай” сургуулийн “King panda boxing& MMA” клубийн дасгалжуулагч Чинбатын  Бат-Амгалан "БАХРЕЙН 2025" Азийн залуучуудын III наадмын холимог тулааны тэмцээнд шүүгчээр ажиллахаар уригдаад байна.

    Ази тивийн 45 орны 4000 гаруй тамирчин хуран цуглах Азийн залуучуудын III наадмын холимог тулааны төрөл аравдугаар сарын 22-25-ны өдрүүдэд Бахрейн Улсын нийслэл Манама хотын "Exhibition World Bahrain Hall" ордонд явагдах юм.

    Сүүлийн дөрвөн жилийн хугацаанд тулааны спортын төрлүүдээр нийт 30 гаруй улсын аварга тамирчдыг бэлтгэн гаргаад байгаа шүүгч, дасгалжуулагч Ч.Бат-Амгалан нь "JCK MMA 2023", "Манила Опен 2024", Ази тивийн 2025 оны залуучуудын аварга шалгаруулах тэмцээн зэрэг холимог тулааны олон улсын тэмцээнүүдэд шүүгчээр ажиллаж байсан туршлагатай мэргэжилтэн юм.