Гүрж Улсын Цибеле хотноо есдүгээр сарын 27-28-ны өдрүүдэд гараар татах хүчний дэлхийн аварга шалгаруулах тэмцээн болсон билээ. ДАШТ-ий мастерс болон насанд хүрэгчдийн нээлттэй ангиллын төрөлд хос алтан медаль хүртэж, дэлхийн аварга болсон Даваажавын Наранцэцэгтэй ярилцлаа. Тэрбээр Монголын гараар татах хүчний холбоо,  УБТЗ-ын Татах хэсэг дахь “Хоёр загал” клубийн тамирчин юм.

-Гараар татах хүчний дэлхийн аварга болсонд баяр хүргэе.

      -Баярлалаа

-Дэлхийн аваргаас хос алтан медаль хүртсэн, ямар хоёр төрөлд оролцож аварга болов?

       -Гүрж Улсад зохион байгуулагдсан дэлхийн аварга шалгаруулах тэмцээнээс 45-50 насны мастер ангилалд нэг алтан медаль, мөн насанд хүрэгчдийн нээлттэй ангилалд дахин нэг алтан медаль тус тус хүртэж дэлхийн аваргын хос алтан медальтай болсон.

  -Юуны өмнө манай уншигчдад өөрийгөө танилцуулахгүй юу?

         -Намайг Даваажавын Наранцэцэг гэдэг. Би одоо 49 настай. УБТЗ-ын Татах хэсэгт ажилладаг.

-Гараар таталтын спортын ямар зэрэг , цолтой тамирчин бэ?

       -Манай гараар татах хүчний спортын холбоо байгуулагдаад удаагүй байна. Тийм болохоор эмэгтэйчүүдийн спортын цол, зэргийг 2026 оноос өгөхөөр яригдаж байгаа. Эрэгтэй тамирчдын спортын цол, зэргийг энэ жилээс олгоно. Холбооноос гараар татаж, өргөх норм нормативыг энэ жилээс гаргасан байгаа.

-Одоо ямар клуб, нийгэмлэгт харьяалагдаж байгаа юу?

      -УБТЗ-ын Татах хэсэг дахь “Хоёр загал” клубийн Хүрэлбаатар багшийнхаа удирдлага доор бэлтгэл сургуулилалтаа хийдэг.

 -Аль аймаг, хотод төрж, өссөн бэ?

      -Би Архангай аймгийн Батцэнгэл суманд төрж, өссөн.

-Гараар татах хүчний спортын төрлөөр хэд дэх жилдээ хичээллэж байгаа вэ?

       -Анх 2023 оны цомын аварга шалгаруулах анхдугаар тэмцээн дээр  27.5 кг-ыг өргөж хүрэл медаль хүртэж байсан. Түүнээс хойш гараар татах хүчний спортоор хичээллэх болсон. 2024 онд улсын аварга болон цомын аваргын тэмцээнээс тус бүр мөнгөн медаль хүртсэн. 2025 оны УАШТ болон цомын аварга шалгаруулах тэмцээн дээр 40 кг-ыг өргөж тус тус алтан медаль хүртсэнээр дэлхийн аваргын тэмцээнд оролцох эрхээ авсан юм аа.

-Өмнө нь өөр, ямар спортын төрлөөр хичээллэж байсан бэ?

      -2019 оноос фитнесээр тогтмол хичээллэж эхэлсэн. 2023 онд Өвөрхангай аймгийн модон барилдааны тэмцээнд хоёрдугаар байрт орж мөнгөн медаль. 2024 онд Архангай аймагт зохион байгуулагдсан баруун бүсийн аварга шалгаруулах тэмцээнд нэгдүгээр байр эзэлж байсан.

-Өөрийгөө гартаа хэр тэнхээтэй гэж боддог вэ?

       -Ер нь хүчтний өлгийн нутаг Архангай аймгийн Батцэнгэл сумын хүн болохоор хүчтэй байдаг байлгүй дээ, хэ хэ хэ.

-Гараар таталтын спортод гарын хүчнээс гадна техник чухал байдаг уу?

     -Тийм ээ, мэдээж техник чухал байлгүй яах вэ.

-Анх гараар татах хүчний спортыг сонирхож хичээллэх болсон шалтгаан юу байв?

      -Анх улсын аварга шалгаруулах тэмцээнээс хүрэл медаль хүртсэн нь надад энэ спортоор тууштай хичээлэх урам зориг, хүсэл сонирхлыг төрүүлсэн.

 -Энэ спорт Монгол Улсад шинээр хөгжиж байгаа спортын төрөл үү?

      -Монгол Улсад анх 2019 оноос хөгжиж эхэлсэн спорт.

-Пауэрлифтинг, хүчний гурван төрөлтөөс ялгагдах онцлог юу байдаг вэ?

      -Ялгагдах онцлог нь тамирчин, шүүгчийн дохиогоор өргөж, буулган дал, нуруу, толгой салгахгүйгээр өргөлтийг гүйцэтгэдэг онцлогтой.

 -Гараар таталтын спортод хэдэд төрөл ангилал байдаг бол?

      -Ер нь бол нилээн олон төрөл ангилал байдаг. Жишээ нь штангны гол шулуун болон тахир гол, тахир нь арай бага голтой зэрэг байдаг. Манай холбоо зөвхөн тахир гол (W)-оор өргөдөг.

-Өөрөө хэдэн килограммын жинд дэлхийн аварга болсон бэ?

      -Би -67.5 кг-ын жингийн ангилалд өрсөлдсөн. Тэмцээн дээр 41 кг-ыг өргөж дэлхийн аварга болсон.

 –Гараар татах спортоор хичээллэсэн үеэс хойших тив, дэлхийн томоохон амжилтаасаа сонирхуулахгүй юу?

       -Тив, дэлхийн томоохон амжилт гэвэл хамгийн анхны дэлхийн аварга болсон эмэгтэй тамирчин болж, хос алтан медаль хүртлээ.

-Танай холбооноос жилд хэдэн тэмцээн зохион байгуулдаг вэ?

      -Манай холбооноос жилд хоёр удаа улсын аварга шалгаруулах тэмцээнийг зохион байгуулдаг. Мөн цомын аварга шалгаруулах тэмцээнийг хийдэг.

-Жилд олон улс, тив, дэлхийн хэдэн тэмцээнд оролцдог вэ?

      -ДАШТ миний анхны тэмцээн байсан. Монгол Улсаа төлөөлөн оролцож, гараар татах хүчний анхны эмэгтэй дэлхий аварга тамирчин болсондоо баяртай байна.

-Одоо дараагийн оролцох ямар тэмцээнүүд хүлээж байгаа вэ?

     -2026 онд манай улсад Евро-Азийн аварга шалгаруулах тэмцээн зохион байгуулагдахаар болсон. Тэр тэмцээнд амжилттай оролцохоор бэлтгэж байна. Мөн энэ завшааныг ашиглан дэлхийн аваргын тэмцээнд оролцоход минь намайг дэмжиж тусалсан УБТЗ-ын Татах хэсгийн хамт олон болон багш Хүрэлбаатар, МГТХХ-ны ерөнхийлөгч А.Чингүүн, ОУХМ Соёлдэлгэр нартаа баярлаж, талархсанаа илэрхийлье.