Узбек кураш, казах кураш бөх, бүстэй барилдааны улсын аварга шалгаруулах тэмцээн тавдугаар сарын 11-14-ний өдрүүдэд явагдаж өндөрлөв. Тус УАШТ-д 24 байгууллагын 600 гаруй тамирчин хурд, хүч авхаалж самбаагаа сорин өрсөлдсөн юм. УАШТ-ий эмэгтэйчүүдийн 52 кг-ын түрүүлж, алтан медаль хүртсэн Өмнөговь аймгийн тамирчин, ОУХМ Ганбатын Саруулбуянтай ярилцлаа.

-Кураш бөхийн УАШТ-д түрүүлж, алтан медаль хүртсэнд баяр хүргэе.

      -За баярллаа. Та сайн байна уу.

-Миний дүү өөрийгөө танилцуулахгүй юу?

     -Намайг Ганбатын Саруулбуян гэдэг. Бүстэй бөхийн олон улсын хэмжээний мастер, Чөлөөт бөхийн спортын мастер цолтой.

-Аль нутгийн хүүхэд вэ?

      -Би Өмнөговь аймгийн Даланзадгад суманд төрж өссөн.

-Одоо хэдэн настай, ямар сургуульд сурч байгаа вэ?

        -Энэ жил 24 нас хүрч байгаа. Үндэсний биеийн тамирын дээд сургуулийг Биеийн тамирын багш, спортын арга зүйч мэргэжлээр төгссөн. Одоо Өмнөговь аймагтаа, нутагтаа Даланзадгад сумын ерөнхий боловсролын Байгалийн ухааны сургалттай 6-р дунд  сургуульд биеийн тамирын багшаар ажилладаг.

-Бөхийн үндсэн суурь нь, жүдо, самбо, жюү жицү, чөлөөт бөх гээд ямар бөхийн төрөл байгаа вэ?

      -Анх дунд сургуулийн есдүгээр ангид сурч байх үедээ аймгийнхаа спорт хорооны чөлөөт бөхийн дугуйланд орж байсан.

-Бөхийн спортоор хэд дэх жилдээ хичээллэж байна вэ?

    -Чөлөөт бөхөөр 8-9 жил хичээллэж байна. Анх секцэнд орсон цагаасаа хойш бөхийн спортод дур сонирхолтой болж, одоо хүртэл хичээллээд явж байна.

-Ямар клубийн, хэн багшийн шавь вэ?

      -Өмнөговь аймгийн Биеийн тамир спорт хорооны дасгалжуулагч аймгийн харцага, чөлөөт бөхийн олон улсын хэмжээний мастер Ц. Ганзориг багшийнхаа хажууд анх юу ч мэдэхгүй хүүхэд байхаас өдийг хүртэл бэлтгэл сургуулилалтаа ханган явж байна.

-Бөхийн спортыг сонгож, хичээллэх болсон шалтгаан юу байсан бэ?

       -Бөхийн спорт бусад спортыг бодоход хүнээс гарч болох бүх ухаан тэсвэр тэвчээр хүндлэл хайр багтдаг юм шиг санагддаг. Тийм ч учраас бөхийн спортод өөрийн эрхгүй татагдаад орчихсон. Дээд сургуулиа төгсөөд барилдахгүй гэж бодсон. Гэтэл бөхийн спортоо хаяж чаддагүй. Одоо хүртэл хичээллээд л явж байна.

-Кураш бөхийн УАШТ-ий хэдэн кг-ын жинд  хэдэн барилдаан хийж түрүүлэв ээ?

    -Энэ 2025 оны насанд хүрэгчдийн кураш бөхийн улсын аварга шалгаруулах тэмцээнд 52 кг-ын жинд барилдсан. УАШТ-д гурван барилдаан хийж алтан медаль хүртсэн.

 -Узбек, Казах кураш, бүстэй барилдааны төрөл манай үндэсний бөхтэй ойролцоо босоо барилдаантай байдаг нь байх аа?

    Тийм ээ, кураш, бүстэй бөх ер нь манай үндэсний бөхтэй тун төстэй барилдаантай. Барьц мэхний хувилбар гээд олон адил, төстэй зүйлүүд байдаг.

-Энэ удаагийн УАШТ-ий хамгийн хүч, ширүүн өрсөлдөгч хэн байсан бэ?

      -Би кураш бөхийн 52 кг-ын жинд,  бүстэй бөхийн 55 кг-ын жинд барилддаг. Гэхдээ бие жижигтэй болохоор жиндээ хүрдэггүй. Биеийн өндөр, жингийн ялгаанаас болоод ер нь бүх өрсөлдөгч нар хүчтэй, ширүүн өрсөлдөөн өрнүүлж байсан.  

-Чөлөөт бөхөөр хичээллэсэн үеэс хойших томоохон амжилтаасаа сонирхуулахгүй юу?

         -Чөлөөт бөхөөр хичээллээд 8-9 жил болох хугацаанднэрэмжит тэмцээнүүдээс медаль хүртэж байсан. Мөн оюутны улсын аваргын мөнгө, хүрэл, “U23” ангиллын залуучуудын УАШТ-ээс хүрэл медаль хүртэж байсан.

-Энэ 2025 онд гадаад, дотоодын ямар томоохон тэмцээнд оролцох вэ?

         -Энэ 2025 онд кураш, бүстэй бөхийн дэлхийн аварга шалгаруулах тэмцээнд  өмнөх амжилтаа ахиулан оролцох зорилттой бэлтгэлдээ орж байгаа.