Монголын жүдо бөхийн холбооны 2025 оны насанд хүрэгчдийн улсын аварга шалгаруулах тэмцээн өнөөдөр эхэлж байна. “Лос Анжелес-2028” олимпын мөчлөгийн салхийг хагалж Монголын жүдочид эрэгтэй, эмэгтэй 14 жингийнхээ аваргаа тодруулах гэж байгаа юм. Энэ удаагийн эрэгтэйчүүдийн 48, эмэгтэйчүүдийн 33, багийн 11 дэх удаагийн УАШТ-д 47 клубийн эрэгтэй 212, эмэгтэй 101, нийт 313 тамирчин барилдах мэдүүлгээ өгч, бүртгүүлсэн байна. УАШТ нэгдүгээр сарын 10-12-ны өдрүүдэд “Монгол бөхийн өргөө”-нд болно.

     Тив, дэлхий, олимпын тавцанд улсынхаа нэрийг цуурайтуулсан шилдэг жүдочдын гал гарсан өрсөлдөөн биднийг хүлээж байгаа. Эмэгтэйчүүд 48, 52, 57, 63, 70, -78, +78 кг-ын жингийн ангилалд өрсөлдөнө. Эрэгтэйчүүдийн тэмцээн 60, 66, 73, 81, 90, -100, +100 кг-ын жингийн ангиллаар зохион байгуулагдана. Тэмцээний сүүлийн өдөр багийн барилдаан явагдаж энэ оны УАШТ өндөрлөнө.

    Шинэ олимпын дөрвөн жилийн циклийн мөчлөг эхэлж байгаа учир шинэ залуу тамирчдын давалгаа эхэлсэн улсын аварга болох байх. Энэ удаагийн 2025 оны УАШТ-д “Парис-2024” олимпын мөнгөн медальт, дэлхийн аварга, МУГТ Б.Баасанхүү, “Токио-2020” олимпын хүрэл медальт, дэлхийн аварга МУГТ Ц.Цогтбаатар, ДАШТ-ий хошой хүрэл медальт МУГТ Ё.Басхүү, МУГТ Л.Энхрийлэн, ДАШТ-ий мөнгөн медальт, ОУХМ Э.Ариунболд, ДАШТ-ий хүрэл медальт ОУХМ Л.Анхзаяа, УАШТ-ий хошой аварга ОУХМ Б.Сүхбат, өсвөрийн дэлхийн аварга ОУХМ Т.Ариунзаяа нар хэрхэн барилдах нь сонирхол татаж байгаа.

    Монголын жүдочид 1989 оноос хойш ДАШТ-ээс зургаан алт, дөрвөн мөнгө, 21 хүрэл, нийт 31 медалийг хүртээд байна. Дэлхийн аваргын анхны медалийг монголын жүдочдоос анх Югослав Улсад болсон “Белград-1989” ДАШТ-ээс Хөдөлмөрийн баатар, ардын багш, МУГТ Одвоогийн Балжинням 95 кг-ын жинд мөнгөн медаль, МУГТ Дашгомбын Баттулга 60 кг-ын жинд хүрэл медаль хүртэж байлаа. Түүний дараа Монголын эмэгтэй жүдочдоос анх түрүүн Египет Улсад болсон “Кайр-2005” ДАШТ-ий 57 кг-ын жинд МУГТ Хишигбатын Эрдэнэт-Од хүрэл медаль хүртэж байв.

     Харин Монголын жүдочдоос анхлан дэлхийн аварга болж шинэ түүхийг бичсэн жүдочин бол Хөдөлмөрийн баатар, МУГТ, Хашбаатарын Цагаанбаатар юм. Тэрбээр Нидерланд Улсад болсон “Роттердам-2009” ДАШТ-ий 66 кг-ын жинд түрүүлж дэлхийн аварга болж байлаа. Улмаар тэрбээр “Токио-2010” ДАШТ-ий 66 кг-ын жинд хүрэл медаль хүртсэн юм. МУГТ Мөнхбатын Бундмаа “Токио-2010” ДАШТ-ий 52 кг-ын жинд хүрэл медаль хүртсэн.

    Бразил Улсад болсон “Рио Де Жанейро-2013”  ДАШТ-ий 48 кг-ын жинд Хөдөлмөрийн баатар, МУГТ Мөнхбатын Уранцэцэг түрүүлж, Монгол Улсаас төрөн гарсан анхны жүдо бөхийн дэлхийн аварга эмэгтэй тамирчин болж байлаа. Тус “Рио Де Жанейро-2013”  ДАШТ-ий 60 кг-ын жинд МУГТ Дашдаваагийн Амартүвшин мөнгөн медаль хүртэж байв.

      ОХУ-д болсон “Челябинск-2024” ДАШТ-ий кг-ын жинд МУГТ Ганбатын Болдбаатар түрүүлж, Монгол Улсаас төрсөн жүдо бөхийн хоёр дахь дэлхийн аварга болсон. Казахстан Улсад болсон “Астана-2015” ДАШТ-ий 57 кг-д Хөдөлмөрийн баатар, МУГТ Доржсүрэнгийн Сумъяа хүрэл медаль, МУГТ Сайнжаргалын Ням-Очир 73 кг-д хүрэл, МУГТ Цэдэвсүрэнгийн Мөнхзаяа 63 кг-д хүрэл медаль авч байв.

     2016 оны олимпын жил ДАШТ болоогүй. Олимпын дараа жил Унгар Улсад болсон “Будапешт-2017” ДАШТ-ээс дэлхийн аварга М.Уранцэцэг 48 кг-д хүрэл, дэлхийн аварга Г.Болдбаатар 60 кг-д хүрэл медаль, МУГТ Ганбаатарын Одбаяр 73 кг-д хүрэл, МУГТ Балдоржийн Мөнгөнчимэг 63 кг-д хүрэл, олимпын аварга, Хөдөлмөрийн баатар, МУГТ Найдангийн Түвшинбаяр +100 кг-ын жинд хүрэл медаль, Хөдөлмөрийн баатар, МУГТ Доржсүрэнгийн Сумъяа 57 кг-ын жинд алтан медаль хүртэж, Монгол Улсаас төрөн гарсан хоёр дахь эмэгтэй дэлхий аварга жүдочин болсон юм.

      Азербайжан Улсад болсон “Баку-2018” ДАШТ-ий 57 кг-д МУГТ Д.Сумъяа хүрэл медаль, МУГТ Лхагвасүрэнгийн Отгонбаатар -100 кг-ын жинд хүрэл, МУГТ, залуучуудын дэлхийн аварга Өлзийбаярын Дүүрэнбаяр +100 кг-ын жинд хүрэл медаль авсан. Япон Улсад болсон “Токио-2019” ДАШТ-ий 48 кг-ын жинд МУГТ М.Уранцэцэг хүрэл медаль, Унгар Улсад болсон “Будапешт-2021” ДАШТ-ий 66 кг-ын жинд МУГТ Ёндонпэрэнлэйн Басхүү хүрэл, МУГТ М.Уранцэцэг 48 кг-д хүрэл медаль хүртэж байлаа.

     Узбекистан Улсад болсон “Ташкент-2022” ДАШТ-ий 60 кг-д ОУХМ Энхтайванын Ариунболд мөнгө, 57 кг-д МУГТ Лхагватогоогийн Энхрийлэн хүрэл медаль, 73 кг-ын жинд МУГТ Цэнд-Очирын Цогтбаатар түрүүлж, дэлхийн аварга болсон. Катар Улсад болсон “Доха-2023” ДАШТ-ий 66 кг-ын жинд МУГТ Ё.Басхүү хүрэл, 57 кг-д МУГТ Л.Энхрийлэн хүрэл медаль авсан. АНЭУ-д болсон “Абу Даби-2024” ДАШТ-ий 73 кг-ын жинд ОУХМ Лавжаргалын Анхзаяа хүрэл медаль, 48 кг-ын жинд МУГТ Бавуудоржийн Баасанхүү алтан медаль хүртэж, дэлхийн аварга болсон амжилтыг үзүүлээд байгаа билээ.