УИХ-ын чуулганы үеэр Хөгжлийн банкнаас олгосон зээлийн эргэн төлөлтийн талаарх мэдээллийг сангийн сайд Б.Жавхлан УИХ-ын гишүүдэд танилцууллаа. Энэ үеэр УИХ-ын гишүүн Н.Алтанхуяаг өөрийн байр сууриа илэрхийлэв.

         Тэрбээр “Шударга баймаар байна. УИХ гишүүдэд 11 сарын 1 өдөр Монгол Улсын Ерөнхий сайд хөгжлийн банкны талаар мэдээлэл хүргэсэн. Гэтэл сангийн сайд үүнээс өөр зүйл уншиж танилцууллаа. Тэгэхээр Б.Жавхлан гэмт хэрэгтэн мөн гэдэгт итгэлээ. Яагаад гэвэл Даваасүрэн гишүүний хэлснээр сангийн сайд хөгжлийн банкыг хэрхэн дампууруулсан тухай хангалттай бүгдийг дэлгэсэн. 2017 онд хөгжлийн банкны хуулийг өөрчилж, хамаарал бүхий хүмүүсээ томилж, мөнгө завшсан тухай Даваасүрэн гишүүн хэлсэн. Үүнийг яагаад хууль хяналтын байгууллага шалгахгүй байгаа нь сонин. Тэр байтугай УИХ-ын индэр дээрээс гүтгэлэгийн шинж чанартай өөр зүйл уншиж танилцууллаа. Б.Жавхлангийн ярьсан материалыг бүх гишүүдэд тараах хэрэгтэй. Гишүүдэд өгсөн мэдээллээсээ өөр зүйл танилцуулж байна. Л.Оюун-эрдэнэ сайдын тараасан мэдээллийг сангийн сайд нь өөрөөр танилцууллаа. Ард түмэн үүнд итгэсэн. Ардчилсан намын бүлэг энэ асуудлаар ерөнхий сайд руу орно” гэв.