Засгийн газрын тохируулагч агентлаг, Биеийн тамир, спортын улсын хорооныхон бужигнаж байгаа бололтой. Саяхан бүрдсэн багийнхных нь хууль бус үйлдэл, хулгайн хэрэгтэй холбоотой өргөдөл, гомдол хууль хяналтын байгууллагад ирснээр шалгалтын ажиллагааг эхлүүлж, сандралдаж байгаа сурагтай. Хоёр жилийн хугацаанд гурван ч удирдлагын нүүр үзэж, үйл ажиллагаа нь тогтворжиж чадахгүй байгаа байгууллагын нэгээр яах аргагүй Биеийн тамир, спортын улсын хорооныхон “тодроод” байна. Засгийн газрын тохируулагч агентлаг хэрнээ зангараггүй, засардаггүй байгууллага. Улсынхаа нүүр царай болсон тамирчдыгн ирээдүйг “баллах”-аас эхлээд уг байгууллагын балаг мундахгүй.

        Угтаа уг байгууллага “Хөгжлийн чиг хандлага, хүн амын хэрэгцээнд нийцүүлэн биеийн тамир, спортын салбарын бодлогын үр нөлөөг дээшлүүлэн олон талт, тэгш, хүртээмжтэй, чанартай үйлчилгээг хэрэгжүүлэх замаар бие бялдрын боловсролтой, ёс суртахууны төлөвшилтэй, эрүүл чийрэг иргэнийг төлөвшүүлэхэд оршино” гэх том зорилготой, том агентлаг учраа олж, суудалдаа тухалчихвал хэн хэндээ хэрэгтэй. Гэвч тус хорооныхныг хууль хяналтын байгууллагаас шалгаж эхэлсэн талаар эх сурвалж мэдээллээ. Биеийн тамир, спортын улсын хорооныхныг мөнгө угаадаг байж болзошгүй, эрх мэдэл, албан тушаалын байдлаа урвуулан ашиглаж, өөртөө давуу байдал олгодог гэх үндэслэлээр шалгаж эхэлсэн гэнэ. Ингэхдээ нэг ч биш нэлээн олон хүнийг шалгаж эхлэх гэнэ.  

ТОГТООЛ, ШИЙДВЭРИЙН ХЭРЭГЖИЛТ, ТАЙЛАН МЭДЭЭ ХАРИУЦСАН МЭРГЭЖИЛТЭН С.НОМИНГ ШАЛГАНА

     Хууль хяналтын байгууллагад шалгагдаж байгаа хамгийн эхний хүн бол Биеийн тамир, спортын улсын хорооны Тогтоол, шийдвэрийн хэрэгжилт, тайлан мэдээ хариуцсан мэргэжилтэн С.Номин гэнэ. Мэргэжилтэн С.номингийн эрх мэдэл, албан тушаалын байдлаа урвуулан ашиглаж, улсын төсвийг үргүй зарлагдаж, сул орон тоогоор цалинжиж байгаа гэх өргөдөл, гомдол иржээ.

Тодруулбал, эх сурвалжийн мэдээлснээр “Мэргэжилтэн С.Номинг Биеийн тамир, спортын улсын хорооны дарга О.Баттулгын тушаалаар томилсон байдаг. С.Баттулга чинь өөрөө шинэ удирдлага шүү дээ. Тус хорооны түр орлон гүйцэтгэгээр ажиллаж байгаад нэр дэвшсэн. Хачирхалтай нь олимп хаяанд тулчихаад байхад хорооныхоо удирдлагыг сольж, багийг нь өөрчилсөн. Өөрөөр хэлбэл, өнгөрсөн нэгдүгээр сард манай улсын спортын төв байгууллага болох Засгийн газрын тохируулагч агентлаг, Биеийн тамир, спортын улсын хорооны даргын суудал дөрвөн сар эзэнгүй байсан. Эцэст нь, О.Баттулга гэдэг хүн дахиад өрсөлдөж, ялалт байгуулсан. Угтаа О.Баттулга уг байгууллагын сайныг нь ч, саарыг нь ч сайн мэдэх хүн. Гэтэл багийнхан нь будилаан тариад эхэлсэн бололтой. О.Баттулгын томилсон мэргэжилтэн С.Номин гэдэг хүн огт ажилладаггүй хэрнээ улсаас хий дэмий цалин авдаг гэнэ. Тодруулбал, С.Номинг О.Баттулга дарга Хяналт, шинжилгээ үнэлгээ хариуцсан мэргэжилтнээр томилсон гэсэн. Гэвч уг ажилд нэг ч удаа гар бие оролцоогүй, улсын цалинг хий дэмий халаасалж байгаатай холбоотой гомдол, баримттай ирсэн юм байна лээ. Үүний дагуу С.Номинг шалгаж эхлэх бололтой” гэв.

АГЕНТЛАГИЙН ХҮНИЙ НӨӨЦИЙН АСУУДАЛ ХАРИУЦСАН МЭРГЭЖИЛТЭН Б.НАРМӨНХ ЭРХ МЭДЛЭЭ АШИГЛАЖ, ҮНДЭСНИЙ ШИГШЭЭ БАГИЙН НЭР ДЭЭР ДИПЛОМАТ АЛБАН ПАССПОРТ ГАРГУУЛЖЭЭ

     Харин дараагийн шалгагдах хүн бол Засгийн газрын тохируулагч агентлагийн Хүний нөөцийн асуудал хариуцсан мэргэжилтэн Б.Нармөнх гэнэ. Түүнийг эрх мэдэл, албан тушаалын байдлаа урвуулан ашиглаж, өөртөө давуу байдал үүсгэж, улсын хөрөнгөөр зугаалж байна гэх өргөдөл, гомдол иржээ. Гомдлын дагуу хууль хяналтын байгууллагын мөрдөгчид шалгаж эхлэх гэнэ.

Эх сурвалжийн бидэнд өгсөн мэдээллээр “Хүний нөөцийн асуудал хариуцсан мэргэжилтэн Б.Нармөнхийг эрх мэдэл, албан тушаалаа байдлаа урвуулан ашиглаж, өөртөө давуу байдал олгосон гэдэг гомдол байгаа юм байна лээ. Тэрбээр мэдээлэлд ойр байгаагаа далимдуулж, өөртөө давуу байдал олгоод, Үндэсний шигшээ багийн тамирчдын нэр дипломат, албаны ногоон паспорт гаргуулсан гэсэн. Үүгээр ч зогсохгүй шигшээ багийнхныг тэмцээнд явахад нь гадаадаар зугаалж, ирэх, очих онгоцны билетийн зардлаа улсаар төлүүлсэн гэсэн. Уг нь Хүний нөөцийн асуудал хариуцсан мэргэжилтэн Б.Нармөнх биш, нэг дасгалжуулагч, эмч ч болтугай явах хэрэгтэй. Гэтэл хүний нөөцийн мэргэжилтэн нь өөртөө албаны паспорт гаргуулаад, улсын зардлаар зугаалаад байж болохгүй шүү дээ. Энэ бол хууль бус үйлдэл гэж харж байна. Ийм учраас хууль хяналтын байгууллагынхан шалгаж, тогтооно байх. Биеийн тамир, спортын улсын хорооны шинэ удирдлага энэ мэт хууль бус үйлдлүүдийг таслан зогсооно биз” гэлээ.

БТСУХ-НЫ САНХҮҮЧ А.ӨНӨРЦЭЦЭГ, НЯРАВ А.БОЛДТӨР НАР МӨНГӨ УГААДАГ УУ

      Харин Биеийн тамир, спортын улсын хорооны Төсвийн төвлөрүүлэн захирагчийн төсвийн ерөнхий нягтлан бодогч А.Өнөрцэцэг, Санхүү, хөрөнгө оруулалтын хэлтсийн нярав А.Болдтөр нарыг улсын мөнгийг угаадаг байж болзошгүй гомдол иржээ.

Тодруулбал, тэднийг бүлэглэн хууль бусаар улсын хөрөнгийг угааж, шамшигдуулдаг байж болзошгүй үндэслэлээр хуулийн байгууллага шалгалтын ажиллагаа эхлүүлэх ажээ. Эх сурвалж хэлэхдээ “А.Өнөрцэцэг, А.Болдтөр нар хамаарал бүхий этгээдүүд байгаа юм. А.Өнөрцэцэг Төсвийн төвлөрүүлэн захирагчийн төсвийн ерөнхий нягтлан бодогчийн түр орлон гүйцэтгэгчээр ажиллаж байгаа. Ажиллах хугацаандаа хууль бус үйлдэл гаргасан байж болзошгүй” гэлээ.

Засгийн газрын тохируулагч агентлаг, Биеийн тамир, спортын улсын хорооны дарга О.Баттулга аа, улсын спортын бодлого тодорхойлогч, тохируулагч “том” агентлагт хууль бус үйлэдлгүй, хулгайн хэрэгт холбогдоогүй мэргэжилтэн, албан тушаалтан гэж байна уу.