• Өнөөдөр 2024-03-29

Баянзүрх дүүргийн 256 дугаар цэцэрлэгийн эрхлэгч Д.Сарантуяаг халсан ажилтнуудынхаа цалинг хувьдаа завшиж байсныг илрүүлэн шалгаж эхэллээ

2023-05-21,   1813

      Нийслэлийн Баянзүрх дүүргийн 256 дугаар цэцэрлэгийн эрхлэгч Д.Сарантуяаг хяналтын байгууллагаас шалгаж эхэлсэн талаар эх сурвалж мэдээллээ. Тодруулбал, Г.Сарантуяаг эрх мэдэл, албан тушаалын байдлаа урвуулан ашиглаж, өөртөө давуу байдал олгож, улсад их хэмжээний хохирол учруулсан байж болзошгүй үндэслэлээр шалгаж байгаа гэнэ. Тэрбээр ажлаасаа чөлөөлөгдсөн ажилтнуудынхаа цалинг бодож, хувьдаа завшсан хэрэгт холбогджээ.

ХАЛАГДСАН ТАВАН АЖИЛТНЫХАА ЦАЛИНГ ХУВЬДАА ЗАВШИЖ, 40 ГАРУЙ САЯ ТӨГРӨГИЙН ХОХИРОЛ УЧРУУЛСАН БАЙЖ БОЛЗОШГҮЙ

    Эх сурвалжийн бидэнд өгсөн мэдээллээр “Эрх мэдэл, албан тушаалын байдлаа урвуулан ашиглаж, өөртөө давуу байдал олгож, төрийн албан хаагчийн олон хууль, дүрэм, журмыг зөрчиж байгаа эрхлэгч Д.Сарантуяа албан үүргээ гүйцэтгэж байгаа. Өнгөрсөн долоо хоногт хууль хяналтын байгууллага болон холбогдох газруудаас 256 дугаар цэцэрлэгт шалгалт хийсэн юм байна лээ. Тэгээд тус цэцэрлэгийн санхүүгийн тайлан болон Д.Сарантуяа эрхлэгчийн дансны мэдээллийг шалгаж байгаа гэсэн. Баянзүрх дүүргийн 25 дугаар хороонд байрлах 256 дугаар цэцэрлэгийг Д.Сарантуяа 2018 оноос хойш удирдаж байгаа. Энэ хугацаанд олон ажилтан ажлаасаа гарч, ажлын байраа орхиж явсан. Энэ нь Д.Сарантуяа гэдэг хүнтэй холбоотой юм билээ. 2022 онд буюу жилийн өмнө халагдсан таван ажилтныхаа цалинг хуурамчаар бодож, хувьдаа завшиж байсан гэнэ лээ. Цалинг нь бодоод, бэлнээр олгосон акт үйлдэж байсан гэсэн. Тооцоолол хийж үзэхээр Д.Сарантуяа улсад 40 гаруй сая төгрөгийн хохирол учруулсан байж болзошгүй байгаа. Түүний хууль бус үйлдлийг нь ажилнууд нь мэдэж, хуулийн байгууллагад хандсан юм шиг байна лээ. Мөн эцэг, эхчүүдээс хандив нэрээр хахууль авсан байж болзошгүй гэх ч хэрэг сөхөгдөж байгаа гэсэн. 256 дугаар цэцэрлэг чинь Натур хавьд учраас амьжиргааны түвшин дээгүүр айл өрхүүд амьдардаг шүү дээ. Энэ мэт үндэслэлээр Д.Сарантуяаг шалгаж байгаа гэсэн” гэлээ.

Нийслэлийн 256 дугаар цэцэрлэг гурван салбартай гэнэ. Баянзүрх дүүргийн 25 дугаар хороо, Натурын урд хэсэгт байрлах салбарыг нь Д.Сарантуяа хариуцаж ажилладаг. Тус салбар нь өнгөрсөн хугацаанд нягтлангүй байсан Д.Сарантуяа өөрөө цалингаа бодож, бичиж, тавьдаг байсан гэнэ. Мөн давуу эрхтэйгээр санхүүгийн систем рүү нэвтэрч, гүйлгээ хийдэг байсан талаар эх сурвалж мэдээлж байна.

ЭРХЛЭГЧ Д.САРАНТУЯА ОХИНЫХОО НЭРЭЭР ИЛҮҮ ЦАЛИН АВЧ БАЙЖЭЭ

Өнгөрсөн 2022 оны гуравдугаар сард тус цэцэрлэгт ажиллаж байсан эмч, туслах багш, тогооч, үйлчлэгч нар ажлаасаа халагджээ.

       Эх сурвалжийн мэдээлснээр “Ажлаасаа гарсан ажилтнуудын дунд Д.Сарантуяа эрхлэгчийн охин Н гэж хүн байсан. Түүний охин 256 дугаар цэцэрлэгт биеийн тамирын багшаар ажиллаж байсан юм байна лээ. Тэгээд ажлаасаа гарч, өөр ажилд орсон гэсэн. хачирхалтай нь, Д.Сарантуяа охиныхоо нэрээр өнгөрсөн сарыг хүртэл цалин авсаар байсан. Ажилтнуудын цалинг хувьдаа завшиж байсан асуудал сөхөгдсөн даруйд охин нь цэцэрлэгт ажиллаж эхэлсэн. Түр хугацаанд чөлөөтэй байсан гэх юм байна лээ. Мөн охиноо биеийн тамирын багшаас гадна бүлгийн багшаар томилсон. Өөрийгөө эрхлэгчээс гадна тогооч томилж, илүү цалин авдаг ч гэх юм байна лээ. Хууль хяналтын байгууллагынхан тогтоож шалгана биз” гэв.

БАЯНЗҮРХ ДҮҮРГИЙН БОЛОВСРОЛЫН ХЭЛТСИЙН ДАРГА Б.ГАНБАТ: 256 ДУГААР ЦЭЦЭРЛЭГИЙН ЭРХЛЭГЧИЙГ ШАЛГАЖ БАЙНА

Бид энэ талаар Баянзүрх дүүргийн Боловсролын хэлтсийн дарга Б.Ганбаттай холбогдож, тодрууллаа.

       Тэрбээр “Боловсролын ерөнхий газар, Баянзүрх дүүргийн дотоод аудитаас Ажлын хэсэг гарч, 256 дугаар цэцэрлэгийн эрхлэгч Д.Сарантуяатай холбоотой мэдээллийг шалгаж байгаа. Ажлын хэсгийн дүгнэлт гараагүй, шалгалт хийгдэж  байгаа учраас өгөх мэдээлэл байхгүй байна. Шалгалтын хариу мэдээлэл гарсны дараа тайлбар өгөх боломжтой. Ямартай ч өнгөрсөн долоо хоногт холбогдох албанаас ирсэн мэдээллийн дагуу шалгаж байгаа” гэлээ.

256 ДУГААР ЦЭЦЭРЛЭГЧИЙН ЭРХЛЭГЧ Д.САРАНТУЯА: АТГ-ААС НАМАЙГ ШАЛГАЖ БАЙГАА УЧРААС ҮНЭН ТОГТООГДОХ БАЙХ

Харин бид 256 дугаар цэцэрлэгийн эрхлэгч Д.Сарантуяатай холбогдож, энэ талаар тодруулахад “Намайг АТГ-аас шалгаж байгаа нь үнэн. Хууль хяналтын байгууллагаас шалгаж байгаа учир үнэн тогтоогдох байлгүй дээ. Манай цэцэрлэгийн хоёр, гурван багш худал мэдээлэл тараагаад байгааг мэдэж байна. Надад мөнгө завшсан асуудал байхгүй. Хуулийн байгууллага шалгаад дууссаны дараа дэлгэрэнгүй тайлбар өгөх болно” гэсэн юм.

АЖИЛТНУУДЫНХАА ЦАЛИНГ ХУВЬДАА ЗАВШСАН ГЭХ ЭРХЛЭГЧ Д.САРАНТУЯА ГЭЖ ХЭН БЭ

        Тус цэцэрлэгийн эрхлэгч Д.Сарантуяа нь 2017 онд Орхон аймгийн Сургалтын албаны менежерээр ажиллаж байжээ. Харин 2018 онд Улаанбаатар хот руу шилжин ирж, 2019 онд тус цэцэрлэгийн эрхлэгчээр томилогджээ.

2018 он: Д.Сарантуяа нь цэцэрлэгийн эрхлэгчээр томилогдохдоо жилийн орлого нь 15 сая, гэр бүлийн орлого нь 18.5 сая төгрөг байжээ. Тэрбээр 16.5 сая төгрөгөөр үнэлэгдэх хашаа, байшинтай гэж хөрөнгө орлогын мэдүүлэгтээ мэдүүлжээ. Мөн 12 сая төгрөгөөр үнэлэгдэх нэг автомашинтай, 5.9 сая төгрөгийн үнэт эдлэлтэй гэнэ. Түүнчлэн өмчлөх эрхийн хоёр газартай бөгөөд үнэлгээ нь 13.7 сая төгрөг. Хаан банк, Прогресс капитал ББСБ-т 40 сая төгрөгийн өртэй, 76 мянган төгрөгийн хадгаламжтай гэжээ. “Цэнэгийн урсгал” ХХК-ийн хувьцаа эзэмшигч гэж мэдүүлсэн байна.

2021 он: Харин хамгийн сүүлд буюу цэцэрлэгийн эрхлэгчээр томилогдоод гурван жилийн дараа жилийн орлого нь 19 сая, гэр бүлийн орлого нь 16 сая төгрөг болсон байна. Тэрбээр энэ онд 21.9 сая төгрөгөөр үнэлэгдэх хашаа, байшинтай, нэг орон сууцтай гэж хөрөнгө орлогын мэдүүлэгтээ мэдүүлжээ. Өөрөөр хэлбэл, шинээр орон сууц худалдан авч, үнэлгээг нь 4.5 сая төгрөгөөр үнэлсэн байна. Өмчлөх эрхийн хоёр газрынхаа үнэлгээг нэг дахин нэмч, 30 сая төгрөг болгожээ. Суудлын автомашиныхаа үнийг зургаан саяар нэмж, 18 сая төгрөг болгосон байна. Харин үнэт эдлэл, хадгаламж нь хэвээрээ байгаа аж. Хаан банк, Прогресс капитал ББСБ-ын зээл нь 34.5 сая төгрөг болжээ.

 


Баянзүрх дүүргийн 256 дугаар цэцэрлэгийн эрхлэгч Д.Сарантуяаг халсан ажилтнуудынхаа цалинг хувьдаа завшиж байсныг илрүүлэн шалгаж эхэллээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4
  • Сэтгэгдэл үлдээсэн: 2023-05-27 16:20:07
    Зочин: Наадах чинь ажилчдаа аймаар дарамталдаг, хүмүүсээ хавчиж гадуурхаж улмаар ажлаасааа гарахад хүргэдэг хүн дээ. Энэ хэдхэн жилд 100.д хүн гарсан байдаг. Байхгүй хүний цалин авч иддэг нь ч үнэн. Нөхрийнх нь нэр ч явж байгаа. Дураараа авирладаг аймшиг...
  • Сэтгэгдэл үлдээсэн: 2023-05-18 20:23:12
    Хамт олон: Та нар хажууд нь байсан юм шиг хандаж байгаа нь хэсэг бүлэг хүмүүс нэгдэж, нэг хүнийг барьж идэх төлөвлөгөө зохиосон нь харагдаж байна. Ганчимэг, Өлзийжаргал гэсэн багш нар цалингаа бодож чадахгүй хамт олондоо хөөгдсөн Отгонмаа гэх нөхөртэй нийлж хийж байгаа ажлуудын нэг. Шалгах газар нь шалгаж байхад та нар нэг хүний эсрэг ямар эрээ цээргүй нэгдэж, балиар заваанаа гайхуулж, сошиал ашиглаж байгаа чинь өөрөө арчаагүй хүмүүс гэдгээ харуулж байна.
  • Сэтгэгдэл үлдээсэн: 2023-05-18 19:46:52
    Зочин: Нам нь хамгаална
  • Сэтгэгдэл үлдээсэн: 2023-05-18 10:15:31
    Зочин: Наадах чинь их оодроод байсан юм аа. Энэ цэцэрлэг хувийн хэвшилээс худалдаж авсан. Тэр үед хагас дутуу цэцэрлэг хүлээж авсан тоглоомын талбай хамаг юм нь хэмхэрхий байсан одоо ч яг хэвээрээ байгаа. Энэ эрхлэгч хүлээж авахдаа аягүй бол авилгал авсан л байж таараа
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188