Засгийн газарт дэд сайд нарыг дахин оруулж ирэхээр бэлдэж байна. Эхнээсээ сайд нарын нэрс тодорч, сайд болсноо зарлаж яваа улстөрчид ч цөөнгүй байгаа гэнэ, МАН-д.

        УИХ болон орон нутгийн сонгуулиар гомдогсдын “арми” орж ирж байгаа бололтой. Нэг ёсондоо МАН-ынхан УИХ-ын сонгуулиар шинэ залуу гишүүдээ дэвшүүлнэ гэж амалсан ч томсгосон тойргоор сонгуулиа хийхээр болж, хууччуулаа сойж, залуучуудаа гомдоосон.

        Харин одоо тэд гомдоосон залуучууддаа дэд сайдын суудал бэлэглэхээр бэлдэж эхлээд байгаа нь илт байна. Тиймдээ ч МАН-ын гишүүд “Дэд сайдын томилох бол ядаж нэр цэвэр, хулгай зэлгий, Засгийн газрын тусгай сангуудад нэр холбогдоогүй хүмүүсийг томилох ёстой” гээд эхнээсээ ам алдаад эхэлсэн байна лээ.

       УИХ-ын чуулганы хуралдаан дээр Ерөнхий сайд Г.Занданшатар “Дэд сайдын асуудал хуулин дээр байна лээ. Өмнөх Засгийн газрын үед орон тоо ,төсөвтэйгээ байгаа юм билээ. Хэл ам шүүмжлэлээс болоод томилоогүй.  Дэд сайд нарыг үр дүнтэй ажиллуулах л асуудал. Гадаад харилцааны сайд гадаад явлаа, гадны зочин ирлээ, орлох хүн байх ёстой. Ямар ч компанийн удирдлагын нэгжид орлох хүн байдаг.  Засаг даргын ажил ч бас орлогчгүй бол явдаггүй. Орлогч сайд гэдэг дэлхийн бүх улсад байдаг албан тушаал. Нэгээр тогтохгүй байдаг албан тушаал. Улс төрийн албан тушаал.  Хэмнэх гэхээс илүү үр дүн юу байна,  үр ашиг гэж юу байна гэж судалж шийдэх ёстой. УИХ-тай зөвшилцөөд шийдэх ёстой асуудал” гэсэн байр суурийг чуулганы индэр дээрээс илэрхийлсэн.

        Гэтэл  Засгийн газар төрийн данхар бүтцийг багасгаж, төрийн албанд цомхтол хийнэ гэж мэдэгдээд төсвийн тодотголоор 14 мянган төрийн алба хаагчийг ажилгүй болгохоор болсон. Үүн дотроо дарга нарын тоог цөөлж, давхардсан чиг үүргийг арилгана гэх том зорилго тавьчихсан нь дэд сайд нарыг томилоход чөдөр тушаа болж мэдэх нь. Өөр өөр хэлбэл, яамны Төрийн нарийн бичгийн дарга, дэд сайд хоёрын чиг үүрэг ижилхэн гээд Л.Оюун-Эрдэнийн хамтарсан Засгийн газар дэд сайдгүй Засгийн газар байгуулж байлаа. Гэтэл төрийн албанд дарга нарын цомхтгол хийж байгаа бол дахиад дэд сайдыг оруулж ирэх нь төрийн бүтцийг данхаалгаж байна гэх шүүмжлэл ч гарч байгаа харагдсан.

       Нэг ёсондоо одоогийн 19 сайд дээр нэмээд 19 сайд орж ирнэ. Үүнд дээр нэмээд жолооч, туслахаас нь эхлээд орон тоо нэмэгдэнэ гэхээр төрийн зардал дахиад өсөх нь тодорхой байна.

     Харин энэ талаар Ерөнхий сайд “Дэд сайдын төсөв нь ч, бий орон тоог нь ч хуулиндаа заасан байдаг” хэмээн хэлснээс харахад томилгоо хийх нь одорхой болсон байгаа юм. Үе үеийн Засгийн газарт дэд сайд нарын асуупал маргаан дагуулдаг. Энэ удаад мөн л маргаантай байгаа ч Ардчилсан намыг хамтарсан Засгаас гаргахдаа дангаараа Засгаа бүрдүүлэх дэмжлэг авсан МАН-ын томчууд ХҮН намын хоёр суудлыг, ИЗНН-д нэг сайдн суудал бэлгэлэснийхээ хариуд дан дээлтэй, залуу гишүүдээ дэд сайдаар томилж, гэмээ цайруулахаар болцгоосон бололтой. Тэгвэл Монгол Улсын Засгийн газрын тухай хуулийн 17 дугаар бүлэгт “Монгол Улсын сайд өөрийн ажлын хэсэгтэй байж болно. Сайдын эрхлэх ажлын хүрээн дэх чиг үүрэг, зорилтыг хэрэгжүүлэх, шийдвэрлэхэд сайдад зөвлөх үүрэгтэй сайдын зөвлөл ажиллана. Сайдын зөвлөлийн ажиллах нийтлэг журам, сайдын ажлын хэсгийн орон тооны хязгаар, зардлын төсвийг Засгийн газар тогтооно” хэмээн хуульчилсан байдаг.

     Дэд сайдыг томилох асуудал Л.Оюун-Эрдэнийн Засгийн газрын үед яригдаж байлаа. Тодруулбал, өрийн хэмнэлтийн тухай хуулийг хүчингүй болгож, оронд нь “Төрийн байгууллагын ерөнхий зохицуулалтын хууль”-ийг боловсруулан өргөн барихаар бэлдэж эхэлсэн. Ингэхдээ дэд сайдыг орлогч сайд гэсэн статустай болгох асуудал ч хөндөгдсөн.

       Ямартай ч эрх баригчид дэд сайд нарыыг буцаан томилж, дараагийн ээлжнийхнээ хоолонд оруулах эрх мэдлиийн ээлжит бялуу хуваалтаа хийхээр болсон ньь тодорхой байна. Тиймдээ ч Төрийн ордноор дүүрэн дэд сайд болохын хүсэлтэй залуучуудын марафон эд өрнөж байна.