-Дотооддоо халдвар алдсаны буруутан УОК, ЭМЯ-

Монголд коронавирусийн анхны тохиолдол өнгөрсөн 2020 оны гуравдугаар сарын 10-нд Франц Улсын иргэнээс илэрч байв. Үүнтэй холбоотойгоор улс даяараа үймсэн ч азаар өөр халдвар авсан хүн байгаагүй. Харин үүнээс хойш бүхэл бүтэн найман сарын дараа коронавирусийн халдварыг дотооддоо алдсан ч УОК, ЭМЯ ямар ч бэлтгэлгүй байсныгаа баталсан.

 “Энхсаран” сувилалд тусгаарлаж байсан ачаа, тээврийн жолооч Д хэд хэдэн удаа шинжилгээ өгч, халдваргүй нь батлагдан тусгаарлалтаас гарсан хойноо халдвартай болох нь тогтоогдсон юм. Гэхдээ үнэндээ, халдвар үүнээс ч эрт тархсан байх магадлалтай талаарх мэдээлэл хөвөрч, одоо халдварын хэд хэдэн голомт бий болоод буй.

Тусгаарлах байрнаас, эрүүл мэндийн байгууллагаас халдвар тархаж байгаа нь УОК, ЭМЯ ажлаа хийж чадахгүй байгаагийн илрэл. Түүнчлэн дотооддоо халдвар алдсан үед иргэдэд хэрхэн хөл хорио тогтоох, ямар байгууллагуудаа ажиллуулах, хэрхэн арга хэмжээ авах талаар тэд ямар ч бэлтгэлгүй, төлөвлөгөөгүй байснаар өнөөдөр гаргасан шийдвэрээсээ маргааш буцаж байлаа. Үүний уршгаар өнөөдөр халдвар авсан хүний тоо 1568 болж, үүнээс дотоодын халдвар 1067-д хүрээд байна. Гэтэл УОК, ЭМЯ бүх бурууг иргэд рүүгээ чихэж, уснаас хуурай гарахаар чармайх болсон.

“Энхсаран” сувилалд тусгаарлагдаж байхдаа халдвар авсан иргэн Д.Мөнхбатыг мэдээлэл цацсаных нь төлөө Зөрчлийн хуулиар торгож, эрүүгийн хэрэг үүсгэсэн байгаа юм. Д.Мөнхбатаас гадна өөр хэд хэдэн хүнд эрүүгийн хэрэг үүсгэн, иргэдийнхээ амийг барихаар чармайж байгаа нь яавч ардчилсан улсад байж болох үйлдэл биш. Иймд УОК-ын дарга Я.Содбаатар, Эрүүл мэндийн сайд Т.Мөнхсайхан нар ажлаа хийж чадаагүйнхээ хариуцлагаа хүлээж, огцор.