• Өнөөдөр 2026-11-18

АҮЭБ-ИЙН САЙД Г.ДАМДИННЯМЫН ШАТАХУУН ИМПОРТЛОГЧДОД ТАРААСАН 156 ТЭРБУМ МАН-Д ХАНДИВ БОЛЖ ИРЭХ ҮҮ

       Засгийн газар шатахуун импортлогч компаниудад нөөцийн агуулах сав барь гэж арилжааны банкуудаар зээл өгч, бүр өмнөөс нь хүүг нь төлж өгч буй. Хаан банкаар 14 компанид 76.8 тэрбум төгрөг, Голомт банкаар таван компанид 21.9 тэрбум төгрөг, Худалдаа хөгжлийн банкаар гурван компанид 58 тэрбум төгрөг, нийт 156.7 тэрбум төгрөг өгчихсөн. Зөвхөн есдүгээр сарын хүүгийн татаасанд АҮЭБЯ-наас Хаан банканд 542 сая төгрөг, Худалдаа хөгжлийн банканд 372 сая төгрөг, Голомт банканд 137 сая төгрөг тус тус тушаасан байна. 
 
Анх 1912 онд Богд хаан “Ford” автомашин монголд оруулж ирж байлаа. Тэгээд тэмээн жингээр хоёр хөршөөсөө бензин зөөж эхэлсэн. Авчирсан багахан бензинээ аюулгүй хадгалах агуулах сав бидэнд байсангүй. Хятад худалдаачдын хашаанд хурааж, хэд хоногтоо хадгалдаг байсан гэлцдэг. Тэр цагаас 110 гаруй жил өнгөрчихсөн байна. Тэмээн жингээр биш, төмөр замаар бензинээ зөөдөг болсон ч агуулах саваа Л барьсангүй. Хоёр хөршөө царайчилж байж савныхаа хэмжээгээр “балга” шатахуун авна, тэр нь төдхөнөө дуусна, тэгээд оочерлох зовлон эхэлнэ. Энэ бол бидний бодит байдал. 
 
       Шатахууны оочер, шагийн наймаа гаарсан тул Засгийн газар нөөцийн агуулах сав барь гэж компаниудад мөнгө тараасан. Атал өнөөх л шатахууны салбарт монопол тогтоосон улстөрчид, бас улстөрчидтэй халаас нэгтэй, хандиваар санхүүжүүлдэг компаниудын эзэд л хуваагаад авцгаачихжээ. Жишээ, ЖДҮ шиг, эсвэл Хөгжлийн банкийг хоосолж, ТЭДС-г тоносон шиг л авцгаасан байна. Ирэх онд Ерөнхийлөгчийн, дараа жил нь УИХ-ын сонгууль болно. Угсраа хоёр сонгуулийг угтуулан улстөрчдийн оролцоотой компаниудад ийм их хэмжээний мөнгө тараасан нь МАН-ынхны сонгуулийн санхүүжилтээ босгох төлөвлөгөөний хэсэг байж ч болзошгүй харагдаж байгаа юм. Засгийн газраас 10 тэрбумын урт хугацаатай зээл аваад, сар тутмын хүүгээ төрөөр төлүүлж байгаа компанийн эзэн ирэх хоёр сонгуулиар МАН-ын нэр дэвшигчдийг хоосон хараад суухгүй, халаасаа тэмтрэх л байх. Ялангуяа, энэ төслийн автор, АҮЭБ-ийн сайд Г.Дамдинням хандивлагчдын хөлд дарагдаж мэднэ. 
 
Жишээ болгож, Засгийн газрын шатахууны нөөцийн агуулах сав барих хөтөлбөрөөс хамгийн их зээл авсан улстөрчидтэй холбоотой, хандив хайр найргүй өгдөг компаниудыг танилцуулъя. 
 
       “Шунхлай”-н П.Батсайханы “Шунхлай трейдинг” ХХК нь 30 тэрбум төгрөгийг Худалдаа хөгжлийн банкаар дамжуулж авсан. Одоогийн УИХ-д П.Батсайханы төрсөн эгч П.Батчимэгээс гадна, УИХ-ын гишүүн, АН-ын бүлгийн дарга Б.Түвшин, А.Ганбаатар, Д.Энхтуяа, Г.Уянгахишиг тэргүүтэй “АПУ”, “Шунхлай”-д ажиллаж асан намтартай олон түшээ бий. Мөн П.Батсайхан 2024 оны УИХ-ын сонгуулиар охин компаниудаараа Ч.Лодойсамбууг онцгойлон санхүүжүүлж УИХ-ын гишүүн болгосон. Тэгээд болоогүй, сая 30 тэрбумыг авчихаад буй П.Батсайханы “Шунхлай трейдинг” ХХК-ийн гүйцэтгэх захирал Ж.Мөнхнаран нь 2024 оны УИХ-ын сонгуулиар УИХ-ын гишүүн Л.Оюун-Эрдэнэ, УИХ-ын гишүүн М.Ганхүлэг, УИХ-ын гишүүн У.Отгонбаяр, УИХ-ын гишүүн, ХХААХҮ-ийн сайд Ц.Идэрбат нарт хандив нэрээр санхүүжилт өгсөн байдаг. 
 
         УИХ-ын гишүүн асан О.Содбилэгийн “НИК” ХХК нь Хаан банкаар дамжуулж 16.1 тэрбум төгрөг авсан. О.Содбилэгийн тухайд ордондоос гараад зургаан жил болж байгаа ч намдаа нөлөөтэй хэвээр байгаа. Мөн “НИК” ХХК-ийн гүйцэтгэх захирлаар УИХ-ын гишүүн, УИХ-ын Төсвийн байнгын хорооны дарга Н.Наранбаатарын төрсөн дүү Н.Наранбат ажилладаг. 
 
         Хаан банкнаас 5.4 тэрбум төгрөг авсан “Петро лайн” ХХК-ийг Повронгийн Батсайхан эзэмшдэг. “Петро лайн” ХХК-ийн эзэн П.Батсайхан Говь-Алтай аймгийн уугуул бөгөөд УИХ-ын гишүүн Д.Амарбаясгалангийн нэг төгсөлтийн найз. 2024 оны УИХ-ын сонгуулиар Д.Амарбаясгаланд хандив өгч байсан. Намтрын хувьд, УИХ-ын гишүүн асан О.Содбилэгийн “Петровис”, “НИК”-д ажиллаж байгаад 2021-2025 онд Монголын газрын тос боловсруулах үйлдвэр болон АҮЭБЯ-ны харьяа “Эрчис ойл” ТӨХК-д Хангамж, борлуулалтын албаны даргаар ажилласан байдаг.
 
        УИХ-ын гишүүн У.Отгонбаярт 2024 оны УИХ-ын сонгуулиар хандив өгсөн “Интернэйшнл рөүд” ХХК Хаан банкаар дамжуулж 5.0 тэрбум төгрөг авсан. Хаа байсан Ховдын Булган суманд бүртгэлтэй компани боловч Дорнод, Сүхбаатар, Хэнтийд  нэр дэвшсэн У.Отгонбаярт хандив өгч байлаа. Мөн УИХ-ын гишүүн У.Отгонбаярт хандив өгсөн Ж.Мөнхнарангийн удирддаг “Шунхлай трейдинг” ХХК нь 30 тэрбум төгрөг авсныг дээр дурдсан. 
 
       Увс аймгийн МАН-ын хорооны дарга, ИТХ-ын төлөөлөгч Б.Одгэрэлийн “Өү Жи Энержи ойл” ХХК нь Хаан банкаар дамжуулж 5.5 тэрбум төгрөг авсан. Ерөнхий сайд Н.Учрал, АҮЭБ-ийн сайд Г.Дамдинням гээд засгийн томчууд Увсынх. Тэгэхээр Увс аймгийн МАН-ын хорооны дарга Б.Одгэрэл жижиг гар биш гэдэг нь ойлгогдож буй байх. 
 
       УИХ-ын гишүүн Ч.Ундрамын аав Ч.Чинбаттай “Өсөх зөөс” ХХК, “Баялаг энержи ресурс” ХХК, “Чингисийн алтан зоос” ХХК-иудыг хамтран эзэмшдэг П.Баярцогийн “Веллком” ХХК нь Хаан банкаар дамжуулж 5.5 тэрбум төгрөг авсан. 2024 оны УИХ-ын сонгуулиар П.Баярцог “Өсөх зөөс” ХХК, “Баялаг энержи ресурс” ХХК, “Чингисийн алтан зоос” ХХК-иудаараа УИХ-ын гишүүн Ч.Ундрамыг санхүүжүүлсэн. Мөн “Өсөх зөөс” ХХК-аараа УИХ-ын гишүүн Ж.Золжаргалд хандив өгсөн. 

        Хаан банкнаас 5.5 тэрбум төгрөг авсан “Веллком” ХХК-ийг П.Баярцогтой Б.Алтантариа, Ц.Амраа хоёр хамтран эзэмшдэг. “Веллком” ХХК-ийг хамтран эзэмшигч Б.Алтантариа нь УИХ-ын гишүүн С.Одонтуяагийн хүү Ө.Үнэнбүрэнгийн эхнэр. Харин “Веллком” ХХК-ийг хамтран эзэмшигч Ц.Амраа нь УИХ-ын гишүүн С.Одонтуяагийн нөхөр Г.Өлзийбүрэнг Газрын тосны газрын даргаар ажиллаж байх үед дэд даргаар нь ажиллаж байсан “цэрэг” нь. Өөрөөр бол, Газрын тосны газрын даргаар, сүүлд АҮЭБ-ийн сайдаар Ц.Тувааны зөвлөхөөр ажиллаж асан Г.Өлзийбүрэн 5.5 тэрбумыг авсан “Веллком” ХХК-ийн “нууц эзэд”-ийн нэг гэж харагддаг.  

        УИХ-ын гишүүн асан Б.Баттөмөрийн “Тэс петролиум” ХХК нь Хаан банкаар дамжуулж 5.0 тэрбум төгрөг авсан. “Тэс”-ийн Б.Баттөмөр “нүүрсний хулгай”-д нэр холбогдож 2024 оны УИХ-ын сонгуулийг өнжсөн ч Г.Занданшатарыг Ерөнхий сайд болмогц зөвлөх нь болж байв. Хэрвээ Г.Занданшатар Ерөнхийлөгчид нэр дэвшвэл хамгийн том хандивлагч нь Б.Баттөмөр байх болов уу. 
 
       УИХ-ын гишүүн асан Ц.Анандбазарын “Содмонгол групп” ХХК нь Голомт банкаар дамжуулж 3.1 тэрбум төгрөг авсан. “Тэс”-ийн Б.Баттөмөртэй адил “нүүрсний хулгай”-д нэр холбогдож 2024 оны УИХ-ын сонгуулийг өнжсөн ч Г.Занданшатарыг Ерөнхий сайд болмогц зөвлөх нь болж байв. Мөн л Г.Занданшатар Ерөнхийлөгчид нэр дэвшвэл хамгийн том хандивлагч нь Б.Баттөмөр байх болов уу.
 
         “Синчи-Ойл” ХХК Хаан банкаар дамжуулж 5.1 тэрбум төгрөг авсан. “Синчи-ойл” ХХК-ийг эзэмшигч Э.Мөнгөншагай, Э.Баярмаа хоёр Монголбанкны Санхүүгийн зах зээлийн газрын захирал бөгөөд Монгол Улсын Хөгжлийн банкны Тэргүүн дэд захирал А.Энхжинтэй “Принципал инвестмэнтс” ХХК-ийг хамтран эзэмшдэг, халаас нэгтэй хамтрагчид. А.Энхжингийн хувьд МАН-аас албан тушаалын авлагатай мэт яваа нэгэн.  
 
         Харин хамгийн бага 794 сая төгрөгийг Хаан банкаар дамжуулж “Хөрс авто сервис” ХХК авсан. “Хөрс авто сервис” ХХК-ийн эзэн  Ч.Гантулгын хувьд бас л улс төрөөс хол хүн биш бөгөөд УИХ-ын 2020 оны сонгуулиар Ж.Батзандан, Лу.Болд нарыг дагаж “Шинэ эвсэл”-ээс Ховд аймагт нэр дэвшээд унаж байв. 
 

АҮЭБ-ИЙН САЙД Г.ДАМДИННЯМЫН ШАТАХУУН ИМПОРТЛОГЧДОД ТАРААСАН 156 ТЭРБУМ МАН-Д ХАНДИВ БОЛЖ ИРЭХ ҮҮ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188