Ардчилсан нам сүүлийн гурван жил гаруй хугацаанд тамга, тэмдгээ булаацалдаж, шинэ, хуучин дарга нар нь маргаантай байгаа билээ. Хоёр талд хуралдаж, намын дүрмээ хэд хэд өөрчилж үзсэн. Гэвч Улсын дээд шүүхээс намын дүрмийн өөрчлөлтийг нь бүртгэхээс татгалзаж, АН-ын хуучин дарга С.Эрдэнэ, УИХ-ын гишүүн Ц.Туваан нарыг албан ёсоор намыг төлөөлөх эрхгүй гэсэн шийдвэр гарсан юм. Мөн М.Тулгат, О.Цогтгэрэл нарыг хэнийг нь ч Улсын дээд шүүх даргаар бүртгээгүй билээ.

   Тэгвэл маргаан дагуулсан асуудалд цэг тавихаар Ардчилсан намын Ерөнхий нарийн бичгийн дарга Ч.Өнөрбаяр Улсын дээд шүүхэд хүсэлт гаргажээ. Бид түүнтэй уг хүсэлтийнх нь талаар цөөн хором ярилцлаа.

БИ НАМАА ХАЯЖ ЯВААГҮЙ, ДОТООД АСУУДЛАА ШИЙДВЭРЛЭНЭ

-Сайн байна уу. Та Улсын дээд шүүхэд намынхаа асуудлаар хүсэлт гаргасан байсан. Энэ талаараа яриач?

            -Улсын дээд шүүхийн шүүгчдийн хуралдаанаас есдүгээр  сарын 27-нд “Ардчилсан намд одоогоор ямар нэгэн дарга байхгүй. С.Эрдэнэ даргаар бүртгэх боломжгүй. Мөн нөгөө талын хүмүүсийн даргын асуудал, намын дүрмийн талаарх хүсэлтийг хүлээн авахгүй” гэх шийдвэр гаргасан. Энэ асуудалтай холбоотойгоор “Танай намын энэ асуудлыг юу гэж ойлгох юм бэ. Бид даргатай эсэх нь тодорхойгүй явж ирлээ” гэж АН-ын Үндэсний бодлогын хорооны гишүүд болон жирийн гишүүд надтай холбогдсон.

        Энэ асуудлыг хүн бүхэн дураараа, өөрийнхөө бодлоор тайлбарлаад байвал маргаантай, үл ойлголцсон байдал цааш үргэлжилсээр байх болно. Тиймээс би Улсын дээд шүүхэд албан ёсны хүсэлт гаргасан юм. Уг хүсэлтдээ “Та бүхэн өнгөрсөн есдүгээр сард гаргасан шийдвэртээ албан ёсоор тайлбар өгөөч” гэж тодорхой гурван асуудлыг тусгаж өгсөн. Нэгдүгээрт, Ардчилсан нам одоогоор даргатай юу. Хоёрдугаарт С.Эрдэнэ АН-ын даргаар бүртгэлтэй эсэх, гуравдугаарт,  С.Эрдэнэ итгэмжлэх эрхээрээ АН-ыг төлөөлөх бүрэн эрхтэй юү гэх асуултад хариулт өгөхийг хүссэн.

            Энэ хүсэлтэд Улсын дээд шүүх “Өнөөдрийн байдлаар Улсын дээд шүүхийн улс төрийн намын бүртгэл түүний цахим мэдээллийн санд Ардчилсан намын дарга буюу итгэмжлэгчээр С.Эрдэнийг бүртгэсэн шийдвэр огт гаргаагүй. Харин бид татгалзсан шийдвэрийг удаа дараа гаргасан. Мөн одоогоор хэн нэгнийг АН-ын даргаар бүртгээгүй гэх хариуг өгсөн.

-С.Эрдэнэ дарга Үндэсний бодлогын хороог хуралдуулсан гэх мэдээлэл цацагдаад байгаа. Үүнд та намын Ерөнхий нарийн бичгийн даргын хувьд тайлбар өгөөч?

            -Үндэсний бодлогын хороог хуралдуулах, гишүүдийг намаас хөөх эрх зөвхөн намын даргад бий. Улсын дээд шүүхийн цахим мэдээллийн санд АН-д дарга байхгүй учир одоогоор шинэ дарга томилогдох хүртэл хэнд ч ҮБХ-г хуралдуулах эрх байхгүй гэсэн үг.

            Би хувьдаа ҮБХ хуралдаанаа зарлаж, намын дарга шинээр сонгох журмаа батлах, эвлэрлийн хурлаа хийх, намаасаа хөөгдсөн гишүүдийг эргүүлэн оруулж ирэх хэрэгтэй гэж бодож байгаа.

-"Ардчилсан намын даргаар 2017 онд С.Эрдэнийг бүртгэсэн байдаг. Уг тогтоол одоо ч хүчинтэй. Би АН-ыг төлөөлөх бүрэн эрхтэй" гэж С.Эрдэнэ ярьдаг. Энэ ямар учиртай юм бэ?

            -Ардчилсан намын даргаар 2017 онд С.Эрдэнэ томилогдож, цахим мэдээллийн санд бүртгэгдсэн нь мэдээж үнэн. Гэхдээ энэ нь тухайн үед бүртгэсэн тогтоол болохоос өнөөдрийг хүртэл хэрэгжиж байгаа гэсэн үг биш юм аа.

-Та одоогийн байдлаар намаа төлөөлөх гол хүн нь учир намынхаа эв нэгдэл, намын даргын асуудал дээр тодорхой арга хэмжээ авч ажиллаж байгаа байх. Ямар ажил хийж байгаа вэ, танай намын эдгээр маргаантай асуудал хэзээ эцэслэгдэнэ гэж бодож байна вэ? 

            -Намайг хүмүүс намаа орхисон гэж ярьж байна лээ. Би намынхаа дотоод асуудлыг шийдвэрлэтэл ажлаа өгөхгүй. Намынхаа лидерүүдтэй уулзаж, оролцогч талуудтай зөвшилцөж байгаа. Энэ ондоо багтаан эдгээр асуудал шийдвэрлэгдэнэ гэж тооцоолж байна. 

-С.Баярцогтыг АН-ын даргад өрсөлдөнө гэх яриа гарсан. Энэ боломжтой юу, та юу гэж харж байгаа вэ?

            -ҮБХ-ны бүх гишүүн намын даргад өрсөлдөх эрхтэй байдаг. С.Баярцогт тэдний адил нэрээ намын даргад дэвшүүлэх бүрэн эрхтэй. Миний хувьд түүнийг намынхаа туршлагатай лидерүүдийн нэг, намаа удирдах чадвартай нэгэн гэж харж байгаа. Хэн дарга болох нь чухал биш, гол нь намаа нэгтгэж чадах хүн байх л учиртай.