Эргэлт.мн мэдээллийн сайт өнгөрсөн өдөр улс төр, эдийн засаг, нийгэм, соёл урлагийн салбарт болж, өрнөсөн онцлох үйл явдлыг тоймлон хүргэж байна.

УЛС ТӨР

ЕРӨНХИЙЛӨГЧ АСАН Ц.ЭЛБЭГДОРЖ Ж.ЭПШТЕЙНТЭЙ ХОЁР УДАА УУЛЗСАН

            Гадаад хэргийн сайд асан Л.Пүрэвсүрэн:Би дипломатын ажлаа л хийж байсан.  Ерөнхийлөгч асан Ц.Элбэгдорж Ж.Эпштейнтэй хоёр удаа уулзсан. 2013 онд НҮБ-ын чуулганы үеэр “News today” сонины эзний гэрт оройн зоогийг зохион байгуулж, 30 гаруй орны төлөөлөгчид оролцсон.Тэнд анх удаа уулзаж, танилцсан. Дараа нь 2015 онд гэрт нь оройн зоогт уригдсан. Бид ямар нэгэн байдлаар охид эмэгтэйчүүдийн асуудалтай холбоогүй. Намайг Ж.Эпштейнтэй дотно найз байсан гэж ярьж байна. Тийм зүйл байхгүй. Ажлын шугамаар 2017 он хүртэл мэйлээр холбоотой байсан. Ямар ч уул уурхайн талаар яриа хэлэлцээр хийгээгүй. Ж.Эпштейн Монголын талаар ойлголтгүй байсан. Тиймээс Монголд зочлохыг урьсан мэйлийг дипломатын хувиар л бичсэн. Миний мэйл ажлаа өгсний дараа устсан.

ЭДИЙН ЗАСАГ

УУЛ УУРХАЙН ЭКСПОРТЫН ОРЛОГО БАЙДЛААР 15.8 ТЭРБУМ АМ.ДОЛЛАРТ ХҮРЧЭЭ

            Уул уурхайн экспортын орлого энэ оны эхний есөн сарын байдлаар 15.8 тэрбум ам.долларт хүрчээ. Энэ өмнөх оны мөн үеэс 57 хувиар өсжээ. Тодруулбал, нүүрсний экспортын орлого 6.1 тэрбум ам.долларт хүрч, өмнөх оны мөн үеэс 50 хувиар, зэсийн баяжмалын экспорт 7.1 тэрбумд хүрч, 79 хувиар тус тус өссөн байна. Уул  уурхайн бус экспорт 776 сая ам.долларт хүрч өмнөх оны мөн үеэс 9 хувиар өсөөд байна.

ЭРҮҮЛ МЭНД

ТОМУУГААР ӨВЧИЛСӨН 6-ААС ДООШ НАСНЫ ХҮҮХЭДТЭЙ ТӨРИЙН АЛБАН ХААГЧДАД ТАВ ХОНОГИЙН ЦАЛИНТАЙ ЧӨЛӨӨ ОЛГОНО

            Арваннэгдүгээр сарын 1-нээс зургаа хүртэлх насны өвчтэй хүүхдээ асарч байгаа эцэг, эх, асран хамгаалагч нарыг ажлын тав хүртэлх өдөр зайнаас ажиллуулж, цалинтай чөлөө олгоно.

СПОРТ

Н.МАДИГАЙМ ТУУХАЙТ ӨРГӨЛТИЙН ДЭЛХИЙН АВАРГА БОЛЖЭЭ

       Энэтхэг Улсын Нью Дели Хотод 2026 оны туухай өргөлтийн дэлхийн аварга шалгаруулах тэмцээн болжээ.  ДАШТ-ий 78 кг-ын жинд Баян-Өлгий аймгийн Цэнгэл сумын 1-р багийн иргэн Нүх овогтой Мадигайм хос 24+24 кг туухайг цээжнээс 10 минутын хугацаанд 120 удаа өргөж дэлхийн аварга болж, алтан медаль хүртжээ. Мөн мэргэжлийн ангилалд 32+32 кг туухайг цээжнээс 40 удаа өргөж хүрэл медалийн эзэн болжээ.

НИЙГЭМ

ГОДРОН ӨВЧНИЙ ЭСРЭГ ВАКЦИН ХУДАЛДАН АВАХАД 1.6 ТЭРБУМ ТӨГРӨГ ШААРДЛАГАТАЙ

            Шадар сайд Н.Номтойбаяр: Ямааны годрон өвчний улмаас 16 өрхийн 6,296 ямааг устгалд оруулж байгаа бөгөөд вакцин худалдан авахад 1.6 тэрбум төгрөг шаардлагатай талаар мэдээлэв. Цаашид шаардлагатай вакциныг шуурхай авах, дотооддоо үйлдвэрлэх боломжийг бүрдүүлэхийн зэрэгцээ Биокомбинатын хүний нөөц, үйлдвэрлэлийн чадавхыг газар дээр нь судалж, шаардлагатай арга хэмжээ авахаар ажиллаж байна.

ДЭЛХИЙ ДАХИНД

ОХУ-Д ТАХАЛ ГАРААГҮЙ "УУШГИНЫ ХАТГАЛГАА" ГЭЖ ОНОШ ТОГТООСОН Ч НЭГ ХҮН НАС БАРЖ, 200 ОРЧИМ ХҮНИЙГ ТУСГААРЛААД БАЙНА

            Талийгаачийн хэвтэж байсан Шелехов хотын халдвартын эмнэлэгт яаралтай хөл хорио тогтоож, хавьталд орсон 190 гаруй хүнийг тусгаарлаад байна. Мөн Эрхүү хотод холбогдох таван эмнэлэгт хөл хорио тогтоожээ.