Дэлхийн байгаль хамгаалах сан (WWF), Лондонгийн амьтан судлалын нийгэмлэг (ZSL) болон дэлхийн 100 гаруй шилдэг эрдэмтэд, мэргэжлийн байгууллагууд хамтарч “Амьд ертөнцийн тайлан 2026”-г өнөөдөр албан ёсоор зарлалаа.  

     Тайланд дурдсанаар, дэлхий даяар судлагдсан зэрлэг амьтдын популяцийн дундаж хэмжээ 1970-2022 оны хооронд 73 хувиар буурчээ. Бууралт цэнгэг усны экосистемд хамгийн өндөр буюу 85 хувь, хуурай газарт 69 хувь, далайд 59 хувьтай байна. Амьдрах орчны хомсдол, доройтол, хэт ашиглалт, уур амьсгалын өөрчлөлт, бохирдол зэрэг нь гол аюул болжээ.  Гэсэн хэдий ч популяциудын тал хувь нь тогтвортой эсвэл өсөж байгаа бөгөөд бар, хөх сэрвээт туна загас, ногоон далайн яст мэлхий, Өмнөд Африкийн зааны популяци сэргэж буй сайн жишээ байна.  Жишээ нь,  нэн ховор барын тоо толгой 2010-аас 2025 онд 3200-гаас 5700 болж нэмэгджээ.

    Мөн тайланд байгаль хамгааллын ажлыг эрчимжүүлэхийн зэрэгцээ байгалийн доройтлыг өдөөж буй хүнс, эрчим хүч, санхүүгийн тогтолцоог өөрчлөх шаардлагатайг онцолжээ. Эдгээр тогтолцоонд эерэг өөрчлөлтийн “эргэлтийн цэг”-ийг бий болгож чадвал байгаль сэргэх боломжтой гэж судлаачид үзэж байна. Нѳхцѳл байдал боломжгγй мэт санагдаж болох ч итгэл найдвар тѳрγγлэх бодит γндэслэл байгаа юм.

    Дэлхийн байгаль хамгаалах сангийн Ерөнхий захирал Кирстен Шуйт “Биологийн олон янз байдал  доройтсоор байна. Гэсэн хэдий ч ийм огцом бууралтын дунд найдвар төрүүлэх үндэслэл бий. “Амьд ертөнцийн тайлан 2026” нь олон зүйлийн популяци тогтвортой, сэргэж байгааг нотлох баримтуудыг танилцуулж, байгаль сэргэн хөгжиж, өөрчлөлт хийх боломжтойг харуулсан урам зориг өгөх жишээнүүдийг онцолж байна. Бар, хөх сэрвээт туна загас, далайн ногоон яст мэлхий зэрэг зүйлийн популяци сэргэж байгаа нь олон жилийн турш тууштай, хамтын хүчээр хэрэгжүүлсэн байгаль хамгааллын үйл ажиллагаа ямар үр дүнд хүрч болохыг харуулж байна.

   Эдгээр байгаль хамгааллын амжилтыг үргэлжлүүлж, өргөжүүлэхийн тулд байгалийн доройтлыг өдөөж буй салбарууд болон тогтолцоог өөрчлөх шаардлагатай. Энэ өөрчлөлт аль хэдийнэ эхэлсэн. Бүх газар, шаардлагатай хэмжээнд хараахан хүрээгүй байгаа ч өөрчлөлт хийх боломжтойг харуулахуйц ахиц дэвшил бий. Бид байгаль  дэлхийгээ сэргээж чадна” гэж ярилаа.