УИХ-ын чуулганаар 2023 оны төсвийн төслийг хэлэлцүүлж байгаатай холбоотой УИХ-ын гишүүн Ц.Туваанаас зарим зүйлийг тодрууллаа.

-2023 оны төсвийн төсөлд тусгаснаар хүүхдийн мөнгийг нийт хүүхдийн 91 хувьд олгоно гэсэн. Таны зүгээс энэ асуудалд шүүмжлэлтэй хандаж байгаа харагдсан. Хүүхдийн мөнгө халамж юм уу, иргэн бүрд олгож байгаа ирээдүйн хөрөнгө оруулалт юм уу?

-Одоогийн төсөвт ярьж байгаа гол асуудал хүүхдийн мөнгө байна. Одоогоор хүүхдийн мөнгө нийт дүнгээрээ 2.5 их наяд болж байгаа юм. Хүүхдийн мөнгийг Ардчилсан нам Засгийн эрх барих үедээ санаачлан гаргаж байв. Гол үндсэн зорилго нь халамж биш баялгаас орж ирсэн орлогыг хүүхдүүдэд мөнгөн хэлбэрээр олгож тэгш хүртээх. Одоо болохоор 91 хувьд нь өгч есөн хувьд нь өгөхгүй гэсэн үг. Өөрөөр хэлбэл, хөрөнгөтэй боломжийн айлын хүүхдүүдэд өгөхгүй гэж байна шүү дээ. Боломжийн орлоготой хүмүүсээ яаж ялгах нь тодорхойгүй байгаа. Би үүн дээр эсрэг байр суурьтай байгаа юм. Ингэж таналаа гээд 60 тэрбум төгрөг хэмнэнэ гэж байна. Ийм хэмжээний хөрөнгө хаанаас ч гарч болно шүү дээ.

-Тухайлбал?

-60 тэрбум төгрөгийг танаж юу хийх талаар асуусан ч, тодорхой хариулт өгсөнгүй. Хүүхдүүдээ ялгаварлах нь зохимжгүй. Үндсэндээ Үндсэн хуулиа зөрчиж байгаа юм.

-Ирэх онд төсвийн хөрөнгө оруулалт ялгаатай байна. Зарим аймагт хэт өндөр бол зарим нь маш бага хөрөнгө оруулалттай. Энэ тухайд та сөрөг хүчний гишүүний хувьд ямар байр суурьтай байгаа вэ?

-Хүн амын байдлаасаа шалтгаалж, төсвийн хөрөнгө оруулалт өөр байж болно. Гэхдээ хэт ийм ялгаатай байж болохгүй. Сүүлчийн хэдэн жил Хэнтий, Увс, Архангай зэрэг аймгууд өндөр төсөвтэй байна. Төсөв гэдэг бол Монгол Улс гэдэг “айл” 2023 онд ямар мөнгөөрөө хүнсээ авч, ямраар нь хувцсаа авах вэ гээд ялгаж байгаатай яг адил зүйл. Тэгэхээр төсвийг шилэн байлгах нь зүйтэй. Уг нь төсвийн төслийг хэлэлцүүлэхээс өмнө төсвийн хүрээний мэдэгдэл, төсвийн төсөөллийн тухай гээд олон хэлэлцүүлэг хийдэг. Үүнийгээ мөрдөхгүй байна.