Эргэлт.мн мэдээллийн сайт нөхөрлөлийн гэгээн түүхийн эздийг эрэн хайж, дурсамжийнх нь хөлгөөр аялахаар “Бямбаагийн найзууд” хэмээх богино хэмжээний нэвтрүүлгийг долоо хоног бүр уншигчдад хүргэж байгаа билээ. Тэр дундаа хамгийн гэгээн тунгалаг, гэрэлтэй, чин үнэн итгэл, элдэв өнгө будаггүй хүүхдийн дотоод ертөнцийн бүхээгт сууж, түүний дотроос цаашид үргэлжлэх уртын урт нөхөрлөлийн замыг тольдон харж, тэдний цас бороо мэт нөхөрлөлийн түүхийг түүвэрлэн, цагаан инээд, томоогүй үгсээр нь өрөн эрхэм уншигч таны өмнө дэлгэж буй. Бидний найм дахь дугаарын зочноор "Sunee s ballеt"-ийн дугуйлангийн Ө.Оюун-Эрдэнэ, Х.Амирлан, М.Маралмаа нар оролцлоо. Тэд баллетаар хичээллэх  сонирхолтой бяцхан охид. Балетын зааланд танилцаж, найзууд болж, нэгнээ харахаараа баярлалдан, хөөрнө. Хамтдаа дасгалаа хийж, тоглож, нэгнээ дууриах бөгөөд хаа нэг гомдоочихоод аргадаж, найздаа бэлэг өгдөг гэнэ. Мөн найзыгаа санахаараа хурдхан уулзахыг бодож, найзгүй бол уйтгартай хэмээн ярих тэдний энхрий дотно бөгөөд хэрсүү, гэнэн томоогүй ертөнцөд уншигч таныг урьж байна. 

   Биднийг очиход, гурван найз хэдийн балетынхаа хувцсыг өмсчихсөн дасгалаа хийж байх бөгөөд тун эвлэгхэн, чин сэтгэлээсээ хийж байгаа харагдав. Охид бол ургаж байгаа цэцэгс гэдгийг балетын зааланд бэлтгэл хийж байгаа бяцхан охид илүүтэй баталж, охид бүрийг багаас нь балетаар хичээллүүлбэл гоё сайхан биеэ авч явдаг, гоо зүйн боловсролтой болох давуу талтай гэмээр. Ингээд цэцэг шиг охидын балетын бэлтгэл дээрээс бидний яриа эхэлсэн юм.

        -Х.АМИРЛАН: Намайг Х.Амирлан гэдэг. Би гурван настай. Ө.Оюун-Эрдэнэ, М.Маралмаа хоёроос нэг насаар дүү. Баллетын дугуйланд яваад хоёр найзтайгаа найзалсан.

   -Ө.ОЮУН-ЭРДЭНЭ: Энэ хоёр намайг нэг удаа унахад аргадаагүй. Би харин найзуудыгаа гомдоож байгаагүй. Хэрэв гомдвол "Найзаа битгий гомдоо, намайг уучлаарай" гэж хэлдэг. Тэгээд уйлвал гоё юм өгч, аргадаад хамт тоглодог. Хааяа нэгнийгээ уурлуулна. Тэр үед нь би ч бас уурлаж байгаад, найзтайгаа эвлэрдэг.

    -М.МАРАЛМАА: Бид гурав муудалцаж, нэгнийгээ гомдоодоггүй. Хэрэв гомдоож, уйлвал аргадаж бэлэг өгдөг. Намайг уйлахаар хоёр найз маань чихэр өгөөд, аргаддаг. Тэгээд бид гурав хамт хөгжилтэй тоглоом тоглодог. Үргэлж хамт тоглож, аргаддаг хоёр найздаа хайртай.

    -Х.АМИРЛАН: Би хоёр найзыгаа зоддоггүй, гомдоодоггүй. Харин намайг уйлвал хоёр найз маань "Яасан бэ найзаа" гээд аргадаж, бусад хүүхдүүдээс өмөөрдөг. Харин бид гурав муудалцвал, нэгнийгээ аргадаж, хамт тоглоно. Заримдаа Ө.Оюун-Эрдэнэ гомдоод, уурлана. Тэр үед нь М.Маралмаа бид хоёр "Найзаа битгий уурлаарай, бид хоёр дахиж тэгэхгүй ээ" гээд уучлалт гуйдаг.

 

    -М.МАРАЛМАА: Найзыгаа санахаараа аав, ээждээ "Найзтайгаа уулзмаар байна, дугуйланд явмаар байна гэж хэлдэг. Найзгүй байсан бол муухай, хамт тоглох хүнгүй болно. Найзгүй бол уйдаж, ганцаардана. Тэгээд мөн сонирхолтой, хөгжилтэй тоглоом тогоож чадахгүй болно. Бид гурав хамтдаа зөндөө хөгжилтэйгээр тоглодог.

    Ийнхүү найздаа сэтгэлийн үгээ хэлнэ үү гэхэд "Найздаа хайртай шүү, үргэлж хамт найзалдагт баярлалаа" гэснэөр бидний яриа өндөрлөсөн юм. Найз нөхөрлөл гэж юу байдгийг ч мэдэхгүй балчир тэд найзынхаа талаар, найз гэх ойлголтын талаар ийн ярилаа. Ургаж буй цэцэгс шиг гэрэл гэгээтэй, инээд цалгисан, цовоо цолгиун тэд том болоод хамтдаа  мундаг балетчин болохыг хүсдэгээ ч мөн ярьж байв. Үнэхээр тэд сонгодог урлагийн нэгэн том төрөл болох ирээдүйн мундаг баллетчин болохоор хичээллэж байна. Тэдний хүссэн, зорьсон бүхэн биелэлээ олох болтугай.