“Увс-2026” Монгол, Америкийн хамтарсан гамшгийн үеийн бэлэн байдал, хариу арга хэмжээний сургалт, дадлагын хүрээнд гал түймэртэй тэмцэх, хот дотор эрэн хайх, өндөрт эрэн хайх, эмнэлгийн тусламж үзүүлэх, химийн ослын үеийн ажиллагаа, дрон болон кибер, усны болон хот доторх эрэн хайх, аврах ажиллагааны тактикийн дадлага сургуулийг зохион байгуулсан байна.

        Хамтарсан дадлага сургуулилтад Монгол, АНУ-ын зохион байгуулагч, сургагч багш нараас гадна баруун бүсийн Баян-Өлгий, Говь-Алтай, Завхан, Ховд, Увс аймгийн Онцгой байдлын байгууллагын алба хаагчид, орон нутгийн удирдлага болон томилгоот бүрэлдэхүүн оролцож, гамшгийн үеийн хамтын ажиллагаа, харилцан ажиллагааг дадлагаар бататгажээ.

      Мөн ОБЕГ-ын харьяа Агаараас эрэн хайх, аврах 111 дүгээр ангийн алба хаагчид нисдэг тэргээр аврах ажиллагаа зохион байгуулж, гамшиг, ослын голомтод агаараас эрэн хайх, аврах ажиллагааг хэрхэн хэрэгжүүлэхийг үзүүллээ. Энэ үеэр Монгол, Америкийн аврагчид харилцан туршлага солилцож, ажиллагааны арга тактикаа уялдуулсан байна.

      Дадлага сургуулийн үеэр алба хаагчид өөрсдийн болон хүч хэрэгслийн бэлтгэл, бэлэн байдлыг дээшлүүлж, гамшиг, ослын үед шуурхай, богино хугацаанд аюулгүй эрэн хайх, аврах, нэрвэгдэгсдийг нүүлгэн шилжүүлэх ажиллагааны арга тактикийг бататгажээ.

      Ийнхүү “Увс-2026” сургалт, дадлагаар гамшгийн үед олон улсын болон байгууллага хоорондын хамтын ажиллагааг бэхжүүлж, аврах ажиллагааны нэгдсэн дадлага, харилцан ажиллагааг сайжруулахад чиглэсэн практик сургуулилтыг зохион байгуулсан байна.