БЯМБААГИЙН НАЙЗУУД: Үргэлж хамт байж, маргаашийг минь бүтээлцдэг найздаа баярлалаа

Д. Бямбасүрэн:
Гэрэлт ирээдүй

2022-03-08, 3040

Эргэлт.мн мэдээллийн сайт олон улсын эмэгтэйчүүдийн эрхийг хамгаалах өдөрт зориулан "Зоримог найзууд" цахим хуудсыг эрхлэн явуулдаг Э.Энхмаа, Б.Содгэрэл хоёрыг урилаа. Оюутны ширээнээс нөхөрлөснөөс хойш өдгөө таван жил баяр, гунигаа хуваалцаж нэгэндээ зөвлөж, дэмжиж, хамтдаа хөгжсөн тэдний хөгжилтэй, сонирхолтой яриаг үзэгч танд хүргэж байна.

-НАЙЗУУД НЭГНЭЭ НӨХДӨГ-

-Сайн байна уу, юуны өмнө та хоёрт олон улсын эмэгтэйчүүдийн эрхийг хамгаалах өдрийн мэндийг хүргэе. Манай уншигчдад өөрсдийгөө танилцуулаад, яриагаа эхлэх үү?

-Сайн байцгаана уу, биднийг Э.Энхмаа, Б.Содгэрэл гэдэг. МУИС-ийг сэтгүүлч мэргэжлээр төгссөн. Бид мэргэжлээрээ ажиллахын хажуугаар "Зоримог найзууд" цахим хуудсыг эрхлэн явуулдаг.

-Хүмүүс ихэвчлэн хэзээ найзалж эхэлснээ төдийлөн санадаггүй юм билээ. Та хоёрын хувьд хэдэн жил найзалж байна вэ?

-Э.ЭНХМАА: 2016 онд Б.Содгэрэл Дорнод аймгаас, би Булган аймгаас МУИС-д элсэн орсон. МУИС -д шинээр суралцагч эхний жилдээ ерөнхий эрдмийн хичээл гэж үзээд, хоёрдугаар курсээсээ илүү нарийсаж, мэргэжлээ сонгоод явдаг. Энэ ч утгаараа сэтгүүлчийн ангид ороод, анх танилцаж байсан. Нэг ангид байснаас гадна оюутны байранд Содоо манай өрөөний эсрэг талын өрөөнд байдаг байсан. Тэгээд л өрөөний охидууд "Энэ охин бүжиглэдэг гэсэн, хадаас шиг хөлтэй" гэж ярьдаг байв. Ингэж л өнөө охидуудын яриад байсан бүжиглэдэг охинтой нэг ангид орж, анх англи хэлний хичээлээ хамт хийснээр найзалж эхэлсэн дээ.

-Б.СОДГЭРЭЛ: Анх оюутны ширээнээс хичээлээ хийж байгаад танилцсан. Бид хоёр номын санд их сууна. Анх би Э.Энхмаад таалагдсан гэсэн.

-Та хоёрыг юу нэгтгэж, холбодог вэ?

-Б.СОДГЭРЭЛ: Б.Энхмаагийн хувьд хэзээ ч буруу, муу тийш хүнийг залж, чиглүүлдэггүй. Мөн найз маань сайхан сэтгэлтэй, үнэнч шударга бол миний хувьд хүнээс уучлалт гуйж мэддэггүй сул талтай. Тухайлбал, бид хоёр муудалцлаа гэхэд би түрүүлж уучлалт гуйхгүй, зөрүүдэлж, уурлаад цүнхээ аваад явна. Тэгэхээр Б.Энхмаа над руу араас " Найзыгаа уучлаарай, муухай зан гаргачихлаа" гээд чат бичдэг. Ер нь гомдсон үедээ аргадаж, уучилж, хүлээцтэй байдаг маань биднийг таван жилийн хугацаанд нөхөрлөх суурь болж өгсөн юм болов уу.

-Нэгнийхээ зан чанараас бидэнтэй хуваалцаж болох уу?

-Б.СОДГЭРЭЛ: Хар, цагаан хоёр нэгнээ нөхнө гэдэг шиг би жаахан хатуу бол, Энхмаагийн хувьд зөөлөн. Зарим тохиолдолд би илүү ухаантай шийдвэр гаргаж байхад, найз маань арай өөр шийдвэр гаргадаг. Мөн Энхмаа жаахан үрэлгэн бол миний хувьд илүү нарийн тооцоотой гэх зэргээр эсрэг тэсрэг оршдог. Ингэж нэгнийхээ алдаа, оноог нөхдөг. Мөн миний хувьд найзынхаа сул талыг шулуухан хэлчихдэг зантай бол найз маань харин илүү уучилж, алдаа оноогоо хүлээж авдаг. Нөгөө талаараа хэдийгээр таван жил найзалж байгаа ч нэгнийгээ бүрэн сайн таниагүй л яваа. Өдөр бүр л шинэ Энхмаа, шинэ Содоотой уулзаж, нэгнээ танисаар байгаа.

-Э.ЭНХМАА: Жинхэнэ найз амьдралын туршид шигшигдэж гарч ирдэг гэх үгийг би үнэн гэж боддог. Учир нь, би олон найз нартай байсан. Одоо гэтэл эргээд харахаар гарын таван хуруунд багтах тооны найзууд л үлдсэн байна. Найзууд, тэр дундаа эмэгтэй хүмүүс нөхөрлөөд явж байхад тулгардаг зүйл нь хоёр тийшээ өөрсдийнхөөрөө зөрчилдөх, маргалдах асуудал их гардаг болохоор тууштай урт хугацаанд нөхөрлөхөд бэрхшээлтэй санагддаг. Харин үргэлж хажууд байх жинхэнэ найзаа олоод ирэхээр алдаа, дутагдлаасаа бид өөрсдөө суралцаад явдаг юм болов уу гэж боддог. Тухайлбал, ямар нэгэн шийдвэрийг Содоо гаргахдаа тухайн үеийн сэтгэл хөдлөлөөр хардаг бол би илүү цаад талыг нь харж шийдвэр гаргадаг. Бид таван жилийн хугацаанд хамт найзалсан процесс бүртээ жинхэнэ найз гэж ямар байх ёстойг харуулсан болохоор одоо илүү олон зүйлийг ярих, магад зарим олон жил найзалсан хүнээс ч илүү туршлага хуримтлуулсан байж магадгүй.

-Найзаар нь дүгнэ, найзаар нь танидаг гэдэг. Нэгэндээ хэр зөвлөж, дэмждэг бол?

-Э.ЭНХМАА: Мэдээж найз нөхөрлөлийн хамгийн том зэвсэг бол нэгнийгээ дэмжих, зөвлөх шүү дээ. Энэ ч утгаар хэрэв би сул байх юм бол " Чи сул дорой байна, чиний энэ чадвар чинь муу байгаа болохоор ингэж байгаа юм аа. Чи үүнийгээ илүү сайжруулаарай" гэж хэлж, зөвлөх, өргөх, босгох найз минь байгаа болохоор тулах цэгтэй, түших зүйлтэй сайхан байдаг. Өөрөөр хэлбэл, жинхэнэ найзтайгаа учирсан хүн хэзээ ч сул дорой байдаггүй байх. Түүний болохгүй байгаа, уналттай байгаа бүх зүйлсийг найз нь хэлж, залж, чиглүүлдэг болохоор тэр. Тэгэхээр найз гэдэг бол зөв зам руу чиглүүлэгч байдаг. Тэр дундаа жинхэнэ найзаа олсон бол өөрийнхөө сул талыг олж авч, нөгөөтээгүүр би түүнийгээ суралцах боломж бүрдэж байгаа гэсэн үг юм. Содоогийн хувьд их цагаан цайлган. Хамтдаа нэг төсөл юм уу ямар нэгэн ажилд хамтрахад Содоо маань тэнд байж болох хамгийн гэгээлэг, сайхныг нь төсөөлдөг бол миний хувьд асуудлыг хөрсөн дээр нь илүү буулгаж бодитой хардаг. Ингэж бид хоёр нэгэнтэйгээ хоршиж, зарим үед нөхөж явдаг.

-Найзуудад хөгжилтэй дурсамж, алхам бүрт л тохиолддог байх. Хамгийн хөгжилтэй, мартагдадгүй дурсамжаасаа бидэнтэй хуваалцаач?

-Б.СОДГЭРЭЛ: Би хичээлийнхээ хажуугаар орой бүжгийн бэлтгэл хийж байсан үеийн зүйлс санаанаас гардаггүй. Тухайн үед би бэлтгэлд, хичээл гээд их ядардаг. Тэгээд өглөө байнга унтана. Тэгэхээр Энхмаа манай өрөө рүү орж ирээд, намайг өшиглөөд босгоно. Тэгээд өглөө бүр өшиглөж сэрээгээд байхаар нь би нэг удаа " Чи яахаараа намайг ингэдэг юм" гээд бүр уурлаж байсан. Одоо бодоход, хөгжилтэй сайхан төдийгүй хамгийн аз жаргалтай үе байж гэж бодогддог. Мөн нэг удаа хоёулаа адилхан жамухын үстэй болчихооод мат будгаар уруулаа будаж байсан минь хамгийн хөгжилтэй, инээд хүрэм байдаг.

-Э.ЭНХМАА: Оюутны амралтаар Содоо Дорнод аймаг руу, би Булган руу яваад амраад ирсэн чинь хоёулаа адилхан жамухын үстэй болчихсон, ижил үсний засалттай байсан. Тухайн үед Содоо яагаад надтай ийм ижилхнэ юм бол гэсэн бодол төрж байсан.

-Найз байна гэдэг их хариуцлага байхаас гадна том итгэл байх. Анх нэгэндээ бүрэн дүүрэн итгэж эхэлсэн үе нь хэзээ бол?

-Б.СОДГЭРЭЛ: Би анх Энхмаад шууд зуун хувь итгэхгүй, бүх зүйлээ ярьдаггүй жаахан ажиглаж, өөрийнх нь яриаг их сонсдог байлаа. Тэгээд танилцаад, илүү ойр дотно нөхөрлөөд ирэхээр өөрийн эрхгүй сэтгэлээ нээж, энэ миний сайн найз, итгэл даах найз мөн гэдгийг ойлгосон. Харин Энхмаагийн хувьд анхнаасаа бүх зүйлээ ярьж, итгэж байсан.

-Э.ЭНХМАА: Би анх хараад энэ миний найз юм байна, би итгэж болох хүн гэж танисан бол шууд итгэдэг. Түүнээс илүү ойр дотно танилцаж байгаад итгэнэ гэх зүйл байдаггүй. Би сонирхон харж, надтай найзалчихаар хүн байна гэж харсан бол тэр миний итгэх хүн мөн байна гэж л боддог. Содоог би анх тэгэж л харсан, миний ажиглалт зөв л байсан.

-Найзудад гомдож, тунирхах зүйл чамгүй олон байх. Нэгнийгээ гомдоогоод уучилж байсан тохиолдлоосоо хуваалцаж болох уу?

-Э.ЭНХМАА: Би найзыгаа баярлуулж байснаасаа илүү гомдоосон байх гэж боддог. Заримдаа найзынхаа жинхэнэ сайн найз нь байж чаддат эсэхдээ эргэлздэг. Ганцхан өөрийнхөө баяр жаргалтай цаг хугацаанд найзынхаа үнэт цагийг зарцуулаад, өөрөө Содоог зовж байгаа үед нь хамт байж чадаж байна уу гэж өөрөөсөө асуудаг. Тэгээд хүн заримдаа өөрөө анзаарахгүй үйлдлээрээ найзыгаа гомдоох тал бий. Тиймээс найзыгаа гомдоож байсан бүх зүйлдээ уучлаарай гэж хэлье. Зарим үед би Содоог гомдоосон мөртлөө гомдож байгаа Содоод өөрөө давхар гомдоод байх нь ч бий. Тэгэхээр найзыгаа гомдоож байсанд уучлаарай, миний дутууг нөхөж, өнөөдрийн надтай үргэлж хамт байж, маргаашийн намайг бүтээж байгаа найздаа баярлаж явдаг шүү.

-Б.СОДГЭРЭЛ: Би ч мөн найзыгаа их гомдоож байсан. Ихэнхдээ өөрийнхөөрөө загнаж, заримдаа их хариуцлаггүй зан гаргаж байсан. Мөн хөнгөн хуумгай шийдвэр гаргаж, өөрийнхөөрөө зүтгэдэг найзыгаа уучлаарай. Тэгээд 2018 онд найздаа зориулан бичиж байсан шүлгээ уншиж өгье.

Ханиадтай үед халуун чацаргана

Халтирах үед тулах багана

Харанхуй үед тусах гэрэл

Хариуцлагагүй үед зэмлэн зөвлөгч

Унтаа үед сэрээх сэрүүлэг

Уурласан үед тайвшруулах тариа

Уурын зуухны хээ шиг саваагүй мөрөөдлийг минь дэмжиж

Угаас бүтэхгүй тэнэгхэн бодлыг минь хөглөж

Урагш тэмүүлэхэд урам зориг болдог найздаа талархлаа

Шинэ тэнэг санаа гаргах бүрт минь дэмждэгт баярлалаа

Намайг бодвол чи илүү буурь, суурьтай ухаалаг охин шүү

Хамгаас хайрт эрхэм хүндтэй найз Энхмаад зориулав...

-ХАМТДАА ЭХЛҮҮЛСЭН ЗҮЙЛ-

Бидний яриа тэдний хамтдаа ажлынхаа хажуугаар эрхлэн явуулдаг "Зоримог найзууд" цахим хуудасны талаар өрнөсөн юм. Тэд өөрсдийнхөө нөхөрлөлийг улам гүн бат бэхжүүлэхийн тулд, бусад хүмүүст эмэгтэйчүүдийн нөхөрлөлийг түгээн дэлгэрүүлэхийн тулд яаж нөхөрлөж болдог талаар үлгэр дууриалал үзүүлэх зорилгоор " Зоримог найз" цахим хуудсаа нээсэн. Мөн "Зоримог найзууд" гэх нэрний тухай тэд ярихдаа "Оюутан байхаасаа эхлэн найзтайгаа хамт нэг зүйл хийхээр ярьж байсан юм. Тэр хүсэл минь саяханаас, хэрэгжиж, хоёулаа ярьж байгаад би зоримог найзууд гээд өгвөл ямар вэ гэсэн саналыг Содоод хэлсэн. Тэгээд найз минь дэмжиж, бид хоёр хамтдаа хөгжилтэй бичлэг, эмэгтэйчүүдийн нөхөрлөл ямар байдгийг харуулах зорилгоор явуулж байгаа.

-ЭМЭГТЭЙЧҮҮДДЭЭ ЦЭЦЭГ ӨГӨХӨӨС ИЛҮҮ ЭРХИЙГ НЬ ХАМГААЛАХ НЭГ Ч ГЭСЭН ЗҮЙЛИЙГ ХИЙГЭЭСЭЙ ГЭЖ БОДДОГ-

- Энэ хэсэгтээ бид яриагаа эмэгтэйчүүдийн эрхийн өдрийн талаарх үзлэл бодол болон ээждээ хэлэх чин сэтгэлийн мэндчилгээгээр үргэлжлүүлсэн юм.

-Олон улсын эмэгтэйчүүдийн эрхийг хамгаалах өдрийн талаар та хоёрын хувьд ямар бодолтой явдаг вэ?

-Б.СОДГЭРЭЛ: Юуны өмнө бидний нэвтрүүлгийг үзэж байгаа хүн бүрт эмэгтэйчүүдийн эрхийг хамгаалах өдрийн баярын мэнд хүргэе. Энэ өдрийг эмэгтэйчүүд хамГийн аз жаргалтай, хамгийн сайхнаараа тэмдэглэн өнгөрүүлэх хэрэгтэй гэж боддог. Эмэгтэй хүмүүс сүүлийн үед их хүчирхийлэл, гэр бүлийн дарамт шахалт болон бэлгийн хүчирхийлэлд өртөж байгаа тухай бид өдөр бүр уншиж байна. Тэгэхээр эмэгтэйчүүдийн эрхийн өдөр эмэгтэйчүүддээ цэцэг өгч баярлуулахаас илүүтэй эрхийг нь хэрхэн хамгаалах тал дээр илүү анхаарвал зүгээр санагддаг. Үүний тулд хүн бүр дуу хоолойгоо өргөж, бодол санаагаа нэгтгэж, нэг ч болов эмэгтэйн эрх зөрчигдөхгүй байхын төлөө хүчтэйгээр дуугарсан, эргэн сануулсан өдөр байгаасай гэж хүсдэг. Тэгээд бүх эмэгтэйчүүддээ эрхийг хамгаалахын өдрийн мэндийг хүргэе. Мөн ээждээ баярын мэнд хүргэж, хайртай шүү гэж хэлье. Өнөөдөр эрүүл биетэй, ухаан саруул ухаантай өдий зэрэгтэй амьдарч байгаа минь ээж таны минь ач шүү гэж хэлье.

Уул өргөж таны ачийг хариулах

Урт холын бодолд дараатай яваа шүү...

-Э.ЭНХМАА: Эмэгтэйчүүдийн эрхийг хамгаалах өдөр гэдэг бол хайртай дотны эмэгтэй хүндээ цэцэг өгөхөөс илүүтэй эмэгтэйчүүдийн эрхийг хамгаалахад би юу хийж чадах вэ гэдгийг эргэн нэг харж, тунгаан бодох өдөр байгаасай гэж хүсдэг. Энэ ташрамд, ээждээ, бүх эмэгтэйчүүддээ баярын мэнд хүргэе. Өдий зэрэгтэй оюун санаа, өөрийн зоргоороо байх, хөгжих боломжийг олгосон аав, ээждээ баярлалаа. Өнөөдрийн би гэх хүний суурийг бэлдсэн, цогцлоосон хүмүүс бол та нар минь шүү.

БЯМБААГИЙН НАЙЗУУД: Үргэлж хамт байж, маргаашийг минь бүтээлцдэг найздаа баярлалаа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид