БЯМБААГИЙН НАЙЗУУД: Найзтайгаа хамт байхаар хамгийн эрх чөлөөтэй, өөрийнхөөрөө байдаг

Д. Бямбасүрэн:
Гэрэлт ирээдүй

2022-02-25, 2489

Эргэлт.мн мэдээллийн сайт нөхөрлөлийн гэгээн түүхийн эздийг эрэн хайж, дурсамжийнх нь хөлгөөр аялахаар “Бямбаагийн найзууд” хэмээх богино хэмжээний нэвтрүүлгийг долоо хоног бүр уншигчдад хүргэж байгаа билээ. Бид дөрөв дэх дугаарынхаа зочноор дуучин А.Энжи болон түүний найз Т.Амина нарыг урьж, охидын уярам яруу, басхүү адтай, хэрсүү, хүсэл мөрөөдөл дүүрэн гэгээн ертөнцийн тухай яриаг уншигч танд хүргэж байна.

-Сайн байна уу. Та хоёрт энэ өдрийн мэндийг хүргэе. Манай уншигчидад өөрийгөө танилцуулаач?

-А.ЭНЖИ: Сайн байцгаана уу. Намайг А.Энжи гэдэг. Тавдугаар ангид сурдаг. Хоёр настайгаасаа эхлэн дуу дуулж эхэлсэн. Анх “Манай эмээ” богино хэмжээний зохиомжид тоглож эхэлсэн.

-Т.АМИНА: Намайг Т.Амина гэдэг. Мөн тавдугаар ангид сурдаг. Багаасаа урлагт дуртай дуулж, бүжиглэх сонирхолтой. Гурван настайгаасаа эхлэн Хүүхдийн ордны н.Алтан-Уяа багш дээр хичээллэдэг. Тэгээд сургуульд ороод дугуйлангаасаа гарсан.

-Анх найз болсон түүхээсээ хуваалцаач. Хэдэн жил найзалж байгаа вэ?

-А.ЭНЖИ: Анх бид хоёр нэг дугуйланд явдаг байсан ч нэгэнтэйгээ дотно найзалдаггүй байсан. Тэгээд бага, багаар юм ярьж эхлээд, хамт хичээлээ давтаад дотно танилцаж эхэлсэн. Нэг мэдэхэд, маш богино хугацаанд сайн найзууд болсон байсан. Анх сургуулийн дууны дугуйланд Т.Аминааг хараад их зантай охин байна гэж бодсон юм. Гэтэл манай найз “Чи Аминатай найзалчих” гэсэн саналыг хэлж байсан. Тэгээд би өөрөө түрүүлж очиж найзалж болдоггүй, тэгээд удаан харьцахгүй явж байгаад нэг мэдэхэд юм ярьж, дотно танилцсан.

-Т.АМИНА: Нэг, хоёр, гуравдугаар ангидаа бол дотно найзалдаггүй байсан. Харин дөрөв, тавдугаар ангиасаа эхлээд, бие биенийгээ ойлгоод, ижилхэн сонирхолтой гэдгээ мэдээд, жилийн хугацаанд их сайн найзууд болсон. Анх англи хэл болон биеийн тамирын хичээлд таардаг. Тэгээд биеийн тамирын хичээл дээр өндрөөр ижил болохоор хамгийн дор нь хамт зогсдог байсан. Би анх Энжиг олны танил жаахан их зантай гэж бодож байсан болохоор хол суугаад, үсэглэлийн баяраар харахад хүрэхэд сонин санагдаж байсан. Тэгсэн өөрөө жинхэнэ их зан гаргаад явдаг байсан байна билээ.

-Та хоёрыг ажиглаад байхад Энжи цоглог, чанга дуутай бол Т.Амина даруухан, дөлгөөн санагдлаа?

-А.ЭНЖИ: Т.Амина маань уг нь яриа хөрөөтэй, найзууд дундаа бүр алдаг байхгүй юу.

-Т.АМИНА: Ангидаа болон найзууд дундаа хамгийн чөлөөтэй. Олон хүний дунд даруухан болчихдог юм.

-Хамт байхдаа юу хийдэг вэ. Хөгжилтэй дурсамжаасаа бидэнтэй хуваалцаач?

-А.ЭНЖИ: Хамт байхдаа толинд харж зургаа авна, тик ток хийх зэрэг зөндөө хөгжилтэй зүйлс хийдэг. Ер нь тэгээд хамт байхдаа галзуурч өгнө дөө. Найзтайгаа байхдаа хамгийн өөрийнхөөрөө, эрх чөлөөтэй байдаг. Т.Амина найз маань унгалаг, дөлгөөхөн тайвшруулдаг. Харин миний хувьд уурласан үед нь зөнгөөр нь орхичихдог. Манай найзууд уурлачихаараа гэдийчихдэг. Тэгээд эвээр тайвшруулах гэхээр ойлгодоггүй. Тэгэхээр нь зөнгөөр нь ганцаар нь үлдээчихээр өөрсдөө зүгээр болдог. Гэхдээ найзуудынхаа нэгэнтэй нь муудчихаар муухай мэдрэмж төрдөг.

-Т.АМИНА: Энжигийн төрсөн өдрөөр их гоё байсан. Хааяаа найзагаа гомдоочихоод, их хурдан тайвшруулдаг. Би найзуудыгаа их хурдан тайвшруулдаг төрлийн хүн. Нэг удаа төрсөн өдөртөө гурван эрэгтэй, гурван эмэгтэй хамт явсан. Тэгсэн нөгөө гурван эрэгтэй нь нэг нь хөлөн дээр нь гишгэсэн, нөгөө нь Энжи рүү юм шидээд, харин өнөөх нь тоохгүй байна гээд гомдсон юм. Тэр үед Гэгээлэн найз бид хоёр нийлээд Энжиг тайвшруулах гэж хэсэг зүйл болсон. Намайг гомдсон үед Энжи миний чихэнд инээдтэй үг хэлээд тэвэрдэг, тэгэхээр сэтгэл уярчихна. Мөн би найзыгаа хааяа гомдохоор “Яагаад би аргадах ёстой юм” гэж бодож байгаад, хэсэг хугацааны дараа найзгүй болсон юм шиг санагдаад ганцаардаад байдаг. Тэгээд угаасаа эвлэрэхээс өөр аргагүй болдог. Тийм болохоор “Одоо миний найз болио” гээд тэвэрч, аргадаж тайшруулдаг.Тэгэхээр найз маань бага, багаар уур нь дарагдсаар зүгээр болдог.

-Найзтайгаа удаан уулзаагүй үедээ санадаг уу?

-Т.АМИНА: Цар тахлын улмаас гэртээ цахим хичээлээ үздэг байх үед найзтайгаа уулзахгүй найзыгаа их санасан. Тэгээд ер нь орой болохоор л их боддог. Сургууль танхимаар орохгүй байх үед найзыгаа санахдаа, хичээл хурдан ороосой гэж хүлээдэг байсан ч дахиад л долоо хоногоор хойшилдог байсан. Тэр үед л хамгийн хэцүү байсан даа.

-А.ЭНЖИ: Би харин найзтайгаа уулзахгүй удаан байж чаддаггүй. Яагаад гэвэл найзтайгаа хамт байхдаа хамгийн дуртай зүйлсээ хийдэг, хөгжилтэй зүйлсийг ярьдаг болохоор ганцаараа байхад гунигтай байдаг. Тэгээд би хурдхан найзуудтайгаа уулзаж өөрийн сонсож мэдсэн, сурсан олон гоё зүйлээ хуваалцмаар байдаг.

-Найзынхаа юунд баярлаж хамгийн их явдаг вэ?

-А.ЭНЖИ: Надтай найзалж, миний найз байгаад хамгийн их баярлаж явдаг. Өдөр бүр надтай хамт байж, намайг өмгөөлдөгт нь баярладаг. Харин би найзыгаа нэг их баярлуулж байгаагүй байх гэж бодож байна. Мөн уйлахад, гомдоход аргадаж, тэвэрдэг найздаа баярлалаа.

-Т.АМИНА: Намайг тоож төрсөн өдөртөө урьсанд баярлалаа. Найзын минь төрсөн өдөр их гоё болсон шүү. Би ч бас ингэад бодохоор Энжиг баярлуулахаасаа илүү гомдоож байсан байх. Гэхдээ надад итгэж, надтай сайн найзууд байдагт баярлалаа.

-Найзыгаа өмөөрч байсан тохиолдол бий юу?

-Т.АМИНА: Энжигийн зурагны доод талын сэтгэгдэл хэсгийг уншаад шүүмжилсэн, муулсан зүйл бичсэн бол " Чи өөрийгөө хичээ" гээд бичдэг. Хүмүүс Энжиг дуучин гэдгээр нь хүлээж авалгүй, Энжи гэдэг хувь хүнээр нь хүлээж аваасай гэж боддог. Энжи гэхээсээ илүү миний найз, би найзыгаа илүү сайн мэдэх болохоор хүмүүс янз бүрээр хэлэхээр хэлмээр санагддаг. Мэдээж би найзынхаа үнэнч фен нь мөн. Гэхдээ миний найз гэдгээр нь илүү хайрладаг.

-Та хоёрт найздаа сэтгэлийн үгээ хэлж, амлалт өгөхийг хүсэж байна?

-А.ЭНЖИ: Намайг ойлгож, надтай хамт байдаг найздаа маш их баярлалаа. Найз нь маш их хайртай шүү. Үргэлж нэгэнтэйгээ хөгжилдөж, санаа бодлоо хуваалцаж, бие биенээ дэмжиж байх болно.

-Т.АМИНА: Анх их зантай хүүхэд гэж буруугаар бодож явсанд уучлаарай. Тэгээд хамт нэг сургуульд орж, хамтдаа байж, том болоод хоёр найзтайгаа дөрвүүлээ хамт аялаж, хамтдаа амьдарна гэж боддог. Үргэлж хамтдаа байцгаая.

БЯМБААГИЙН НАЙЗУУД: Найзтайгаа хамт байхаар хамгийн эрх чөлөөтэй, өөрийнхөөрөө байдаг

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид